კიევში საჰაერო განგაში 9 საათის განმავლობაში ისმოდა, უკრაინულმა კამიკაძე დრონებმა კი რუსეთში, ნოვოროსიისკის პორტს შეუტიეს - რუსეთ-უკრაინის ომის კიდევ ერთი მძიმე ღამე
გამთენიისას კრასნოდარის მხარეში მდებარე ნოვოროსიისკის პორტს უკრაინულმა წყალზედა და საჰაერო კამიკაძე დრონებმა შეუტიეს.
გავრცელებული ინფორმაციით, რუსები აღნიშნულ სამხედრო პორტში რუსები შავი ზღვის ფლოტის იმ სამხედრო ხომალდებს მალავენ, რომლებიც უკრაინელთა მხრიდან გაზრდილი საჰაერო/სარაკეტო საფრთხის გამო ოკუპირებული ყირიმის ნახევარკუნძულიდან სასწრაფოდ გაიყვანეს.
ინფორმაციას რუსეთის ხელისუფლებაც ადასტურებს.
ქალაქის მერის, ანდრეი კრავჩენკოს განცხადებით, “რუსეთის ქალაქ ნოვოროსიისკზე უეკიპაჟო კატარებით შეტევა განხორციელდა. მიმდინარეობს უეკიპაჟო კატარებით თავდასხმის მოგერიება“, - აღნიშნა მერმა.
მანამდე კრავჩენკომ განაცხადა, რომ ქალაქში საზღვაო დრონებით თავდასხმის საფრთხე გამოცხადდა და მოსახლეობას სიფრთხილის გამოჩენისკენ მოუწოდა.
-
მძიმე ღამე ჰქონდა უკრაინის დედაქალაქ კიევსაც. რუსები ქალაქს ათობით დრონით დაესხნენ თავს, კიევში აფეთქებების ხმები ისმოდა
კიევში საჰაერო განგაში 9 საათზე მეტხანს გაგრძელდა.
კიევის მერის, ვიტალი კლიჩკოს განცხადებით, ქალაქში საჰაერო თავდაცვის ძალები მუშაობენ. მოსახლეობა კი თავშესაფრებში, მიწისქვეშა ნაგებობებში და მეტროსადგურებში გაიხიზნა. საჰაერო თავდასხმის განგაში მთელი ღამის განმავლობაში ისმოდა.
მედიის ინფორმაციით, რუსული ძალები წუხელ უკრაინას Shahed-ის ტიპის ათობით დრონით დაესხნენ თავს. აღსანიშნავია, რომ მტრის ვერცერთმა დრონმა სამიზნეს ვერ მიაღწია.
“მორიგი ხანგრძლივი მასიური თავდასხმა რუსული უპილოტო საფრენი აპარატებით. დედაქალაქში განგაში 9 საათზე მეტ ხანს უწყვეტად გაგრძელდა. მთელი ამ ხნის განმავლობაში რუსული დრონები, პირველადი ინფორმაციით, Shahed-ები, ცდილობდნენ დედაქალაქზე შეტევას. ამჯერად კიევში ძირითადად სათითაოდ შევიდნენ და არა ჯგუფურად. მაგრამ მტრის ვერცერთმა უპილოტო საფრენმა აპარატმა სამიზნეს ვერ მიაღწია! გააუნებელყვეს ყველა დრონი, რომელიც ემუქრებოდა დედაქალაქს“, - აცხადებენ კიევის საქალაქო-სამხედრო ადმინისტრაციაში.
არსებული ინფორმაციით, დრონებით თავდასხმის შედეგად არავინ დაღუპულა, ან დაშავებულა. თუმცა პრობლემები შეიქმნა მეტროპოლიტენის და სხვა ტრანსპორტის მოძრაობასთან დაკავშირებით.
ხოლო, ქალაქ პოლტავაში დაღუპულთა რიცხვი 54-მდე გაიზარდა, 297 დაშავდა. კიდევ 5 ადამიანი სავარაუდოდ ნანგრევების ქვეშ იმყოფება. სამძებრო-სამაშველო სამუშაოები გრძელდება.
შეგახსენებთ, ბოლო დღეებში რუსულმა ძალებმა პოლტავასა და ლვოვზე მასშტაბური სარაკეტო შეტევა განახორციელეს.
კურსკში არსებულ ვითარებას აფასებს ვოლოდიმირ ზელენსკი. მისი თქმით, “კურსკის ოპერაციის ყველა განსაზღვრული ამოცანის რეალიზება ხდება“.
“დღეს იყო მეთაურ სირსკის მოხსენება, როგორც ყოველდღე, ფრონტის თითოეული ნაწილისთვის, კონკრეტულად პოკროვსკის, ტორეცკის და კურახოვსკის მიმართულებისთვის. ცალკე - ოპერაცია კურსკის ოლქში. ძალიან მნიშვნელოვანია, რომ ჩვენი კურსკის ოპერაციის, აბსოლუტურად, ყველა განსაზღვრული ამოცანა რეალიზდება. მადლობა ამისთვის თითოეულ ჯარისკაცს“, - აღნიშნა ზელენსკიმ.
მან ასევე აღნიშნა, რომ უკრაინა ამზადებს შეხვედრებს პარტნიორებთან და სექტემბერში, საჰაერო თავდაცვასთან დაკავშირებით, შედეგი უნდა იყოს.
- უკრაინის შეიარაღებული ძალების კურსკის ოპერაცია თითქმის ერთი თვეა მიმდინარეობს. ამ დროის განმავლობაში უკრაინამ წაართვა რუსეთის ტერიტორიის თითქმის 1300 კვადრატული კილომეტრი და აიღო კონტროლი სუჯაზე - რუსეთის ტრანს-ციმბირული მილსადენის გაზის საექსპორტო კვანძზე.
ამასთან, როგორც The Telegraph წერს, კურსკის ოპერაციამ ვერ შეძლო ბრძოლის ველზე მოვლენების მიმდინარეობის შეცვლა.
პარალელურად, მნიშვნელოვანი ცვლილებები მიმდინარეობს უკრაინის მმართველ პოზიციებში.
თანამდებობიდან გადადგომის შესახებ განცხადებები წარადგინეს ორმა ვიცე-პრემიერმა და ოთხმა მინისტრმა, მათ შორის საგარეო საქმეთა მინისტრმა, დმიტრო კულებამ. უკრაინის უმაღლესმა რადამ მხარი არ დაუჭირა ირინა ვერეშჩუკის განცხადებას ვიცე პრემიერ-მინისტრის, უკრაინის დროებით ოკუპირებული ტერიტორიების რეინტეგრაციის მინისტრის თანამდებობიდან გათავისუფლების შესახებ. 3 მინისტრი კი გაათავისუფლეს.
პარლამენტს დმიტრო კულებას საგარეო საქმეთა მინისტრის თანამდებობიდან გადაყენების საკითხისთვის, ჯერჯერობით, კენჭი არ უყრია.
უკრაინული მედიის ინფორმაციით, “ვოლოდიმირ ზელენსკიმ განაცხადა, რომ დმიტრო კულებას იარაღის მიწოდების ხელშეწყობისთვისთის საკმარისი ენერგია არ აქვს“.
იხილეთ ასევე:
- დიდი გადაწყობა უკრაინის მთავრობაში თუ..? - რადამ კულებას გადადგომის განხილვა გადადო: რას აცხადებს ზელენსკი და როგორ აფასებს ქართველი ექსპერტი უკრაინულ ცვლილებებს?
- რუსეთმა ზებგერითი, ფრთოსანი და ბალისტიკური რაკეტებით უკრაინის ქალაქებს შეუტია - ლვოვში გარდაცვლილებს შორის ბავშვებიც არიან, ნანგრევებში მოყოლილებს ისევ ეძებენ (ვიდეო)