“რუსეთის ტერიტორიაზე დარტყმებისთვის არა მხოლოდ ნებართვა, არამედ იარაღიც საჭიროა, არსებობს შეთანხმებები, რომ ჩვენ ყველაფერს მივიღებთ“ - ვოლოდიმირ ზელენსკი
“რუსეთის ტერიტორიაზე დარტყმებისთვის არა მხოლოდ ნებართვა, არამედ შესაბამისი იარაღიც საჭიროა“, - ამის შესახებ უკრაინის პრეზიდენტმა, ვოლოდიმირ ზელენსკიმ ზაპოროჟიეში, ნიდერლანდების პრემიერ-მინისტრთან, დიკ სხოფთან ერთად გამართულ პრესკონფერენციაზე განაცხადა.
“თუ ერთ-ერთმა ქვეყანამ, დაუშვა (დარტყმები) და ასეთი გზავნილები უკვე არსებობს დიპლომატიური არხებით, ისევე როგორც მედიაში, ჩვენ უნდა ვიცოდეთ, გადმოგვცა თუ არა ამ ქვეყანამ შესაბამისი იარაღი. ანუ, მხოლოდ ნებართვა არ არის საჭირო, საჭიროა ამის (იარაღის) მიღებაც“, - განაცხადა ვოლოდიმირ ზელენსკიმ.
ამასთან, უკრაინის პრეზიდენტის განცხადებით, “შეთანხმებები, რომ ჩვენ ამ ყველაფერს მივიღებთ“ არსებობს.
“აქ ორი საკითხია, რომლებზეც ჩვენ ვმუშაობთ (ნებართვისა და იარაღის მიღება), მაგრამ ამას დღეს ჩვენ უფრო პოზიტიურად ვაფასებთ“, - აღნიშნა უკრაინის პრეზიდენტმა.
ცნობილია, რომ ნიდერლანდები უკრაინას 200 მილიონ ევროზე მეტი ღირებულების დახმარების ახალ პაკეტს გადასცემს. ამის შესახებ ინფორმაციას უკრაინაში ვიზიტით მყოფი ნიდერლანდების პრემიერ-მინისტრი, დიკ სხოფი ავრცელებს.
“ჩვენ ყველაფერი უნდა გავაკეთოთ, რათა უკრაინას წინსვლაში დავეხმაროთ. არა მხოლოდ ფრონტის ხაზზე, არამედ ადამიანების ყოველდღიურ ცხოვრებაშიც. სწორედ ამიტომ, ნიდერლანდები 200 მილიონ ევროზე მეტი ღირებულების დახმარების მნიშვნელოვან ახალ პაკეტს გამოყოფს. პაკეტი ძირითადად ორიენტირებულია ენერგეტიკული ინფრასტრუქტურის დაცვასა და შეკეთებაზე და ჰუმანიტარული დახმარებისთვის დამატებით დაფინანსებას შეიცავს“, - წერს დიკ სხოფი სოციალურ ქსელში.
მისივე თქმით, უკრაინას შეუძლია ნიდერლანდების შემდგომი მხარდაჭერის იმედი ჰქონდეს.
“უკრაინაში ჩემმა პირველმა ვიზიტმა, ნიდერლანდების პრემიერ-მინისტრის რანგში, ჩემი რწმენა დაადასტურა, რომ ჩვენ უკრაინის მხარდაჭერა უნდა გავაგრძელოთ“, - აღნიშნა დიკ სხოფმა.
ცნობისთვის, დღეს, ნიდერლანდების პრემიერ-მინისტრი, დიკ სხოფი უკრაინაში ჩავიდა და ვოლოდიმირ ზელენსკისთან ერთად ზაპოროჟიეს ერთ-ერთ სკოლაში მოსწავლეებს სასწავლო წლის დაწყება მიულოცა.