თეთრი ვეშაპი ჰვალდიმერი, რომელზეც ეჭვობდნენ, რომ რუსებმა ჯაშუშად გაწვრთნეს, ნორვეგიის სანაპიროსთან მკვდარი იპოვეს
თეთრი ვეშაპი, რომელზეც ეჭვობდნენ, რომ რუსებმა ჯაშუშად გაწვრთნეს, ნორვეგიის სანაპიროსთან მკვდარი იპოვეს.
ცხოველი, რომელსაც ჰვალდიმერი შეარქვეს, ქალაქ რისავიკასთან გამორიყული აღმოაჩინეს და უახლოეს პორტში გამოსაკვლევად წაიღეს. ვეშაპი პირველად ნორვეგიის წყლებში ხუთი წლის წინ შენიშნეს, მას GoPro-ს კამერა ჰქონდა მიმაგრებული, რომელსაც "სანქტ-პეტერბურგის აღჭურვილობა" ეწერა. სწორედ ამან გააჩინა ეჭვები, რომ ცხოველი შესაძლოა, ჯაშუში ვეშაპი ყოფილიყო - რაც ექსპერტების თქმით, წარსულში უკვე მომხდარა. მოსკოვს ამ ბრალდებებზე არ უპასუხია.
ჰვალდიმირის უსულო სხეული უქმეებზე ორგანიზაცია Marine Mind-მა აღმოაჩინა, რომელიც წლების განმავლობაში მის მოძრაობებს აკვირდებოდა. Marine Mind-ის დამფუძნებელმა სებასტიან სტრანდმა საინფორმაციო სააგენტო AFP-ს განუცხადა, რომ ვეშაპის სიკვდილის მიზეზი უცნობია და რომ ჰვალდიმირის სხეულზე აშკარა დაზიანებები არ ჩანს. "მისი სხეული გავაცივეთ, რათა ვეტერინარული ინსტიტუტის ნეკროპსიისთვის იყოს მომზადებული", - განაცხადა სტრანდმა AFP-სთან.
დაახლოებით 15 წლის ჰვლადიმერი არც ისე ასაკოვანი იყო, რადგან თეთრი ვეშაპების სიცოცხლის ხანგრძლივობა 60 წლამდე აღწევს. ის პირველად ნორვეგიის ნავებს 2019 წლის აპრილში, ინგოიას კუნძულთან მიუახლოვდა, რომელიც მურმანსკიდან 415 კილომეტრში მდებარეობს, სადაც რუსეთის ჩრდილოეთის ფლოტია დაბანაკებული. მოვლენა ყურადღებას იქცევდა, რადგან თეთრი ვეშაპები არქტიკის სამხრეთით ასე შორს იშვიათად თუ ჩნდებიან ხოლმე.
აღმოჩენამ ნორვეგიის შიდა დაზვერვის სააგენტოს გამოძიება გამოიწვია, რომელმაც მოგვიანებით განაცხადა, რომ ვეშაპი, სავარაუდოდ, რუსეთის არმიის მიერ იყო გაწვრთნილი, რადგან ისეთ შთაბეჭდილებას ტოვებდა, თითქოს ადამიანებს შეჩვეული იყო. ვეშაპს ადგილობრივებმა ჰვალდიმერი შეარქვეს, რაც წარმოადგენს სიტყვების თამაშს, ერთი მხრივ, ნორვეგიული სიტყვით "ჰვალ", რაც ვეშაპს ნიშნავს, მეორე მხრივ კი, პრეზიდენტ ვლადიმერ პუტინის სახელით. რუსეთს ადრე სამხედრო მიზნებისთვის სხვა წყლის ბინადარი ძუძუმწოვრებიც გაუწვრთნია, მაგალითად, დელფინები; ვებ-საიტმა Barents Observer-მა კი მურმანსკის ჩრდილო-დასავლეთის საზღვაო ბაზებთან ვეშაპების საცხოვრებელი ადგილები აღმოაჩინა.
რუსეთს ოფიციალურად არასოდეს უღიარებია, რომ ჰვალდიმირი შეიძლება, რუსული სამხედროების მიერ ყოფილიყო გაწვრთნილი.