აფეთქებული ელექტროსადგური, შეფერხება “ვნუკოვოს“ აეროპორტში და ჩამოგდებული 158 უკრაინული დრონი - ზელენსკი შორ მანძილზე დარტყმებისთვის ნებართვებს ითხოვს (ვიდეო)
გუშინ, 31 აგვისტოს, რუსეთის მიერ ხარკოვის დაბომბვას ძლიერი ნგრევა და მსხვერპლი მოჰყვა. ქალაქის დაბომბვისა და საცხოვრებელ კორპუსებზე მიტანილი იერიშის შედეგად დაღუპულთა და დაშავებულთა რიცხვმა 30-ს გადააჭარბა. ადგილობრივი ხელისუფლების წარმომადგლების ინფორმაციით, დაღუპულთა შორის იყო 14 წლის გოგონა.
უკრაინის პრეზიდენტმა მოუწოდა პარტნიორებს, დაუშვან რუსეთის ტერიტორიაზე დარტყმა, რათა თავიდან აიცილონ ასეთი შეტევები.
“მივმართავ აშშ-ს, დიდ ბრიტანეთს, საფრანგეთსა და გერმანიას, უკრაინას შორი მანძილის დარტყმებისთვის ნებართვები სჭირდება“, - განაცხადა ვოლოდიმირ ზელენსკიმ ვიდეომიმართვაში.
“ამ დღეებში ვაშინგტონში ჩვენი უკრაინული დელეგაცია მუშაობს: პირველი ვიცე-პრემიერი, თავდაცვის მინისტრი, გენერალური შტაბის წარმომადგენლები, [პრეზიდენტის] ოფისის ხელმძღვანელი. იყო სხვადასხვა დონეზე შეხვედრები, და ჩვენთვის ერთ-ერთი უპირველესი საკითხი სწორედ ჩვენი თავდაცვის ძალების შორ მანძილზე დარტყმებია, მთელი არ ტერორის არდაშვების შესაძლებლობა, რომლის გავლაც უწევთ ჩვენს ხარკოვსა და ჩვენს სხვა ქალაქებს…
უკრაინის წარმომადგენლებმა გადასცეს მთელი საჭირო ინფორმაცია, ყველა საჭირო დეტალი ჩვენს პარტნიორებს. და მივმართავ შეერთებულ შტატებს, დიდ ბრიტანეთს, საფრანგეთსა და გერმანიას: გვჭირდება უკრაინისა და უკრაინელების რეალურად და სრულად დაცვის შესაძლებლობები. გვჭირდება შორ მანძილზე დარტყმებისთვის ნებართვებიც, და თქვენი შორი მანძილის ჭურვები და რაკეტებიც. არ შეიძლება სასიცოცხლოდ მნიშვნელოვანი გადაწყვეტილებების გადადება - სწორედ იმისა, რასაც შეუძლია ყველაზე სწორედ იმოქმედოს მოვლენებზე“, - განაცხადა ზელენსკიმ.
უკრაინის პრეზიდენტმა აღნიშნა, რომ რუსული ტერორის საიმედოდ გაჩერება მხოლოდ ერთი საშუალებით შეიძლება: “დარტყმებით რუსულ სამხედრო აეროდრომებზე, მათ ბაზებზე, რუსული ტერორის ლოგისტიკაზე.”
მძიმე ღამის შემდეგ, უკრაინამ რუსეთს საპასუხოდ შეუტია. რუსეთის თავდაცვის უწყების ინფორმაციით, საჰაერო თავდაცვამ ქვეყნის ტერიტორიაზე რეკორდული რაოდენობის, 158 დრონი ჩამოაგდო. მათგან 2 - დედაქალაქ მოსკოვის თავზე და 7 - მოსკოვის ოლქის თავზე.
გარდა ამისა, სამინისტროს ცნობით, 46 უპილოტო საფრენი აპარატი გაანადგურეს კურსკის ოლქის ტერიტორიაზე, 34 - ბრიანსკის ოლქში, 28 ვორონეჟის ოლქში, 14 ბელგოროდის ოლქში და 8 - რიაზანის ოლქში.
აღსანიშნავია, რომ წუხელ მოსკოვის “ვნუკოვოს“ აეროპორტმა თვითმფრინავების გაშვებასა და მიღებაზე დროებითი შეზღუდვები დააწესა.
ამასთან, მოსკოვის ოლქის სამხრეთით მდებარე კაშირის საქალაქო ოლქის ხელმძღვანელმა, მიხაილ შუვალოვმა “ტელეგრამ“ არხზე დაწერა, რომ 1-ელი სექტემბრის ღამეს კაშირის სახელმწიფო რაიონული ელექტროსადგურის ტერიტორიაზე სამი დრონით თავდასხმა განხორციელდა.
“მსხვერპლი და ნგრევა არ ყოფილა, აბონენტებს ელექტროენერგია რეგულარულად მიეწოდება“, - დაწერა შუვალოვმა.
ამასთან, სოციალურ ქსელებში ვრცელდება ინფორმაცია, რომ ტვერის ოლქში მდებარე კონაკოვსკაიას სახელმწიფო რაიონული ელექტროსადგურის ტერიტორიაზე დრონით თავდასხმა განხორციელდა და ხანძარი გაჩნდა.
-
ხორვატიამ უკრაინას განაღმვის რობოტული სისტემა გადასცა
უკრაინული მედიის ინფორმაციით, ხორვატიამ უკრაინისთვის DOK-ING MV-4 ტიპის განაღმვის რობოტული სისტემის გადაცემის შესახებ განაცხადა.
შესაბამისი სერტიფიკატი უკრაინის წარმომადგენლებს ხორვატიის თავდაცვის მინისტრმა, ივან ანუშიჩმა და მწარმოებელი კომპანიის ხელმძღვანელობამ Globsec-ის საერთაშორისო კონფერენციაზე გადასცა, რომელიც პრაღაში იმართება.
ანუშიჩმა აღნიშნა, რომ უკრაინის განაღმვის პროცესი დიდ დროს და ფინანსებს მოითხოვს.
“ნაღმების გაწმენდა უზარმაზარი ამოცანაა და საერთაშორისო მხარდაჭერა ძალიან საჭიროა, ჩვენ ვიმუშავებთ ერთად მანამ, სანამ საჭირო იქნება“, - აღნიშნა ხორვატიის თავდაცვის მინისტრმა.
იხილეთ ასევე: