"გვანცა ულამაზესია, კოზა ნოსტრაზე გადაღებული ფილმების გმირს ჰგავს... ბუბას წარმატებული კარიერა აქვს..." - ბავშვობის უმძიმესი ტრავმა და საბედისწერო ავარია: რუსული მედია ტარიელ ონიანის შვილების მდიდრულ ცხოვრებაზე
"ტარიელ ონიანი, რომელიც "შავ სამყაროში" "ტაროს" სახელით არის ცნობილი, 1958 წელს ქალაქ ტყიბულში დაიბადა. მამამისი მაღაროში მუშაობდა, მაგრამ ნგრევის დროს გარდაიცვალა. ამის შემდეგ ოჯახი ქუთაისში გადავიდა საცხოვრებლად. "ტარომ" პირველი დანაშაული 17 წლის ასაკში ჩაიდინა. მას შემდეგ, რვაჯერ მოხვდა კოლონიაში", - წერს რუსული მედია ქართველ ე.წ. კანონიერ ქურდზე.
სტატიაში ასევე აღნიშნავენ, რომ ონიანი 1970-იანი წლების ბოლოს "აკურთხეს კანონიერ ქურდად", 1980-იან წლებში კი ის მოსკოვში ერთ-ერთ ყველაზე გავლენიან "კრიმინალურ ავტორიტეტად" ითვლებოდა.
2009 წლიდან 2019 წლამდე ტარიელ ონიანი რუსეთში ორენბურგის რეგიონში "შავი დელფინის“ სახელობის მკაცრ კოლონიაში იმყოფებოდა. ის 2019 წელს ესპანეთს გადასცეს, სადაც ოთხი წლით თავისუფლების აღკვეთა მიუსაჯეს და 36 ათასი ევროს ოდენობის ჯარიმის გადახდა დააკისრეს. 2021 წელს, უცნობია როგორ, მაგრამ საპატიმრო დატოვა. მას შემდეგ ონიანის მუდმივი ადგილსამყოფელი უცნობია. 2023 წელს სხვა ქართველ "კანონიერ ქურდებთან" ერთად, პოლონეთში, ერთ-ერთ შეკრებაზე იმყოფებოდა.
ტარიელ ონიანს ზრდასრული ქალიშვილი და ვაჟი ჰყავს 28 წლის ბუბა და 29 წლის გვანცა-მარია, რომლებიც მოსკოვში ცხოვრობენ.
"გვანცა ონიანი ნამდვილი ლამაზმანია, მისი გარეგნობა კოზა-ნოსტრაზე გადაღებული ფილმების გმირებს მოგაგონებთ", - წერს რუსული მედია.
გვანცა ონიანი ყოველთვის სასურველი სტუმარია მდიდრულ წვეულებებზე. გოგონას ასევე უყვარს მოგზაურობა და არ ერიდება თავისი მდიდრული ცხოვრების საჯაროდ ჩვენებას. რუსული მედია წერს, რომ გოგონა მოსკოვში ცხოვრობს, მაგრამ ძალიან უყვარს მამის სამშობლოს მონახულება. ასევე ხშირად სტუმრობს მონაკოს პრესტიჟულ კურორტებსა და საბერძნეთის კუნძულებს.
"გვანცამ ბავშვობაში დიდი შოკი გადაიტანა. როდესაც "კრიმინალური ავტორიტეტი" 90-იან წლებში საფრანგეთში გადავიდა საცხოვრებლად, მალე მის წინააღმდეგ რამდენიმე სისხლის სამართლის საქმე აღიძრა. შემდეგ ოჯახთან ერთად ესპანეთში გადავიდა საცხოვრებლად, სადაც საკუთარი ბიზნესი დაიწყო. 2005 წელს ესპანურმა სადაზვერვო სამსახურებმა ჩაატარეს ფართომასშტაბიანი ოპერაცია Wasp რუსი მაფიოზების დასაკავებლად. მასში მონაწილეობდა 400-ზე მეტი პოლიციელი ჯავშანტრანსპორტიორებით და ვერტმფრენებით.
ოპერაციის ფარგლებში ჩხრეკა ჩატარდა ონიანის მიერ კონტროლირებად 50 ობიექტში: კურორტებზე მარბელაში, ტორემოლინოსში, ასევე ბარსელონასა და ალიკანტეში", - წერს მედია.
მათივე ცნობით, მაშინ "ტარო" ესპანელ სამართალდამცავებს გაექცა, მაგრამ ხელისუფლებამ მისი 12 წლის ქალიშვილი, გვანცა დააკავა. მადრიდის ხელისუფლებამ განაცხადა, რომ "კრიმინალის პრინცესას" მაშინვე გაათავისუფლებდნენ, როდესაც მშობლები მიაკითხავდნენ.
თუმცა, გოგონას მშობლები არ გამოჩნდნენ და გვანცა არასრულწლოვანთა ციხიდან ოთხი დღის შემდეგ გაათავისუფლეს. მომხდარის შემდეგ, ტარიელ ონიანი რუსეთში დაბრუნდა და უარი თქვა საქართველოს მოქალაქეობაზე. ის ათი წლის შემდეგ მაინც მოხვდა ესპანეთის ციხეში.
გვანცას სახელი არასოდეს ხვდება რუსული მედიის ყვითელ რუბრიკებში, მაგრამ როგორც ადგილობრივი პრესა წერს, გოგონა მოსკოვის გარდა, საფრანგეთის დედაქალაქში დროს არანაკლებ მდიდრულად ატარებს. გვანცა-მარია სადილობს ცნობილ რესტორან L’Avenue-ში და აწყობს ქუჩის სტილის ფოტო გადაღებებს Chanel-ისა და Dior-ის ჩანთებით.
ბუბა-უშბა ონიანი - წარმატებული კარიერით
კრიმინალური ავტორიტეტის ვაჟის ცხოვრება სულ სხვანაირად განვითარდა. ბუბა ონიანმა დისგან სრულიად განსხვავებული გზა აირჩია. განათლება ლონდონის ბრიტანულ საერთაშორისო სკოლაში მიიღო, ხოლო წარმატებით დამთავრების შემდეგ კასის ბიზნეს სკოლაში შევიდა. სკოლის დამთავრების შემდეგ, "კანონიერი ქურდის" შვილმა არ ისურვა საზღვარგარეთ დარჩენა და გადაწყვიტა მამასთან უფრო ახლოს, რუსეთში დაბრუნებულიყო.
ყველაფერი იდეალურად იქნებოდა, რომ არა საბედისწერო ავარია. უმცროსმა ონიანმაც ვერ მოახერხა ცხოვრება ისე, რომ მის ცხოვრებაში სამართალდამცავები არ გამოჩენილიყვნენ.
2015 წელს მოსკოვში მძიმე ავარია მოხდა, რომელშიც 21 წლის ბუბა ონიანი მონაწილეობდა. შემთხვევა კამერამ დააფიქსირა.
შემთხვევა კვირას ღამით მოსკოვში, ნოვი არბატზე მოხდა. მერსედეს S400-ის საჭესთან მჯდომი ბუბა ონიანი Volkswagen Touareg-ს დაეჯახა. დარტყმა ძლიერი აღმოჩნდა, მერსედესი ტროტუარიდან გადავარდა და გზის მოპირდაპირე მხარეს, მიწისქვეშა გადასასვლელში ჩავარდა. შემთხვევის შედეგად ონიანი უმცროსის ავტომანქანაში მყოფი 18 წლის მგზავრი თავის ტვინის ტრავმული დაზიანებით და ბარძაყის მოტეხილობით საავადმყოფოში გადაიყვანეს. ასევე დაშავდა ბუბას ორი მეგობარი: 19 წლის გიორგი ც. და 17 წლის დავით ხ.
თუმცა, ამ შემთხვევას ხელი არ შეუშლია ახალგაზრდისთვის წარმატებული გამხდარიყო. რუსული მედია ვარაუდობს, რომ ბუბა მამის ყველა ბიზნესს მართავს და "საოჯახო ბიზნესის“ ლეგალიზაციისთვის ყველაფერს აკეთებს.