დუროვი 5-მილიონიანი გირაოს სანაცვლოდ გაათავისუფლეს, თუმცა მას საფრანგეთიდან გასვლა აეკრძალა - "ტელეგრამის" დამფუძნებელი დაკავების შემდეგ კამერებმა პირველად დააფიქსირეს (ვიდეო)
სააგენტომ RIA Novosti 28 აგვისტოს საღამოს გადაღებული კადრები გამოაქვეყნა, რომელშიც ჩანს, როგორ ტოვებს პაველ დუროვი პარიზის სასამართლოს შენობას. მან უარი თქვა ჟურნალისტების შეკითხვებზე პასუხი გაეცა და მამაკაცთან საუბრის შემდეგ, რა დროსაც ჩანს, რომ კარგ ხასიათზეა, პროცესი ავტომობილით დატოვა.
დუროვს პარიზის პროკურატურამ ბრალი გუშინ წაუყენა, თუმცა ის წინასწარი პატიმრობიდან გაათავისუფლეს. Telegram-ის მფლობელს 5 მილიონი ევროს ოდენობის გირაოს გადახდა და პოლიციაში კვირაში ორჯერ გამოცხადება დაევალა.
“ტელეგრამის” შემქმნელი და საფრანგეთის მოქალაქე პაველ დუროვი პარიზში 24 აგვისტოს დააკავეს. საფრანგეთის პრეზიდენტმა ემანუელ მაკრონმა განაცხადა, რომ დუროვის დაკავებას პოლიტიკური მიზეზები არ გააჩნია.
პროკურატურამ მას საკმაოდ სკანდალური ბრალდებები წარუდგინა. ოფიციალურ განცხადებაში აღნიშნულია, რომ ის “კიბერდანაშაულზე მიმდინარე გამოძიების ფარგლებში დააკავეს“.
საფრანგეთის სამართალდამცავმა უწყებებმა გამოაქვეყნეს ბრალდებების სრული სია, რომლის საქმეზეც დუროვი დააკავეს და დაკითხეს. მასში რვა პუნქტია:
- თანამონაწილეობა - ონლაინ პლატფორმის ოპერირება უკანონო გარიგების გასაადვილებლად
- უარი უფლებამოსილი ორგანოების მოთხოვნაზე, ინფორმაციის ან დოკუმენტების გამჟღავნებასთან დაკავშირებით, რომელიც აუცილებელია კომუნიკაციებში კანონიერად ნებადართული ჩარევის განსახორციელებლად
- თანამონაწილეობა - არასრულწლოვანთა პორნოგრაფიული სურათების ფლობა, ბავშვთა პორნოგრაფიის ორგანიზებული გავრცელება, შეთავაზება ან მიწოდება
- თანამონაწილეობა - ნარკოტიკული საშუალებების შეძენა, ტრანსპორტირება, შენახვა, შეთავაზება ან გადაცემა
- ფასილიტაცია - აღჭურვილობის, ხელსაწყოების, პროგრამების ან მონაცემების შეთავაზება, გადაცემა ან ხელმისაწვდომობა, იურიდიული საფუძვლის გარეშე, რომლებიც შექმნილია ან ადაპტირებულია მონაცემთა დამუშავების ავტომატური სისტემების მუშაობისთვის
- თანამონაწილეობა - თაღლითობა ორგანიზებული ბანდის შემადგენლობაში თანამონაწილეობა
- დანაშაულებრივი შეთქმულება მძიმე ან განსაკუთრებით მძიმე დანაშაულის ჩასადენად
- ფულის გათეთრება ორგანიზებული დანაშაულისგან
ამასთან, Politico-ს ცნობით, საფრანგეთის ხელისუფლების ორგანოებმა პაველ დუროვისა და "ტელეგრამის“ თანადამფუძნებლის, მისი ძმის, ნიკოლაის დაკავების ორდერები მარტში გამოსცეს.
დოკუმენტში მითითებულია, რომ “ტელეგრამთან“ დაკავშირებით საფრანგეთის მიერ საიდუმლოდ ჩატარებული გამოძიება იმაზე უფრო ვრცელია და იმაზე უფრო ადრე დაიწყო, ვიდრე აქამდე ცნობილი იყო.
“უკრაინსკაია პრავდა“-ს ინფორმაციით, პაველ დუროვი 2014 წლიდან 2021 წლამდე რუსეთში ფარულად 60-ზე მეტჯერ იმყოფებოდა.
კერძოდ, 2020 წლის 18 ივნისს, როდესაც რუსეთმა თითქოს დაასრულა Telegram-ის აკრძალვა.
აღსანიშნავია, რომ თავად მილიარდერის განცხადებით, მას შემდეგ, რაც რუსეთი დატოვა, თავის სამშობლოში არცერთხელ არ ყოფილა და შესაბამისად, არც რუსეთის ხელისუფლებასთან ჰქონია რაიმე სახის შეხება. თუმცა, საგამოძიებო სტატიაში მოყვანილი ფაქტები საწინააღმდეგოს ამტკიცებს.
“დუროვი მალავდა რუსეთში ვიზიტებს 2015-2021 წლებში.
მონაცემები მოიცავს:
24 შესვლა და გასვლა 2015 წელს (25 მაისიდან 28 დეკემბრის ჩათვლით); 2017 წლის 26 დეკემბერს, ქ. პეტერბურგიდან ფინეთში, კერძოდ, ჰელსინკში მატარებლით გამგზავრება,“ - მოყვანილია სტატიაში აღნიშნული და კიდევ უამრავი სხვა ფაქტი.
იხილეთ ასევე: