უკრაინელებმა ბელგოროდის ოლქში შეჭრა სცადეს; როსტოვის ოლქში კიდევ ერთი ნავთობბაზა იწვის... - რა ხდება ომში რუსეთის ტერიტორიაზე?
ომის რუსეთის ტერიტორიაზე გადატანის შემდეგ, სულ უფრო მეტი აფეთქების შესახებ ხდება ცნობილი.
ოთხშაბათს ღამით, უკრაინის შეიარაღებული ძალები თავს დაესხნენ ნავთობის კიდევ ერთ საცავს როსტოვის რეგიონში - როსრეზერვის ატლასის ქარხანას. ბაზას ცეცხლი უკიდია ისევე, როგორც ნავთობის საცავს როსტოვის ოლქის მეორე ბოლოში - პროლეტარსკში, რომელიც მეათე დღეა იწვის.
როსტოვის ოლქის გუბერნატორის, ვასილი გოლუბევის ცნობით, ხანძარს ნავთობბაზაზე, წინ უსწრებდა ოლქში 4 უკრაინული დრონის ჩამოგდება.
როგორც ადგილობრივი მედია იუწყება, ხანძრის გაჩენასთან ერთად, მოქალაქეებმა კიდევ ერთი აფეთქების ხმა გაიგონეს.
ამასთანავე, ვორონეჟის ოლქის გუბერნატორი ალექსანდრ გუსევი "ტელეგრამში" წერს ორი დასახლებული პუნქტის ევაკუაციის შესახებ, მას შემდეგ, რაც "ფეთქებადსაშიშ ობიექტთან“ 2 დრონი ჩამოადგეს.
"უპილოტო საფრანი აპარატის ფრაგმენტებმა ფეთქებადსაშიში ობიექტის სიახლოვეს ხანძარი გააჩინა, აფეთქება არ ყოფილა", - წერს ის.
საინფორმაციო არხი ASTRA ადგილობრივებზე დაყრდნობით იუწყება, რომ უკრაინელებმა იერიში მიიტანეს ხუტორ მალაია-მეჟენკაში არსებულ საბრძოლო მასალების საწყობზეც.
შეგახსენებთ, მიმდინარე კვირაში რუსეთმა მასირებული იერიში მიიტანა უკრაინის 15 რეგიონზე. თავსხმას მოჰყვა მსხვერპლი, დაზიანდა ენერგეტიკული ინფრასტრუქტურა.
"ჩვენი ენერგეტიკული სექტორის განადგურების სურვილი რუსებს მათი ინფრასტრუქტურისთვის ძვირად დაუჯდებათ", - დაწერა ორშაბათს უკრაინის პრეზიდენტის ოფისის ხელმძღვანელმა ანდრეი ერმაკმა.
უკრაინის პრეზიდენტმა ვოლოდიმირ ზელენსკიმ პრესკონფერენციაზე განაცხადა, რომ უკრაინის არმიამ გამოიყენა დასავლეთის მიერ მოწოდებული F-16 გამანადგურებელი თვითმფრინავები ორშაბათს, ომის დაწყებიდან ყველაზე საშინელი რუსული თავდასხმის მოსაგერიებლად.
ზელენსკიმ ასევე განაცხადა, რომ კიევს აქვს რუსეთთან ომში უკრაინის გამარჯვების გეგმა და უკრაინის შეიარაღებული ძალების შეტევა კურსკის რეგიონში ამ გეგმის ერთ-ერთი პუნქტია.
უკრაინის შეიარაღებული ძალების მთავარსარდალმა ალექსანდრე სირსკიმ განაცხადა, რომ კურსკის რეგიონში ჩატარებული ოპერაციის დროს უკრაინელმა სამხედროებმა ტყვედ აიყვანეს 594 რუსი ჯარისკაცი.
მისი თქმით, უკრაინის შეიარაღებული ძალების კონტროლის ქვეშ არის 1294 კვადრატული კილომეტრი რუსეთის ტერიტორია და მასზე მდებარე 100 დასახლება.
ბელგოროდის ოლქის გუბერნატორმა ვიაჩესლავ გლადკოვმა განაცხადა უკრაინის შეიარაღებული ძალების მიერ საზღვრის გარღვევის მცდელობის შესახებ, სადაც ვითარება, მისი თქმით, რჩება "რთული, მაგრამ კონტროლირებადი".
უკრაინის პრეზიდენტმა ვოლოდიმირ ზელენსკიმ 27 აგვისტოს გამართულ პრესკონფერენციაზე განაცხადა, რომ უკრაინამ წარმატებით გამოცადა ახალი ბალისტიკური რაკეტა. მას დაწვრილებით არ უსაუბრია და თქვა, რომ დეტალებს ვერ გაამჟღავნებს.
უკრაინის პრეზიდენტის სიტყვებით, ახალი რაკეტა პირველია ქვეყანაში. მან თქვა, რომ არ იყო დარწმუნებული, გამოექვეყნებინა თუ არა ინფორმაცია გამოცდის შესახებ.
"ვფიქრობდი, რომ ამაზე საუბარი ნაადრევია, მაგრამ მინდოდა, საზოგადოებას შეეფასებინა ის ადამიანები, რომლებიც 24/7 რეჟიმში მუშაობენ თავდაცვით საწარმოებში,“ - თქვა მან.
ატომური ენერგიის საერთაშორისო სააგენტოს ხელმძღვანელმა, რაფაელ გროსმა განაცხადა, რომ კურსკის ატომურ ელექტროსადგურზე ბირთვული ავარიის საფრთხე არსებობს.
"გაჩნდა ბირთვული ავარიის საფრთხე ან შესაძლებლობა“, - განუცხადა გროსიმ ჟურნალისტებს ელექტროსადგურის მონახულების შემდეგ.
მისი თქმით, კურსკის ქარხნის ატომურ რეაქტორს, ბირთვული ობიექტების უმეტესობისგან განსხვავებით, არ აქვს დამცავი გუმბათი, რაც მის ბირთვს ძალიან დაუცველს ხდის საარტილერიო ან დრონით დარტყმების მიმართ.
"ბირთვული მასალის შემცველი რეაქტორის ბირთვი დაცულია მხოლოდ ჩვეულებრივი ხუფით. ეს მას უკიდურესად დაუცველს და მყიფეს ხდის, მაგალითად, საარტილერიო დარტყმის, დრონის, ან რაკეტის მიმართ“, - აღნიშნა გროსიმ.
მისი თქმით, ბირთვული ავარიის დაშვება არ შეიძლება.
"ბირთვული ავარია არ შეიძლება მოხდეს. ჩვენი პასუხისმგებლობაა, ეს უზრუნველვყოთ“, - განაცხადა გროსიმ პრესკონფერენციაზე და დასძინა, რომ ატომური ენერგიის საერთაშორისო სააგენტო რუსეთ-უკრაინის ომში ვერცერთის მხარეს ვერ დაიჭერს.
იხილეთ ასევე: