"უკვე გამოვაცხადეთ პარტიზანული მოძრაობა რუსეთის ტერიტორიაზე" - რა ხდება კურსკში და როგორია "კავკასიური კავშირის" როლი ამ პროცესებში: რას გვიყვება ლადო გამსახურდია?
"კურსკის მიმართულებით ბრძოლა და ტერიტორიების წმენდა გრძელდება. იქ ახლა უკრაინული სპეცსამსახურები მუშაობენ... ჩვენი ამოცანა სუჯაში ჩასვლა და რუსეთის ტერიტორიაზე პარტიზანული მოძრაობის დაწყება იყო“, - ამბობს "კავკასიური კავშირის“ სამხედრო კომიტეტის ხელმძღვანელი, ლადო გამსახურდია, რომელიც AMBEBI.GE-ს ექსკლუზიურად ესაუბრა:
- კურსკის ოლქის გათავისუფლებულ ოლქებში იწყება სამხედრო კონტოლი და ადმინისტრაციების ჩამოყალიბება.
"კავაკსიური კავშირის“ სამხედრო კომიტეტი, უკრაინის სპეცსამსახურებთან ერთად სწორედ ამ პროცესშია ჩართული. ჩვენ უკვე გამოვაცხადეთ პარტიზანული მოძრაობა რუსეთის ტერიტორიაზე. უკრაინელების, ასევე რუსეთში მყოფი მცირე ერების წარმომადგენლების ჩართულობით, შევქმენით სპეციალური ვებგვერდები, რომლის საშუალებითაც რუსეთში მყოფი პარტიზანები და მოხალისეები შეძლებენ ჩვენთან დაკავშირებას. მათ ყველა საჭირო რესურსი მიეწოდებათ იმისათვის, რომ ებრძოლონ რუსეთის ტერორისტულ მთავრობას და გაათავისუფლონ თავიანთი მიწები კრემლის ტერორისგან. ამ ორგანიზაციას ეწოდება "პარტიზანსკი რუხ“. ადგილობრივი მოსახლეობის მონაწილეობით იქმნება შტაბები, პატარ-პატარა პოლიტიკური პარტიები, ორგანიზაციები და შემდეგ უკვე დემილიტარიზებული რეგიონები გადავა ცხოვრების ჩვეულ, ცივილიზებულ რეჟიშმი. მათ უკვე აქვთ გერბი და დროშა. მათთან მუშაობენ კოალიციის წევრები: ჩუვაშები, ნოღაელები და ა.შ.
- ამ კოალიციის წევრებს ახლა დაუკავშირდით თუ ადრეც გქონდათ კონტაქტები?
- ამ ხალხთან უკვე ორია წელია ვმუშაობთ, ჩვენთან - "კავკასიურ კავშირთან“ მემორანდუმი აქვთ გაფორმებული. ამ კოალიციას თავიანთი წარმომადგენლები ჰყავთ უკრაინაში და მსოფლიოს სხვადასხვა ქვეყნებში, მათ შორის რუსეთშიც. როგორც გათავისუფლდება ტერიტორიები, ისინი მაშინვე, უკრაინის სამხედრო ადმინისტრაციასთან ერთად, მზად არიან შექმნან პოლიტიკური პარტიები, სხვა შესაბამისი ორგანიზაციები და დაიწყონ ფუნქციონირება დამოუკიდებლად.
აი, ეს პროცესები მიმდინარეობს ახლა კურსკში და ამის გამო ვიყავით იქ "კავკასიური კავშირის“ სამხედრო კომიტეტიც და "კავკასიური ლეგიონიც“.
- "კავკასიურმა კავშირმაც“ მიიღო მონაწილეობა კურსკის შეტევაში?
- "კავკასიურ კავშირში“ შემავალი 14 ქვედანაყოფიდან, 6 ქვედანაყოფი დღესაც იბრძვის კურსკში. მათ შორის არის საქართველოში ყველასთვის ცნობილი და საყვარელი შეიხ მანსურის ბატალიონი.
- "კავკასიური კავშირის“ შესახებ რას გვეტყვით, რა ტიპის ორგანიზაციაა?
- "კავკასიური კავშირი“ არის ბრიუსელში დარეგისტრირებული 6 პოლიტიკური ორგანიზაციის ერთობა - მთელი კავკასიიდან. ჩვენთან არიან: ქართველები, ჩეჩნები, დაღესტანელები, აზერბაიჯანელები, ჩერქეზები და ნოღაები. ოფისი გვაქვს კიევში - "კავაკსიური კავშირის ინფორმაციისა და პოლიტიკის ცენტრი“, საიდანაც წყდება პოლიტიკური და სამხედრო საკითხები. სამხედრო კომიტეტს მე ვხელმძღვანელობ, როგორც უკვე გითხარით, 14 საბრძოლო ქვედანაყოფი გვყავს და აქედან 6 ქვედანაყოფი კურსკის მოვლენებში უშუალოდ მონაწილეობდა. დანარჩენი 8 ქვედანაყოფიც თავის ძალიან მნიშვნელოვან მისიას ასრულებს ამ ომში. ყველაზე მნიშვნელოვანი რისი თქმაც მინდა, ის არის, რომ ჩვენს შორის გაფორმებული მომერანდუმის თანახმად, ღმერთმა დაიფაროს, მაგრამ თუ ოდესმე საჭირო გახდა, 14 უძლიერესი, ბრძოლაში გამოწრთობილი ქვედანაყოფი საჭიროების შემთხვევაში საქართველოს დამოუკიდებლობის და თავისუფლების სადარაჯოზე დადგება. მადლობა უფალს, უკრაინაში ოკუპანტი რუსეთის დამარცხების პარალელურად, ქართველები ძალიან მაგარ მეგობრებს ვიძენთ.
- ამ 14 ქვედანაყოფის მასშტაბები და საბრძოლო შესაძლებლობები როგორია?
- ზოგიერთ ქვედანაყოფებს სხვებზე მეტი საბრძოლო გამოცდილება, ზოგს კი სხვებზე მეტი შეიარაღება აქვს, მაგალითად, შეიხა მანსურის ბატალიონს შეიარაღებაში ვერტმფრენებიც ჰყავს. ამასთანავე, ისინი უკრაინაში 2014 წლიდან იბრძვიან. არიან სპეციფიური ჯგუფები, რომლებიც დრონებით და სხვა თანამედროვე ტექნოლოგიებით არიან აღჭურვილები. არიან პარტიზანული ჯგუფები, რომლებიც მტრის ზურგში შედიან და დივერსიებს აწყობენ. გვყავს როგორც თავდაცვითი, ასევე მოიერიშე ჯგუფები (ძირითადად, ქართველები), სპეცჯგუფები, საარტილერიო ჯგუფები და ა.შ. ომს რაც ჭირდება, ჩვენ ყველანაირი ჯგუფი გვყავს. სხვათა შორის, ჩვენთან არის დიმიტრი კაჩინსკი - თავის დროზე აფხაზეთის ომში მებრძოლი უკრაინული ბატალიონის "უნა უსოს“ დამფუძნებელი. გარდა იმისა, რომ ბატონი დიმიტრი არის პოლიტიკოსი, "ქრისტიანული პარტიის“ დამფუძნებელი, ასევე ხელმძღვანელობს უკრაინის სადაზვერვო ქვედანაყოფს - "ძმობას“. ამ ბატალიონს ძალიან მნიშვნელოვანი ოპერაციები აქვს შესრულებული ყირიმის მიმართულებით.
თქვენ ალბათ, გაგებული გაქვთ შავ ზღვაში ნავთობის ჭაბურღილების ოპერაციის შესახებ. ეს სწორედ ამ ბიჭების დამსახურებაა...
- უკრაინის ხელისუფლებისგან თუ გაქვთ მხარდაჭერა?
- რა თქმა უნდა, ჩვენ ვთანამშრომლობთ უკრაინის პრეზიდენტის ოფისთან, ასევე უკრაინის შეიარაღებული ძალების გენშტაბთან, ვერხონვი რადას პარლამენტთან, სპეციალურ სამსახურებთან. თითოეულ უწყებასთან იმის მიხედვით ვთანამშრომლობთ, თუ რა სახის ამოცანა გვაქვს შესასრულებელი - დიპლომატიური, პოლიტიკური თუ სამხედრო შინაარსის.
- გუშინ რუსეთის ფედერაციამ მასობრივი საჰაერო თავდასხმა განხორციელა, რის შედეგადაც უკრაინის 15 ოლქი დაზარალდა, არიან დაშავებულები და დახოცილები. რუსები ამბობენ, რომ ეს არის პუტინის შურისძიება კურსკისთვის. როგორ ფიქრობთ, კრემლის აგრესიული პასუხი რა გავლენას იქონიებს უკრაინულ შეტევაზე კურსკში?
- აღარ იციან რა ქნან, უკვე ხვდებიან, რომ ომი წაგებული აქვთ და აგონიაში მყოფები აღარავის ინდობენ. არ გვიკვირს, რომ რუსი ტერორისტები მშვიდობიან მოსახლეობას ბომბავენ, ორ წელზე მეტია ამას აკეთებენ, მაგრამ ამის გამო უკრაინელ გმირ ხალხს ბრძოლის გაგრძელებაზე უარი არ უთქვამს. უკრაინა გაიმარჯვებს ვოლოდიმირ ზელენსკის მეთაურობით! საქართველოს აქვს ისტორიული შანსი, გაიმარჯვოს მტერზე, უკრაინასთან ერთად! თუ დღეს არ ვიბრძოლებთ, ტვირთი გადავა ჩვენი შვილების მხრებზე. როგორც ჯოხარ დუდაევმა თქვა, მამების შიში შვილების მონობაში გადაიზრდება!
იხილეთ ასევე: