ტრაგედია მერაია ქერის ოჯახში - მომღერლის და დედა ერთ დღეს გარდაიცვალნენ: რას ამბობს ვარსკვლავი

მერაია ქერიმ დაადასტურა, რომ გასულ უქმეებზე მისი და ელისონი და დედა - პატრიცია, ერთ დღეს გარდაიცვალნენ. რა გახდა ვარსკვლავის ოჯახის წევრების დაღუპვის მიზეზი, უცნობია, ამ თემაზე ქერის ლაპარაკი არ სურს.

"გული დამწყდა, რომ დედა დავკარგე. სამწუხაროდ, ტრაგიკული დამთხვევის შედეგად ჩემი დაც დაიღუპა“, - განაცხადა 55 წლის მომღერალმა.

პატრიციას სიცოცხლის ბოლო დღეებში მომღერალი მის გვერდით იყო. "ბედნიერად ვგრძნობ თავს, რომ შევძელი დედასთან გამეტარებინა ბოლო კვირა, ვიდრე ის გარდაიცვლებოდა. ვაფასებ ყველას სიყვარულს, მხარდაჭერას და პატივისცემას ჩემი კონფიდენციალურობისადმი ამ რთულ პერიოდში”, - დასძინა ქერიმ.

ელისონს რთული ურთიერთობა ჰქონდა დედასთან და დასთან. მერაია მასთან 1991 წლიდან არ ურთიერთობდა. 2020 წელს ელისონმა დედას უჩივლა, რომ პატრიცია სექსუალურ ორგიებში იყო ჩართული და შვილსაც აიძულებდა.

"ძნელი დასაჯერებელია, მაგრამ იმდენი მოგონება მაქვს, რომ მინდა დავივიწყო. უკეთესი იქნებოდა, საერთოდ არ მქონდეს. დედა ღამით მაღვიძებდა და მივყავდი ძველ ციხე-დარბაზში, რომელიც ახლოს იყო იმ ეკლესიიდან, სადაც ჩვენ წირვას ვესწრებოდით. ეს ადგილი ჯერ კიდევ იქ არის, შემიძლია გაჩვენოთ“, - თქვა ელისონმა 2018 წელს.

ბავშვობაში გოგონა დარწმუნებული იყო, რომ დას იცავდა. "საშინელი რამ ხდებოდა იქ - ის, რაც ბავშვმა არასოდეს უნდა ნახოს. სექსუალურად ძალადობდნენ ჩემზე, მეუბნებოდნენ, ამას თუ არ გავაკეთებდი, ისინი ტკივილს მიაყენებდნენ მერაიას“, - იხსენებდა ელისონი.

სარჩელში მომღერლის დამ ასევე აღნიშნა, რომ მას დეპრესია და პოსტტრავმული აშლილობა აწუხებდა. 15 წლის ასაკში სახლიდან გაიქცა, მოგვიანებით ნარკომანი გახდა, პროსტიტუციაში ჩაერთო და აივ ინფექციით დაინფიცირდა.

ცნობილია, რომ სამი წლის წინ მერაიამ დედა მოხუცთა თავშესაფარში გაგზავნა და მისი დის კუთვნილი ქონება გაყიდა.