"რუსეთის თავდასხმამდე 5 დღით ადრე შევხვდი ზელენსკის და..." - რა თქვა კამალა ჰარისმა ყრილობაზე და რას გეგმავს გამარჯვების შემთხვევაში
აშშ-ის ვიცე-პრეზიდენტმა კამალა ჰარისმა “დემოკრატიული პარტიის“ ეროვნული ყრილობის მეოთხე დღეს პარტიის საპრეზიდენტო კანდიდატობა ოფიციალურად მიიღო. ყრილობაზე მან პირობა დადო, რომ ყველა ამერიკელის პრეზიდენტი იქნება.
“ვიცი, რომ სხვადასხვა პოლიტიკური შეხედულების ადამიანი გვიყურებს და მინდა იცოდეთ: გპირდებით, ვიქნები ყველა ამერიკელის პრეზიდენტი. ყოველთვის შეგიძლიათ მერწმუნოთ, რომ ქვეყანას და პარტიას საკუთარ თავზე მაღლა დავაყენებ“, - აღნიშნა ჰარისმა.
მისი თქმით, იქნება პრეზიდენტი, რომელიც არის რეალისტი, პრაქტიკული და აქვს საღი აზრი.
“იმისთვის რომ შევინარჩუნო ამერიკის წმინდა ფუნდამენტური პრინციპები კანონის უზენაესობიდან თავისუფალ და სამართლიან არჩევნებამდე, ძალაუფლების მშვიდობიან გადაცემამდე, მე ვიქნები პრეზიდენტი, რომელიც გვაერთიანებს ჩვენი უმაღლესი მისწრაფებების გარშემო. პრეზიდენტი, რომელიც ხელმძღვანელობს და უსმენს, რომელიც არის რეალისტი, პრაქტიკული და აქვს საღი აზრი და ყოველთვის იბრძვის ამერიკელი ხალხისთვის“, - აღნიშნა კამალა ჰარისმა.
- ჰარისს არც მისი მთავარი პოლიტიკური კონკურენტი დავიწყებია. მისი თქმით, “დონალდ ტრამპი არასერიოზული ადამიანია, მაგრამ თეთრ სახლში მისი დაბრუნების შედეგები უკიდურესად სერიოზული იქნება“.
”ბევრი თვალსაზრისით, დონალდ ტრამპი არასერიოზული ადამიანია, მაგრამ დონალდ ტრამპის თეთრ სახლში დაბრუნების შედეგები უკიდურესად სერიოზული იქნება”, - ჰარისის თქმით, ტრამპმა ეჭვქვეშ დააყენა არჩევნების შედეგები 2020 წელს, როდესაც წააგო.
“დონალდ ტრამპი ცდილობდა, თქვენი ხმები მოესროლა, როდესაც ვერ შეძლო, შეიარაღებული ბრბო გაგზავნა შეერთებული შტატების კაპიტოლიუმში, სადაც თავს დაესხნენ სამართალდამცავებს,”- აღნიშნა მან და ასევე ხაზი გაუსვა, რომ ტრამპი ნასამართლევია 34 დანაშაულის მუხლით.
”ის თაღლითობაში დამნაშავედ ცნეს ნაფიცმა მსაჯულებმა და ასევე პასუხისმგებლობა დააკისრეს სექსუალური ძალადობისთვის,” - აღნიშნა ჰარისმა. მისი თქმით, ტრამპი ქვეყანას სახიფათო პოლიტიკის გზაზე დააბრუნებს, თუ მას თეთრ სახლში კიდევ ერთი ვადით აირჩევენ.
”უბრალოდ წარმოიდგინეთ დონალდ ტრამპი დამცავი რელსების გარეშე. იფიქრეთ იმაზე, თუ რას გააკეთებს ის, თუ კვლავ მივცემთ ძალაუფლებას. იფიქრეთ მის აშკარა განზრახვაზე, გაათავისუფლოს მოძალადე ექსტრემისტები, რომლებიც თავს დაესხნენ სამართალდამცავებს კაპიტოლიუმში, მის აშკარა განზრახვაზე, დააპატიმროს ჟურნალისტები, პოლიტიკური ოპონენტები და ყველა, ვისაც მტრად მიიჩნევს, მის აშკარა განზრახვაზე, განათავსოს ჩვენი აქტიური სამხედრო ჯარი ჩვენივე მოქალაქეების წინააღმდეგ. მაგრამ ამერიკა, ჩვენ უკან არ დავბრუნდებით”, აღნიშნა ჰარისმა.
რაც შეეხება საგარეო სტრატეგიას - კამალა ჰარისის თქმით, როგორც პრეზიდენტი, მტკიცედ დაუჭერს მხარს უკრაინას. დაიცავს ისრაელის უფლებასაც - დაიცვას საკუთარი თავი
-
“ხუთი დღით ადრე, სანამ რუსეთი უკრაინას თავს დაესხმოდა, შევხვდი პრეზიდენტ ვოლოდიმირ ზელენსკის, რათა რუსეთის შეჭრის გეგმების შესახებ გამეფრთხილებინა,“ - გაიხსენა ჰარისმა.
“ხელი შევუწყვე გლობალური პასუხის - 50-ზე მეტი ქვეყნის - მობილიზებას პუტინის აგრესიისგან დასაცავად და როგორც პრეზიდენტი, მე მტკიცედ დავუჭერ მხარს უკრაინას და ჩვენს ნატო-ელ მოკავშირეებს“, - აღნიშნა ჰარისმა.
მან ღაზას სექტორში მიმდინარე ომზეც ისაუბრა და აღნიშნა, რომ პრეზიდენტ ჯო ბაიდენთან ერთად 24 საათის განმავლობაში მუშაობს, რადგან ახლა არის დრო, რომ მოხდეს მძევლების გათავისუფლებასა და ცეცხლის შეწყვეტასთან დაკავშირებით შეთანხმების მიღწევა.
“ნება მომეცით მკაფიოდ განვაცხადო: ყოველთვის დავიცავ ისრაელის უფლებას დაიცვას საკუთარი თავი და ყოველთვის უზრუნველვყოფ, რომ ისრაელს ჰქონდეს საკუთარი თავის დაცვის უნარი. იმიტომ, რომ ისრაელის მოსახლეობა აღარასოდეს უნდა აღმოჩნდეს იმ საშინელების წინაშე, რომელიც ტერორისტულმა ორგანიზაციამ “ჰამასმა“ 7 ოქტომბერს გამოიწვია“, - აღნიშნა ჰარისმა.
ამასთან, მისი თქმით, დამანგრეველია ის, რაც ბოლო 10 თვის განმავლობაში ღაზაში მოხდა.
“რამდენი უდანაშაულო სიცოცხლე დაიკარგა. სასოწარკვეთილი, მშიერი ადამიანები, რომლებიც გარბიან უსაფრთხოებისთვის. ტანჯვის მასშტაბები გულსატკენია. პრეზიდენტი ბაიდენი და მე ვმუშაობთ ამ ომის დასასრულებლად ისე, რომ ისრაელი იყოს დაცული, მძევლები გაათავისუფლონ, დასრულდეს ტანჯვა ღაზაში და პალესტინელმა ხალხმა შეძლოს, ისარგებლოს ღირსების უფლებით, უსაფრთხოებით და თავისუფლებით“, - აღნიშნა კამალა ჰარისმა.
ჰარისის სიტყვით გამოსვლას უკვე გამოეხმაურა დონალდ ტრამპი და განაცხადა, რომ “კამალა ჰარისს არ აქვს წარმატება, მას კი - აქვს.“
“ყველაზე დიდი რეაქცია ის არის, რატომ არ გააკეთა ის, რასაც უჩივის? ყველაფერი, რაზეც მან ისაუბრა, რომ აპირებენ გაკეთებას, არის ის, რისი გაკეთებაც მას შეეძლო სამწელიწადნახევრის წინ. მას დარჩა ოთხთვენახევარი, თუ ხუთი თვე. მას შეუძლია ახლავე წავიდეს იქ და გააკეთოს ყველაფერი, რაზეც საუბრობს და ჩივის, ”- განუცხადა დონალდ ტრამპმა Fox News-ს.
იხილეთ ასევე:
- კამალა ჰარისის მეუღლე პირველი ქორწინებისას, ძიძასთან ცოლის ღალატში ამხილეს - დუგლას ემჰოფმა მომხდარი აღიარა, რას აცხადებს მისი პირველი ცოლი?
- "იქცევა თუ არა კამალა ჰარისი მართლაც "ტრამპის რისხვად"? - ბრძოლა დაიწყო: ყველაფერი ექსპროკურორზე, რომელსაც აქვს შანსი აშშ-ის ისტორიაში პირველი ქალი პრეზიდენტი გახდეს