"ვერ მოვითმინე და ახლაც ასეთი მომენტი რომ იყოს, ანალოგიურად... არ შეიძლება, მაგრამ..." - რას ამბობს თუშიშვილი რინერთან დაპირისპირებაზე და ვის უხდის ბოდიშს?
3 აგვისტოს, პარიზის ოლიმპიადაზე ქართველ და ფრანგ ძიუდოისტებს შორის მომხდარ ინციდენტზე მსოფლიო მედია წერდა. ქართველი გურამ თუშიშვილისა და ფრანგი ტედი რინერის ბრძოლას ხმაურის გარეშე არ ჩაუვლია. ტურნირის მეოთხედფინალში თუშიშვილი ლეგენდარულ ფრანგ ძიუდოისტთან ტედი რინერთან დამარცხდა, რის შემდეგაც ტედის პროვოკაციულმა ჟესტმა გურამი ააღელვა. თუშიშვილს მსაჯმა ჰანსოკუ-მაკეც აჩვენა. შედეგად, თუშიშვილი ოლიმპიადას გამოეთიშა.
საბოლოოდ, პარიზის 2024-ზე ძიუდოისტთა ინდივიდუალური შეჯიბრის ბოლო ბრძოლაში ტედი რინერმა კარიერაში მესამე ოლიმპიური ოქრო მოიპოვა. ფინალში რინერი კორეის რესპუბლიკის წარმომადგენელს, კიმ მინჯონგს დაუპირისპირდა და 35 წლის ათლეტმა შეხვედრა იპონით მოიგო. რინერი მსოფლიო ჩემპიონატის 11-ჯერ და ოლიმპიადის 3-ჯერ მოგების შემდეგ, შეიძლება ითქვას, რომ ყველა დროის საუკეთესო ძიუდოისტია, რომლის თქმითაც, ის აქტიურ სპორტს ამ ოლიმპიადის შემდეგ ანებებს თავს.
მაშინ ფრანგული მედია წერდა, რომ თუშიშვილს ამბიციებმა სძლია.
+100 კგ წონით კატეგორიაში ტედი რინერსა და გურამ თუშიშვილს შორის მეოთხედფინალის ბოლოს მომხდარ ინციდენტს გამოეხმაურა ძიუდოს საერთაშორისო ფედერაციის დისციპლინური კომისიაც, რომლის შეფასებითაც, ქართველი ძიუდოისტის ქცევა ეწინააღმდეგებოდა ძიუდოს სულისკვეთებას.
შედეგად თუშიშვილს, ძიუდოს ნებისმიერ საერთაშორისო შეჯიბრში მონაწილეობა აეკრძალა მანამ, ვიდრე ძიუდოს საერთაშორისო ფედერაციის დისციპლინური კომისია საბოლოო გადაწყვეტილებას არ მიიღებს.
სპორტსმენი ახლახანს გამოქვეყნებულ ვიდეოში ამბობს, რომ არ ნანობს, თუმცა გულშემატკივრებს და სამწვრთნელო შტაბს, ასევე ფედერაციას ბოდიშს უხდის...
"რაც შეეხება ტედი რინერთან დაპირისპირებას, ჩემი ემოციები ცოტა გაუგებარი იყო საზოგადოებისთვის. მინდა, ბოდიში მოვუხადო ჩემს გულშემატკივარს, ვინც მქომაგობდა და ჩემზე იმედებს ამყარებდა, როგორც უბრალოდ, გულშემატკივარი.
მინდა ასევე ჩვენს სამწვრთნელო შტაბს, ფედერაციას მოვუხადო ბოდიში, მაგრამ არის მომენტები, როდესაც სპორტსმენისთვის ხდება ისეთი რაღაცები, რაც მიუღებელია. სპორტსმენი არ უნდა შეეხოს არცერთი სპორტსმენის თავმოყვარეობას. მე მისგან, უბრალოდ, ეგ ვიგრძენი.
დამარცხებული ვიყავი, მაგის გამო არ გამომიხატია. უბრალოდ, მან დამამცირებელი ჟესტებით გამოხატა ეს სიხარული, როდესაც შეეძლო, უბრალოდ, ამდგარიყო, თავის გულშემატკივართან და თავის ქვეყანაში გამოეხატა ეს სიხარული და ბედნიერება. მან ეს ცინიკურად მარტო ჩემთან გამოხატა.
ვერ მოვითმინე და ახლაც ასეთი მომენტი რომ იყოს, ანალოგიურად... არ შეიძლება, მაგრამ..."
იხილეთ ასევე:
- ტედი რინერის პროვოკაციული ჟესტი ფოტოებში - რამ გააღიზიანა გურამ თუშიშვილი და როგორია გამოხმაურებები სკანდალურ მეოთხედფინალზე
- ტედი რინერი გორში: რას ჰყვებოდა წლების წინ თუშიშვილზე, გუჯეჯიანსა და ლაშა ბექაურზე - "საქართველოში საოცარი ხალხი ცხოვრობს... ზაზა კედელაშვილი ჩემი მენტორი იყო"