უკრაინელთა შეჭრისას შსს-ს, FSB-ს და თავდაცვის უწყების შეუთანხმებელ მოქმედებებში რუს გენერალს ადანაშაულებენ - ვინ არის ლაპინი, რომელიც პასუხს აგებდა კურსკის დაცვაზე?
რუსმა გენერალ-პოლკოვნიკმა ალექსანდრე ლაპინმა, რომელიც კურსკის ოლქის უსაფრთხოებას კურირებდა, უკრაინის ოპერაციამდე რამდენიმე თვით ადრე დაშალა საბჭო, რომელიც პასუხისმგებელი იყო რისკის შემცველი სასაზღვრო რეგიონის დაცვაზე - ამის შესახებ The Wall Street Journal-ი იუწყება.
როგორც ირკვევა, 2024 წლის გაზაფხულზე, ალექსანდრე ლაპინმა დაითხოვა კურსკის ოლქის თავდაცვის უწყებათაშორისი საბჭო, რაც დაეხმარა უკრაინის შეიარაღებულ ძალებს რეგიონში თითქმის შეუფერხებლად შესვლაში.
გამოცემის წყაროს - რუსული დაზვერვის ოფიციალური პირის თქმით, "ამ გაზაფხულზე მოსკოვის მიერ დანიშნული გენერალ-პოლკოვნიკი ალექსანდრე ლაპინი აცხადებდა, რომ მხოლოდ სამხედროებს აქვთ ძალა და რესურსები რუსეთის საზღვრის დასაცავად. ამ გეგმამ კიდევ ერთი ხარვეზი დაამატა რუსეთის საზღვრის ისედაც სუსტ თავდაცვაში, რომელიც მაშინვე ჩამოიშალა, როცა უკრაინელმა ჯარებმა ელვისებური შეტევა დაიწყეს კურსკში".
უწყებათაშორისი საბჭო იყო სპეციალური ორგანო, რომელიც აერთიანებდა სამხედრო და ადგილობრივ შსს-სა და უშიშროების წარმომადგენლებს.
საბჭოს გაუქმების გადაწყვეტილებამ გამოიწვია უკრაინის ჯარების შეტევის დროს რუსეთის უშიშროებისა და თავდაცვის ძალების ქმედებებში კოორდინაციის ნაკლებობა.
"შინაგან საქმეთა სამინისტრომ, FSB-მ და თავდაცვის სამინისტრომ ვერ გადაწყვიტეს, ვინ იქნება პასუხისმგებელი თავდასხმის მოგერიების ოპერაციაზე", - ამბობს წყარო.
გამოცემა წერს, რომ ლაპინმა იცოდა, რომ უკრაინული ჯარების რიცხვი იზრდებოდა რუსეთის საზღვრებთან და მოსკოვშიც გაგზავნა ამის თაობაზე ცნობები, მაგრამ ხელისუფლებამ არავითარი ზომები არ მიიღო და უკრაინული სამხედრო მანევრები ფსიქოლოგიური ომის ტაქტიკად აღიქვა.
"ეს არ იყო პირველი შემთხვევა, როდესაც ცუდი დაგეგმვა და ადამიანური ძალის ნაკლებობა ლაპინის მეთაურობის ქვეშ გაერთიანდა", - წერს გაზეთი.
კერძოდ, 2022 წლის სექტემბრის დასაწყისში სწორედ ის ხელმძღვანელობდა რუსეთის ჯარების ჯგუფს ხარკოვის რეგიონში, როდესაც უკრაინულმა ჯარებმა სწრაფად გაარღვიეს რუსული თავდაცვა და რამდენიმე დღეში გაათავისუფლეს თითქმის მთელი რეგიონი.
WSJ აღნიშნავს, რომ უცნობია, დაეხმარებოდა თუ არა ლაპინის მიერ დაშლილი უწყებათაშორისი საბჭო (რომელშიც შედიოდნენ სამხედრო ოფიცრები და ადგილობრივი და რეგიონული უსაფრთხოების წარმომადგენლები) მოსკოვის მხრიდან კოორდინირებული პასუხის გაცემას, მაგრამ რეაგირებაზე პასუხისმგებელი ცენტრალიზებული ორგანოს გარეშე, მოსკოვის მცდელობები უკრაინული ძალების განდევნისთვის ჯერაც ქაოტური და არაეფექტურია.
გამოცემა წერს, - რა თქმა უნდა, ლაპინს მიზანმიმართულად არ გაუღია კარიბჭე მეორე მსოფლიო ომის შემდეგ, რუსეთის ტერიტორიაზე პირველი შეჭრისთვისო. "მიზეზი იყო ხალხის კრიტიკული დეფიციტი, ისევე როგორც შეცდომა, რაც ახასიათებს რუსეთის უმაღლეს ხელმძღვანელობას - ის ხშირად ვერ აცნობიერებს ბრძოლის ველზე არსებულ რეალობას".
-
რა არის ლაპინზე ცნობილი?
2022 წელს, უკრაინაში რუსეთის შეჭრის დროს, ლაპინი მეთაურობდა ცენტრალურ სამხედრო ოლქს/რუსული ჯარების ჯგუფს "ცენტრს“. ამ თანამდებობაზე ყოფნისას მან ჟუკოვის მედლით დააჯილდოვა საკუთარი შვილი, რომელიც მეთაურობდა წარუმატებელ შეტევას სუმსა და ჩერნიგოვზე.
2022 წლის 4 ივლისს, რუსეთის პრეზიდენტის ბრძანებულებით, ლაპინს მიენიჭა რუსეთის ფედერაციის გმირის წოდება.
ის "ცენტრის" მეთაურობიდან 2022 წლის ოქტომბერში გაათავისუფლეს, მას მერე, რაც მას რამზან კადიროვი დაუპირისპირდა. ოქტომბრის დასაწყისში კადიროვი ლიმანის დაკარგვაში სწორედ ლაპინს ადანაშაულებდა და მისი პასუხისმგებლობის საკითხს აყენებდა.
2022 წლისვე ოქტომბრის შუა რიცხვებში, ახლადმობილიზებული ქვედანაყოფის ერთ-ერთმა მეთაურმა, რომელმაც ლიმანთან ბრძანების გარეშე დაიხია უკან, თქვა, რომ ლაპინი, რომელიც ცდილობდა დაბომბვისგან გამოქცეული სამხედრო პერსონალი დაებრუნებინა თავიანთ პოზიციებზე, მათ მოკვლით დაემუქრა.
2023 წლის გაზაფხულზე მედიაში გამოჩნდა ინფორმაცია, რომ ლაპინი გაერთიანებული ძალების მეთაურის მოადგილედ დაინიშნა.
2024 წლის მარტში კი იგი დაინიშნეს ახლადშექმნილი ლენინგრადის სამხედრო ოლქის და ჩრდილოეთ ჯარების ჯგუფის მეთაურად.
ის სანქცირებულია გაერთიანებული სამეფოს, ევროკავშირის ყველა ქვეყნის, კანადის და აშშ-ის მიერ.
იხილეთ ასევე: