"დაუძახა, მიშველე, მომკლესო! გამოვიდა მეუღლე და ჩააკვდა ხელში..."- რას ჰყვება სამტრედიაში, სასტიკად მოკლული ქალის და (ვიდეო)

გუშინ ცნობილი გახდა სამტრედიაში მომხდარი სასტიკი მკვლელობის შესახებ.

შს სამინისტროს ინფორმაციით, იმერეთის პოლიციის დეპარტამენტის თანამშრომლებმა, განზრახ მკვლელობის ბრალდებით, 1988 წელს დაბადებული, წარსულში ნასამართლევი, გ.მ. დააკავეს.

გავრცელებული ინფორმაციით, ბრალდებული, მეზობლის სახლში, სავარაუდოდ, გასაძარცვად იყო შესული, რა დროსაც 1952 წელს დაბადებულმა ქალმა ის ამოიცნო. მამაკაცმა ნ.ხ.-ს ცივი იარაღით სასიკვდილო დაზიანებები მიაყენა და შემთხვევის ადგილიდან მიიმალა.

მომხდარზე მოკლულის ახლობლები “მთავარ არხთან“ საუბრობენ:

“დაუძახა, ავთო, მიშველე, მომკლეს, გამოდი გარეთო... გამოვიდა მეუღლე და ჩააკვდა ხელში“, - აცხადებს მოკლული ქალის და.

მისი თქმით, მის დას მეზობელმა ოჯახმა დროებით სახლის მეთვალყურეობა და ყოველ დილით შინაური ფრინველის დაპურება სთხოვა. სწორედ ამიტომ იყო ქალბატონი მეზობლის სახლში გადასული, სადაც ქურდი დახვდა.

მამაკაცმა ქალს სხეულის სხვადასხვა არეში, 4 სასიკვდილო ჭრილობა მიაყენა.

“მეზობლები იყვნენ დასასვენებლად წასულები და დაუტოვეს ოჯახი. გადავიდა დილით ექვს საათზე, რომ ქათმები დაპურებულები გამოეშვა. იქ ვინ დახვდა, რა დახვდა, ეს იცის ჩემმა მოკლულმა დამ. 4 ჭრილობა აქვს მიყენებული“, - აცხადებს გარდაცვლილის ოჯახის წევრი.

მეზობლების თქმით, მათ დილის საათებში ქალის კივილი გაიგეს. როდესაც გარეთ გავიდნენ, ადგილზე პოლიცია უკვე მისული იყო.

განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს. დანაშაული 10-დან 15 წლამდე ვადით თავისუფლების აღკვეთას ითვალისწინებს.