რამდენიმე დღის წინ ცნობილი გახდა, რომ უცხოელებს, რომლებიც დასავლურ ღირებულებებს ეწინააღმდეგებიან, რუსეთი დროებითი ბინადრობის ნებართვის მოპოვებაში დაეხმარება. ინფორმაცია ამის თაობაზე, რუსეთის სახელმწიფო საინფორმაციო სააგენტო TASS-მა რუსეთის პრეზიდენტის, ვლადიმერ პუტინის მიერ ხელმოწერილ ბრძანებაზე დაყრდნობით გაავრცელა.
ვლადიმერ პუტინის ბრძანებაში აღნიშნულია, რომ უცხოელები რუსეთში ბინადრობის ნებართვაზე განაცხადის შეტანას "რუსეთის ფედერაციის მთავრობის მიერ დამტკიცებული კვოტების გათვალისწინების გარეშე და რუსული ენის, რუსეთის ისტორიისა და კანონმდებლობის საფუძვლების ცოდნის დამადასტურებელი დოკუმენტის წარდგენის გარეშე“ შეძლებენ.
ნებართვის მოთხოვნის მიზეზი შეიძლება მათი ქვეყნების პოლიტიკის უარყოფა იყოს, კერძოდ, "დესტრუქციული ნეოლიბერალური იდეოლოგიური პრინციპების დაწესება, რომლებიც ტრადიციულ რუსულ სულიერ და მორალურ ღირებულებებს ეწინააღმდეგება“.
როგორც რუსეთის სახელმწიფო საინფორმაციო სააგენტო წერს, ღირებულებების სია უკვე დადგენილია, ხოლო სახელმწიფოთა სია, "რომლებიც თავიანთ მოქალაქეებს არაჯანსაღ ღირებულებებს უწესებენ“, რუსეთის მთავრობამ უნდა შეადგინოს.
თებერვალში, სტრატეგიული ინიციატივების სააგენტოს ფორუმზე, პუტინმა მხარი დაუჭირა იტალიელი სტუდენტის ირინე ჩეჩინის იდეას, რომელმაც შესთავაზა რუსეთის ფედერაციაში გადასვლის გამარტივება კულტურულ, ტრადიციულ და ოჯახურ ღირებულებებზე დაყრდნობით. სახელმწიფოს მეთაური დაეთანხმა ჩეჩინის სიტყვებს, რომ იმის გასაგებად, თუ როგორი ხალხი გადმოდის საცხოვრებლად ქვეყანაში, ინდივიდუალური მიდგომაა საჭირო.
განკარგულება 2024 წლის 1-ლ სექტემბერს შევა ძალაში.
რუსების ნაწილი სოციალურ ქსელებში ამ გადაწყვეტილებას ირონიულად აფასებს:
"ალბათ მოგვაწყდებიან 1-ლი სექტემბერიდან: ამერიკელები, გერმანელები, იტალიელები და ა.შ., რომლებმაც გადაწყვიტეს "დაშორდნენ ნეოლიბერალურ დღის წესრიგს", სასაცილოა ეს ყველაფერი. მე მგონი ამას სჯობდა ეფიქრათ რუსულენოვან მოქალაქეებთან დაკავშირებით არსებულ პრობლემაზე, რომლებიც ცხოვრობენ, მაგალითად, ბალტიისპირეთის ქვეყნებში და რუსეთში ლეგალურად გადმოსვლის შესაძლებლობა არ აქვთ", - წერს ერთ-ერთი მომხმარებელი.
დიდი ნაწილი კი დიქტატორის გადაწყვეტილებას მიესალმება და "დიადი რუსეთის მაღალ ღირებულებებზე" წერს.