ბათუმში, აშშ-ს მიერ პედოფილიის ბრალდებით ძებნილი 35-წლამდე მამაკაცი დააკავეს - რა ხდება ცნობილი?
"რუსთავი 2" - ის ინფორმაციით, ბათუმის საქალაქო სასამართლოს მოსამართლემ ამერიკის მოქალაქის ექსტრადირების საკითხი განიხილა და 3-თვიანი პატიმრობა შეეფარდა პირს, რომელსაც საკუთარ სამშობლოში უმძიმესი დანაშაულისთვის რამდენიმე თვეა ეძებენ.
საქმე არასრულწლოვანის მიმართ ჩადენილ, განსაკუთრებით მძიმე კატეგორიის დანაშაულს შეეხება.
"ამერიკელი პარტნიორების მხრიდან საერთაშორისო თანამშრომლობის ფარგლებში მოთხოვნილი ღონისძიებების შედეგად, ამოღებულ იქნა დაკავებული პირის კუთვნილი ნივთები, მათ შორის, ელექტრონული ინფორმაციის მატარებელი მოწყობილობები, პორტატული კომპიუტერები და სხვადასხვა სახის სპეციალური დანიშნულების ელექტროტექნიკა.
დაკავებული პირის მიმართ განხორციელდება სამართლებრივი მოქმედებები აშშ-ში მისი შემდგომი ექსტრადირების და ამოღებული ნივთიერი მტკიცებულებების გადაცემის მიზნით", - განაცხადეს სუს-ში.
დანაშაული აიდაჰოს შტატიში მოხდა. აშშ-ს მოქალაქე დანაშაულს არ აღიარებს. მისი ინტერესების დამცველი კი, დღევანდელი გადაწყვეტილების შემდგომ ინსტანციაში გასაჩივრებას გეგმავს.
"კურიერის" ცნობით, დაკავებული დაახლოებით 35 წლის არის და ის ამერიკაში არასრულწლოვანის მიმართ სექსუალურ ძალადობაშია ბრალდებული. დანაშაული 2023 წელს არის ჩადენილი, ხოლო სავარაუდო დამნაშავე ძებნილად 2024 წლის ივლისში გამოცხადდა. ირკვევა, რომ ამერიკის მოქალაქეს, იმ დროისთვის, სამშობლო უკვე დატოვებული ჰქონდა და საქართველოში იმყოფებოდა.
ამერიკის მოქალაქის შტატებში ექსტრადიცია, სასამართლო განხილვების დასრულების შემდეგ, იუსტიციის მინისტრის შესაბამისი ბრძანებით განხორციელდება. წყარო