როგორ შეაშინა მერაბ დვალიშვილმა "ტროლი", რომელმაც მისი შეურაცხყოფა სცადა - MMA-ს ქართველ ვარსკვლავზე Dailymail-ი წერს (ვიდეო)
ბრიტანული Dailymail-ი ქართველ მებრძოლ მერაბ დვალიშვილზე სტატიას აქვეყნებს, რომელშიც გვიყვებიან MMA-ს ღონისძიებაზე UFC ვარსკვლავი ტრიბუნაზე მყოფ მაყურებელს როგორ დაუპირისპირდა.
33 წლის ქართველი ლას-ვეგასში, კრის ჯონსის ტურნირზე წინა რიგში იჯდა, როდესაც მაყურებლებიდან ერთ-ერთმა მას შეურაცხყოფელი ფრაზით მიმართა იმ დროს, როდესაც დარბაზში არსებულ ეკრანზე გამოჩნდა შონ ო'მალი - დვალიშვილის მომავალი მეტოქე.
დაცინვა საკმარისი აღმოჩნდა იმისთვის, რომ "მანქანა" წამომხტარიყო და საკუთარი ხელით დაეწყო მოქმედება. სოციალურ მედიაში გავრცელებული ვირუსული ვიდეო აჩვენებს, როგორ გადაძვრა ის ჭიშკარზე, შემდეგ მეორეზე გადახტა და თავის სექციაში მაყურებელი იპოვა.
მას შემდეგ, რაც ყველა ბარიერი გადალახა, რომელიც “ტროლისგან” აშორებდა, დვალიშვილი კიბეებზე ავიდა, ხოლო შეშინებული მაყურებელი იმეორებდა: "არა, არა, არა, არა..."
დაპირისპირებულების გარშემო მყოფი გულშემატკივრები ვიდეოებს იღებდნენ.
მის სავარძელთან მისვლისას, დვალიშვილი წამით შეჩერდა და ბიჭს შეხედა, რომელიც აშკარად შეშინებული იყო, შემდეგ კი თმაში სწვდა, საბოლოოდ კი, ბრაზი მოთოკა.
შემდეგ ვიდეოში ჩანს, როგორ მიაცილებს უსაფრთხოების სამსახური დვალიშვილს უკან, თავის ადგილზე.
UFC-ის გულშემატკივრები მომხდარს სოციალურ მედიაში ეხმაურებიან.
"განსხვავება მებრძოლსა და კლავიატურის მეომარს შორის", - აღნიშნა ვიღაცამ "ინსტაგრამზე".
"ბიჭმა შარვალში მოისაქმა", - დაწერა სხვამ.
კიდევ ერთმა იხუმრა: "მერაბი ბულინგის საწინააღმდეგო კამპანიის მთავარ როლში შემდეგი იქნება".
დვალიშვილის ბრძოლა ო'მალისთან 14 სექტემბერს გაიმართება.