"დინამო არენა ფეხბურთის ფედერაციას ერთა ლიგის მატჩებისთვის 41 000-ზე მეტი მაყურებლის მასპინძლობას სთავაზობდა" - ვრცელდება "დინამოს" დირექტორის წერილი
საქართველოსა და ჩეხეთის ნაკრებებს შორის უეფას ერთა ლიგის პირველი ტურის მატჩი 7 სექტემბერს, მიხეილ მესხის სახელობის სტადიონზე გაიმართება. მატჩის ყველა ბილეთი გაყიდულია.
- აღსანიშნავია, რომ მიხეილ მესხის სახელობის სტადიონის ტრიბუნები დაახლოებით 25 000 მაყურებელზეა გათვლილი, რაც თბილისის "დინამოს" სტადიონის ნახევარია. ამან ფეხბურთის გულშემატკივართა უკმაყოფილება გამოიწვია. უბილეთოდ დარჩენილი ფანები სოციალურ ქსელში საკუთარ აღშფოთებას ვერ მალავენ.
ცოტა ხნის წინ გვერდმა "90 წუთი" დინამო არენას დირექტორის წერილი გაავრცელა, რომლის ადრესატი ფეხბურთის ფედერაციაა. ირკვევა, რომ დინამო არენა ფეხბურთის ფედერაციას 41 000-ზე მეტი მაყურებლის მასპინძლობას სთავაზობდა - წერილი 6 აგვისტოთი თარიღდება.
"დამატებით გვინდა გაცნობოთ, რომ დინამო არენა შედგება 2 დამოუკიდებლად მდგომი შენობისგან. პირველი იარუსი იტევს 12 995 მაყურებელს, მეორე იარუსი 40 897 მაყურებელს, ხოლო VIP ლაუნჯი და სკაი ბოქსები ჯამურად 722 მაყურებელზეა გათვლილი. ვინაიდან, დინამოს არენას პირველი იარუსი, ექსპერტთა მოსაზრებით, საჭიროებს დეტალურ შემოწმებას, აღნიშნულის განხორციელებამდე გთავაზობთ ისარგებლოთ, მხოლოდ მეორე იარუსით, ასევე VIP ლოჟით და სკაი ბოქსებით, რომლითაც შეძლებთ 41 000 მეტი მაყურებლის მასპინძლობას"- ვკითხულობთ წერილში.
გარდა ამისა, გვერდი Geo Team-ის ინფორმაციით, დინამო არენას პირველი იარუსის ნაწილს ამორტიზების პრობლემა აქვს 2023 წლის ოქტომბრიდან, ბრუნო მარსის კონცერტის შემდეგ. ამ პერიოდიდან, საქართველოს ნაკრებმა დინამო არენაზე 3 საშინაო მატჩს უმასპინძლა: შოტლანდიის, ლუქსემბურგის და საბერძნეთის წინააღმდეგ. Geo Team-ის ინფორმაციით, უახლოეს პერიოდში დაანონსდება გრანდიოზული კონცერტი დინამო არენაზე, რომელიც ოქტომბერში გაიმართება და სტადიონი გაყიდის ბილეთს, დაახლოებით, 65.000 ადამიანზე.
შეგახსენებთ, საქართველოს პრემიერ-მინისტრმა ირაკლი კობახიძემ ამ რამდენიმე კვირის წინ განაცხადა, - "დინამო არენა" ამორტიზებულიაო და ვაზიანში ახალი სტადიონის მშენებლობა დააანონსა, რომელიც, მისი თქმით, 70 ათას მაყურებელზე იქნება გათვლილი. გულშემატკივარი მომხდარს სწორედ ამას უკავშირებს. მეტი განმარტება ამ თემზე არ გაკეთებულა.
წაიკითხეთ ასევე: