ომი რუსეთის ტერიტორიაზე გრძელდება: უკრაინის მასირებული შეტევა 2 სტრატეგიულ აეროდრომზე და საგანგებო მდგომარეობა ბელგოროდში - წუხანდელი ღამის ქრონიკა
ომი რუსეთის ტერიტორიაზე გრძელდება - დღეს Wall Street Journal-მა, ამერიკელ ოფიციალურ პირებზე დაყრდნობით, გაავრცელა განცახდება, რომ რუსეთს კურსკის ოლქში უკრაინული ჯარების შეტევის საპასუხოდ, უკრაინიდან ჯარების ნაწილი გაჰყავს.
გამოცემა წერს, რომ ეს ქმედებები მიუთითებს იმაზე, რომ კურსკის ოლქში უკრაინის შეიარაღებული ძალების შეტევამ რუსული ძალების იძულებითი გადაჯგუფების პროვოცირება გამოიწვია.
გამოცემის წყაროების თქმით, რომ შეერთებული შტატები ჯერ კიდევ ცდილობს დაადგინოს რუსეთის ამ ნაბიჯის მნიშვნელობა, თუმცა ისინი არ აკონკრეტებენ, თუ რამდენი სამხედრო გადაჰყავს რუსეთს უკრაინის ფრონტიდან კურსკში.
გუშინ ასევე გავრცელდა ინფორმაცია, რომ უკრაინა რუსეთის კურსკის რეგიონის 74 დასახლებულ პუნქტს აკონტროლებს. - ამის შესახებ უკრაინის შეიარაღებული ძალების მთავარსარდალმა, ალექსანდრ სირსკიმ უკრაინის პრეზიდენტ, ვოლოდიმირ ზელენსკისთან საუბარში განაცხადა.
ამავდროულად, ვრცელდება ინფორმაციები, რომ კურსკის ოლქის მცხოვრებლები დაკარგულ ახლობლებთან, რომლებიც სასაზღვრო დასახლებებში ცხოვრობენ, კავშირს ვერ ამყარებენ. საზღვარზე მომსახურე წვევამდელების ოჯახებიც აცახდებენ, რომ დღეებია მათზე არაფერი იციან. რეგიონული ხელისუფლების ინფორმაციით, რომ 28 დასახლებაში ორი ათას ადამიანთან კონტაქტი არ არის - ეს არ მოიცავს წვევამდელებს, რომლებიც იმყოფებოდნენ უკრაინის საზღვარზე უკრაინის შეტევის დროს.
დღევანდელი ცნობით, კურსკის შემდეგ, უკვე ბელგოროდის ოლქში გამოცხადდა საგანგებო მდგომარეობა რეგიონულ დონეზე, ინფორმაცია ოლქის გუბერნატორმა ვიაჩესლავ გლადკოვმა გაავრცელა.
მისი განცხადებით, უკრაინის შეიარაღებული ძალები ოლქს ყოველდღე ბომბავენ, რის შედეგადაც, რამდენიმე სახლი დაინგრა, ხოლო ადგილობრივებს შორის არიან დაშავებულები და დაღუპულები.
“ამიტომ გადავწყვიტეთ, დღეიდან, ბელგოროდის ოლქში რეგიონულ დონეზე საგანგებო მდგომარეობა გამოვაცხადოთ“, - განაცხადა ვიაჩესლავ გლადკოვმა. მისივე თქმით, ოლქში სიტუაცია რთულია და გეგმავს საგანგებო მდგომარეობის ფედერალურ დონეზე გამოცხადების მიზნით რუსეთის სამთავრობო კომისიას მიმართოს.
- გუბერნატორის ინფორმაციით, დრონებით შეტევა ქალაქ შებეკინოზეც განხორციელდა.
“სოფლის მეურნეობის საწარმოს ტერიტორიაზე FPV თვითმფრინავი სატვირთო მანქანას დაესხა თავს. დაშავდა მძღოლი. სასწრაფო დახმარების ჯგუფმა ნაღმ-ასაფეთქებელით მიყენებული ჭრილობით და მარცხენა მუხლის სახსრის ჭრილობით მძიმე მდგომარეობაში მყოფი მამაკაცი ბელგოროდის მე-2 საქალაქო საავადმყოფოში გადაიყვანა“, - წერს ბელგოროდის რეგიონის ხელმძღვანელი ვიაჩესლავ გლადკოვი ტელეგრამარხზე.
აღსანიშნავია, რომ შებეკინო უკრაინის საზღვართან მდებარეობს და ქალაქი რეგულარულად საომარი მოქმედებების ქვეშ არის.
რუსული წყაროების ცნობით, უკრაინის არმიამ ღამით და დილის საათებში კამიკაძე დრონებით მასირებული იერიში მიიტანეს ვორონეჟის ოლქში არსებულ სამხედრო აეროდრომებზე - “ბორისოგლებსკა“ და “ბალტიმორზე“. შეგახსენებთ, რომ ამ უკანასკნელზე ბაზირებულია რუსების ტაქტიკური ავიაცია - Su-34-ის ტიპის საფრონტო ბომბდამშენები, რომლებიც ხშირად ახორციელებენ ავიარეიდებს ხარკოვის ოლქში.
უკრაინული დრონები ღამით თავს დაესხნენ როგორც ოროლის, ასევე როსტოვის რაიონებს - გუბერნატორებმა ჩამოგდებული უპილოტო საფრენი აპარატების შესახებ განცხადებები დილით გაავრცელეს.
გარდა ამისა, გუბერნატორის მოვალეობის შემსრულებლის თქმით, კურსკის ოლქის თავზე, სადაც უკრაინის შეიარაღებული ძალების ოპერაცია მიმდინარეობს, ღამით ოთხი რაკეტა ჩამოაგდეს.
რუსული მედიის ინფორმაციით, რუსეთის საჰაერო თავდაცვის სისტემებმა ღამის განმავლობაში ასზე მეტი დრონი და 4 უკრაინული “ტოჩკა-უს“ ტიპის რაკეტა ჩამოაგდეს.
“როდესაც კიევის რეჟიმი ცდილობდა ტერორისტული თავდასხმის განხორციელებას უპილოტო საფრენი აპარატების და “ტოჩკა-უ“-ს რაკეტების გამოყენებით, რუსეთის საჰაერო თავდაცვის სისტემებმა ოთხი ტაქტიკური რაკეტა და 117 თვითმფრინავის ტიპის უპილოტო საფრენი აპარატი ჩამოაგდო“, - აღნიშნულია სამინისტროს მიერ გავრცელებულ ინფორმაციაში.
- უწყების განმარტებით, 37 დრონი და ოთხი რაკეტა კურსკის ოლქის თავზე ჩამოაგდეს, ამდენივე - ვორონეჟის ოლქის თავზე. ბელგოროდის ოლქში 17 უპილოტო საფრენი აპარატი გაანადგურეს, 11 - ნიჟნი ნოვგოროდში, 9 ვოლგოგრადში, 3 ბრიანსკის ოლქში, 2 ორიოლის ოლქში და ერთი როსტოვში.
რაც შეეხება უკრაინულ მხარეს, სამხედრო ანგარიშების თანახმად, ღამით რუსეთმა უკრაინას შაჰედის ტიპის 23 თავდასხმის თვითმფრინავით შეუტია.
“უკრაინამ 100-ით ნაკლები დრონი ჩამოაგდო, ვიდრე რუსეთმა. ოთხშაბათს ღამით რუსეთმა უკრაინას შაჰედის ტიპის 23 თავდასხმის თვითმფრინავით, ასევე ორი მართვადი რაკეტით შეუტია“, - იტყობინება უკრაინის შეიარაღებული ძალების საჰაერო ძალების სარდალი ნიკოლაი ოლეშჩუკი.
მისი თქმით, მათ უკრაინის რვა რეგიონში 17 კამიკაძე დრონის ჩამოგდება მოახერხეს.
იხილეთ ასევე:
- “უკრაინას არ სჭირდება ის, რაც სხვას ეკუთვნის; კიევს კურსკის ტერიტორიის აღების ინტერესი არ გააჩნია“ - უკრაინის საგარეო უწყების სპიკერი
- კურსკის შემდეგ, რუსებმა ევაკუაცია ბელგოროდის ოლქშიც დაიწყეს - ISW - ის შეფასებით, უკრაინელები რუსეთის 40-მდე დასახლებულ პუნქტში მოქმედებენ