რას საქმიანობდა საზღვარგარეთ აგენტების საიდუმლო ოჯახი, რომელთა შვილებმა არც კი იცოდნენ, რომ რუსები იყვნენ - პუტინის ფავორიტი გაცვლილი პატიმრების ისტორია
1 აგვისტოს რუსეთსა და დასავლეთის ქვეყნებს შორის პატიმრების გაცვლამ მსოფლიოს ყურადღება მიიქცია. ამ მოვლენის მიმართ ყურადღება ძალიან დიდი იყო და თავად პროცესს ისტორიული ეწოდა. რუსეთში პრეზიდენტი პუტინი სამშობლოში დაბრუნებულ პატიმრებს თვითმფრინავთან დახვდა და ყველა მათგანს პირადად მიესალმა. პრეზიდენტმა განსაკუთრებული ყურადღება მიაქცია არალეგალურ ემიგრანტ დულცევების ოჯახს, არტიომსა და ანას, რომლებიც შვილებთან ერთად ჩამოვიდნენ. რუსეთის პრეზიდენტმა ყვავილები ანა დულცევას გადასცა, შემდეგ კი ჩაეხუტა და აკოცა. ყვავილები მისცა ანას ქალიშვილს და ესპანურად მიმართა. გოგონამ, ისევე როგორც მისმა ძმამ, რუსულად საუბარი არ იციან. მათ ვერც კი გააცნობიერეს, რომ სამშობლოში დაბრუნდნენ.
ანა და არტიომ დულცევები
რუსულ მედიაში ამ ოჯახის შესახებ ცოტა რამ არის ცნობილი, აგენტი ცოლ-ქმრის შესახებ დასავლური გამოცემებიდან უფრო მეტს შეიტყობთ. უცხოური მედიის ცნობით, არტიომ დულცევი დაიბადა და გაიზარდა ბაშკირეთში და იქ მიიღო განათლება. ანა ნიჟნი ნოვგოროდიდანაა. და ორივე მათგანი რუსეთის საგარეო დაზვერვის ოფიცერია, ანას უფრო მაღალი წოდება აქვს, ვიდრე მის ქმარს.
გამოგონილი სახელები და გვარები
12 წელზე მეტი ხნის წინ, არგენტინაში გამოჩნდა ვინმე ლუდვიგ გიში, რომელიც დაიბადა ნამიბიაში 1984 წლის 4 ოქტომბერს არგენტინულ ოჯახში. ის ტურისტული ვიზით ჩამოვიდა ურუგვაიდან. დოკუმენტების მიხედვით, მის მშობლებს არგენტინის მოქალაქეობა ჰქონდათ, რის საფუძველზეც მან არგენტინის პასპორტი აიღო. ცოტა ხნის შემდეგ, არგენტინის დედაქალაქში მარია როზა მაიერ-მუნიოზი გამოჩნდა. დოკუმენტების მიხედვით, ქალი ავსტრალიელი და მექსიკელი წყვილის ოჯახში დაიბადა.
არგენტინაში მათი „შეხვედრიდან“ სამი წლის შემდეგ, ახალგაზრდები კანონიერად დაქორწინდნენ. მათ ქორწილში მოწმეები იყვნენ ადამიანები, რომლებიც მოგვიანებით ვერ იპოვეს, ანუ გამოგონილი სახელებით წარსდგნენ. წყვილი ყოველთვის მოკრძალებულად იქცეოდა, იყვნენ თავაზიანები და მხოლოდ ნაღდი ფულით იხდიდნენ, არ იყენებდნენ საბანკო ბარათებს. არგენტინაში ლუდვიგს და მარიას ორი შვილი, ვაჟი და ქალიშვილი შეეძინათ.
ტიპიური ოჯახი დიდი საიდუმლოებით
ქორწილიდან ორი წლის შემდეგ წყვილმა სლოვენიაში გადასვლა გადაწყვიტა. მეუღლეების მიერ გაჟღერებული ვერსიით, გადაადგილებას ერთადერთი მიზეზი ჰქონდა. არგენტინაში ბავშვებთან ერთად ცხოვრება რთული იყო. მათ სურდათ, რომ ისინი ნორმალურ გარემოში გაზრდილიყვნენ და გარეთ შიშის გარეშე გასულიყვნენ. წყნარი, მყუდრო სლოვენია თითქოს მათთვის ყველაზე შესაფერისი ადგილი იყო. წყვილი ლუბლიანას გარეუბანში დასახლდა. კაცმა IT კომპანია გახსნა, რომელიც სპეციალიზირებული გახლდათ ანტივირუსებზე, მისმა მეუღლემ კი ონლაინ გალერეა.
ახალგაზრდა წყვილი წყნარი ცხოვრების წესს ეწეოდა. ცხოვრობდნენ მყუდრო სახლში, ჰყავდათ თეთრი Kia Ceed სედანი, ყოველთვის დროულად იხდიდნენ გადასახადებს და გამოიყურებოდნენ კანონმორჩილ მოქალაქეებად. ისინი არასდროს არღვევდნენ მოძრაობის წესებს. მეზობლები მათ ჩვეულებრივ წყნარ ადამიანებს უწოდებდნენ, რომლებიც სხვას არანაირ პრობლემას არ უქმნიდნენ.
წყვილი სამ ენაზე საუბრობდა: ინგლისურად, გერმანულად და ესპანურად, ბავშვები კი ესპანურად და სკოლაში ინგლისურს სწავლობდნენ. მათი ვაჟი და გოგონა, ისე იქცეოდნენ როგორც მილიონობით თანატოლი მთელს მსოფლიოში: თამაშობდნენ, სწავლობდნენ ენას ადგილობრივ სკოლაში. მარია და ლუდვიგი ყურადღებას არასოდეს იქცევდნენ, ისინი მუდამ თავაზიანი იყვნენ მეზობლების მიმართ, იშვიათად დადიოდნენ მაღაზიებში და არაფრით განსხვავდებოდნენ სლოვენიაში მცხოვრები სხვა უცხოელებისგან.
2022 წლის დეკემბერში ისინი დააკავეს. დასავლური მედია წერდა, რომ ერთ-ერთი ქვეყნის საგარეო დაზვერვამ ჯერ კიდევ თებერვალში სლოვენიელ კოლეგებს ურჩია, რომ ყურადღება მიექციათ წყვილისთვის. როგორც ჩანს, შეტყობინების შემდეგ წყვილს უთვალთვალებდნენ, დეკემბერში კი მათი სახლი გაჩხრიკეს.
უსაფრთხოების ძალებმა, მათი სახლის ყოველი სანტიმეტრი შეამოწმეს. მათთვის განსაკუთრებით საინტერესო იყო კომპიუტერები, რომლებშიც იპოვეს დაცული პროგრამები მოსკოვთან პირდაპირი კომუნიკაციისთვის. მაცივარში კი, როგორც გაირკვა, საიდუმლო განყოფილება ჰქონდათ, სადაც დიდი რაოდენობით ნაღდ ფულს ინახავნენ ევროში. მარია და ლუდვიგი ჯაშუშობის ბრალდებით მაშინვე დააკავეს. იმავე საღამოს ბავშვები აღმზრდელ ოჯახში გადაიყვანეს.
წინასწარი გამოძიების დროს წყვილმა დანაშაული სრულად აღიარა, თუმცა ინფორმატორების შესახებ სიტყვა არ უთქვამთ. ანა და არტიომ დულცევების სასამართლო პროცესი 2024 წლის 31 ივლისს შედგა და იქვე გაირკვა, რომ მეუღლეებს გაცვლისთვის ამზადებდნენ.
შეხვედრა პუტინთან
აეროპორტში პატიმრებს პრეზიდენტი პუტინი დახვდა. ანა და არტიომ დულცევების ქალიშვილმა და ვაჟმა თვითმფრინავში გაიგეს, რომ ისინი რუსები იყვნენ, ამის შესახებ მათ მშობლებმა აცნობეს. მათთვის კიდევ უფრო დიდი სიურპრიზი იყო დახვედრა ვნუკოვო-2-ის აეროპორტში, სადაც თავად ვლადიმირ პუტინი მიესალმათ. 9 და 11 წლის ბავშვებმა არ იცოდნენ, ვინ იყო ვლადიმერ პუტინი.
პრეზიდენტმა რუსეთში დაბრუნებულებს მიმართა და პირობა დადო, რომ სახელმწიფო ჯილდოებს გადასცემს ყველას, ვინც ფიცის ერთგული დარჩა. დიმიტრი პესკოვმა ყურადღება გაამახვილა იმ ფაქტზე, რომ ანას და არტიომ დულცევებს სერიოზული რისკების და მსხვერპლის გაღება მოუწიათ თავიანთი მოვალეობის შესასრულებლად. ევროპაში მათთვის შესაძლოა ჩამოერთვათ მშობლის უფლებები და ბავშვები სამუდამოდ გაეგზავნათ მიმღებ ოჯახებში. იცოდნენ, რა ემუქრებოდა და მაინც განაგრძეს მუშაობა თავიანთი ქვეყნის სასიკეთოდ.
დულცევებმა შვილები ესპანურენოვან კათოლიკეებად აღზარდეს... ახლა ისინი აპირებენ გააგებინონ, რა არის ბორში - წერს რუსული მედია.
წაიკითხეთ ასევე: