მძიმე ღამე რუსეთისთვის - უპილოტო საფრენმა აპარატებმა სევასტოპოლს, ბელგოროდს, ლიპეცკს და სხვა რაიონებს დაარტყეს (ფოტო/ვიდეო)
6 აგვისტოს, გამთენიისას, უკრაინის შეიარაღებული ძალების 22-ე მექანიზებული ბრიგადის დანაყოფებმა, გაძლიერებულმა სპეცდანიშნულების რაზმებით, ჯავშანტექნიკითა და მობილური საზენიტო-სარაკეტო კომპლექსებით, საკუთარი არტილერიისა და კამიკაძე-დრონების ინტენსიური მხარდაჭერით, რუსეთის ფედერაციის სახელმწიფო საზღვარი კურსკის ოლქის ქალაქ სუჯასთან გადალახეს და ამ დრომდე წარმატებით მიიწევენ წინ.
უკვე მეოთხე დღეა, რაც ცხელ წერტილში საბრძოლო მოქმედებები არ წყდება.
შეიძლება ითქვას, რომ “სპეციალური უკრაინული სამხედრო ოპერაცია“ წინ წარმატებით მიიწევს. თუმცა, მუქარის შემცველი განცხადებები ისმის რუსეთის ფედერაციის მმართველი პირებისგან. მათი თქმით, ეს ყველაფერი უმძიმესი პროვოკაციაა და ამიერიდან, “ფაშისტებს“ უკომპრომისოდ დაუპირისპირდებიან.
მაგალითად, რუსეთის უშიშროების საბჭოს თავმჯდომარის მოადგილემ, დიმიტრი მედვედევმა კურსკის ოლქში განვითარებულ მოვლენების კომენტირებისას განაცხადა, რომ “ბანდერელების“ ტერორისტულმა ოპერაციამ ამ თემიდან ყოველგვარი ტაბუ უნდა მოხსნას. დაე, ეს ყველამ გაიგოს, მათ შორის ინგლისელმა ნაძირლებმაც: შევჩერდებით მხოლოდ მაშინ, როცა ამას ჩვენთვის მისაღებად და მომგებიანად მივიჩნევთ.
ამიერიდან, სპეციალურმა სამხედრო ოპერაციამ ღია ექსტრატერიტორიული ხასიათი უნდა შეიძინოს. ეს უკვე აღარ არის მხოლოდ ჩვენი ოფიციალური ტერიტორიების დაბრუნების და ნაცისტების დასჯის ოპერაცია. შესაძლებელი და აუცილებელია ჯერ კიდევ არსებული უკრაინის მიწებისკენ წასვლა. ოდესაში, ხარკოვში, დნეპროპეტროვსკში, ნიკოლაევში, კიევში და მის ფარგლებს გარეთ“.
-
საპასუხოდ, უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა, რომ "რუსეთმა ომი მოიტანა და უნდა გრძნობდეს მას".
"მადლობელი ვარ ყოველი მებრძოლის, ყოველი ჯარისკაცისა და მეთაურის, რომლებიც უზრუნველყოფენ ჩვენი, უკრაინული, პოზიციების დაცვასა და ჩვენი თავდაცვის ამოცანების შესრულებას. უკრაინელებს გამოსდით საკუთარი მიზნების მიღწევა. და ჩვენ არ ავირჩიეთ ომში მიზნების მიღწევა. რუსეთმა ომი მოიტანა ჩვენს მიწაზე და უნდა გრძნობდეს, თუ რა გააკეთა. ჩვენ კი ვცდილობთ, რაც შეიძლება მალე მივაღწიოთ ჩვენს მიზნებს მშვიდობიან დროს - სამართლიანი მშვიდობის პირობებში. და ეს მოხდება”, - განაცხადა ზელენსკიმ.
-
როგორ ვითარდებოდა მოვლენები კურსკში და რუსეთის სხვა რეგიონებში ღამით
საბრძოლო მოქმედებების დაწყებიდან მესამე დღეს, კურსკის ოლქის, რილსკის რაიონში ნებაყოფლობითი ევაკუაცია გამოცხადდა.
“რეგიონის მცხოვრებლების უსაფრთხოების უზრუნველსაყოფად, კურსკის რეგიონის ხელმძღვანელობამ რეგიონის სასაზღვრო რაიონებიდან ნებაყოფლობითი ევაკუაციის შესახებ მიიღო გადაწყვეტილება. მოქალაქეებს შეუძლიათ გამოვიდნენ პირადი ტრანსპორტით, ასევე ავტობუსებით, რომლებსაც რილსკის რაიონის ხელმძღვანელობა მიაწვდის”, - წერს რისლკის რაიონის ადმინისტრაციის ხელმძღვანელი, ანდრეი ბელოუსოვი თავის “ტელეგრამ” არხზე.
მისი თქმით, რეგიონის უსაფრთხო რაიონებში სასაზღვრო ტერიტორიებიდან ევაკუირებული მოქალაქეებისთვის დროებითი განლაგების პუნქტებია მოწყობილი.
- გუბერნატორის ინფორმაციით, რუსეთის ლიპეცკის ოლქზე დრონებით თავდასხმა განხორციელდა და ენერგოობიექტი დაზიანდა
რუსეთის ლიპეცკის ოლქზე უპილოტო საფრენი აპარატების გამოყენებით მასიური შეტევა განხორციელდა, - ინფორმაციას რუსული მედია ოლქის გუბერნატორზე, იგორ არტამონოვზე დაყრდნობით ავრცელებს.
თავდაპირველად, ლიპეცკის მუნიციპალურ ოლქსა და ქალაქ ლიპეცკში უპილოტო საფრენი აპარატის თავდასხმის საფრთხე გამოცხადდა და გუბერნატორმა მოსახლეობას მოუწოდა, არ მიახლოებოდნენ ფანჯრებს და თავი უსაფრთხო ადგილებისთვის შეეფარებინათ. მისივე თქმით, ოლქში საჰაერო თავდაცვა მუშაობდა.
- მოგვიანებით, გუბერნატორმა განაცხადა, რომ ოლქში ენერგოობიექტი დაზიანდა და ელექტრომომარაგება შეფერხებით ხორციელდებოდა.
ოლქში მიმდინარე მოვლენებს პენტაგონიც გამოეხმაურა. უწყების თქმით, “უკრაინა აკეთებს იმას, რაც უნდა გააკეთოს ბრძოლის ველზე წარმატების მისაღწევად.“
- დრონებით თავდასხმის გამო, ლიპეცკში ოთხი დასახლების ევაკუაცია განხორციელდა და საგანგებო მდგომარეობის რეჟიმი გამოცხადდა
რუსული მედიის ინფორმაციით, ფეთქებადსაშიში ობიექტების აფეთქების შედეგების აღმოსაფხვრელად ლიპეცკის მუნიციპალური ოლქის ტერიტორიაზე საგანგებო მდგომარეობის რეჟიმი გამოცხადდა. უსაფრთხოების უზრუნველსაყოფად ევაკუირებული იქნა დასახლებები: კოპცევი ხუტორი, ფედოროვკა, იაკოვლევკა და ტინკოვკა.
მანამდე, ოლქის გუბერნატორმა, იგორ არტამონოვმა განაცხადა, რომ ლიპეცკზე დრონებით მასიური შეტევა განხორციელდა, რის შედეგაც ენერგეტიკული ინფრასტრუქტურის ობიექტი დაზიანდა და ელექტრომომარაგებაში შეფერხება მოხდა.
- რუსული მედიის ინფორმაციით, რუსეთის სამხედრო საჰაერო თავდაცვის სისტემებმა რუსეთის რეგიონებისა და შავი ზღვის თავზე 75 უკრაინული დრონი გაანადგურეს.
“გასული ღამის განმავლობაში, როდესაც კიევის რეჟიმი ცდილობდა ტერორისტული თავდასხმის განხორციელებას უპილოტო საფრენი აპარატების გამოყენებით რუსეთის ფედერაციის ტერიტორიაზე არსებულ ობიექტებზე, მორიგე საჰაერო თავდაცვის სისტემებმა შეაკავეს და გაანადგურეს 75 თვითმფრინავის ტიპის უპილოტო საფრენი აპარატი“, - ნათქვამია უწყების განცხადებაში.
თავდაცვის სამინისტროს ცნობით, 26 დრონი ბელგოროდის ოლქში გაანადგურეს, 19 ლიპეცკში, 7 - კურსკში, 5 - ბრიანსკში, 4 - ვორონეჟში, ერთი ორიოლში, 5 ყირიმში და 8 - შავი ზღვის თავზე.
“გარდა ამისა, განადგურდა შავ ზღვაში, ყირიმის ნახევარკუნძულისკენ მიმავალი შვიდი უეკიპაჟო კატერი“, - აცხადებენ უწყებაში.
- უკრაინის შეიარაღებული ძალების მიერ განხორციელებული თავდასხმის შესახებ განცხადება გაავრცელა ანექსირებული სევასტოპოლის ხელისუფლებამაც.
ანექსირებული სევასტოპოლის ე.წ. გუბერნატორის ინფორმაციით, მათ “ნეპტუნის ტიპის ხომალდსაწინააღმდეგო რაკეტა ჩამოაგდეს“.
- დაახლოებით 2 საათის წინ ცნობილი გახდა, რომ ლიპეცკის ოლქში სამხედრო აეროდრომი იწვის.
გუბერნატორის იგორ არტამონოვის თქმით, აეროდრომი მდებარეობს დასახლებულ პუნქტებთან, სადაც ადრე იყო გამოცხადებული ევაკუაცია.
- თავდასხმა განხორციელდა ბელგოროდის რეგიონზეც.
რეგიონის გუბერნატორმა ვიაჩესლავ გლადკოვის თქმით, “საერთო ჯამში, საჰაერო თავდაცვის ძალებმა რეგიონის თავზე 29 თვითმფრინავის ტიპის უპილოტო საფრენი აპარატი ჩამოაგდეს. შედეგად დაზიანდა ინფრასტრუქტურა“.
- კურსკის ოლქში კი წუხელ 4 უკრაინული რაკეტა და 4 დრონი ჩამოაგდეს.
- უახლესი ინფორმაციით, უპილოტო თვითმფრინავებმა შებეკინოში საცხოვრებელ კორპუსს დაარტყეს.
“უკრაინის შეიარაღებული ძალების ოთხი უპილოტო თვითმფრინავი შებეკინოში საცხოვრებელ კორპუსს დაეჯახა“, - წერს ბელგოროდის რეგიონის გუბერნატორი ვიაჩესლავ გლადკოვი ტელეგრამარხზე.
მან ასევე გამოაქვეყნა ნგრევის ამსახველი ფოტოები.
იხილეთ ასევე: