ტეილორ სვიფტის კონცერტზე 19 წლის ბიჭი თავის აფეთქებას გეგმავდა - "თაყვანისმცემლებისთვის კონცერტების გაუქმება დიდი იმედგაცრუებაა, თუმცა..."
ვენაში, ტერორისტული საფრთხის გამო ტეილორ სვიფტის კონცერტი გადაიდო. სვიფტი ხუთშაბათს, პარასკევს და შაბათს ერნსტ ჰაპელის სტადიონზე უნდა გამოსულიყო. შოუს ორგანიზატორმა, კომპანია Barracuda Music-მა, 7 აგვისტოს გვიან საღამოს გამოაცხადა, რომ ხელისუფლების მიერ დადასტურებულია, რომ სტადიონ "ერნსტ ჰაპელზე" ტერაქტი იგეგმებოდა.
- საქმეზე პოლიციამ სამი მოზარდი დააკავა - გავრცელებული ინფორმაციით, ისინი კონცერტის დროს ტერაქტის მოწყობას გეგმავდნენ. ეჭვმიტანილებს კავშირი ჰქონდათ ე.წ ისლამურ სახელმწიფოსთან.
გამომძიებლებმა აღმოაჩინეს ქიმიკატების, ასაფეთქებელი მოწყობილობების და დეტონატორების მარაგი მთავარი ეჭვმიტანილის, 19 წლის მამაკაცის სახლში. ადგილობრივი სადაზვერვო სააგენტოს ხელმძღვანელის, ომარ ჰაიჯავი-პირჩნერის თქმით. იგი "ხალხმრავალ ადგილას" თავის აფეთქებას გეგმავდა.
საქმეზე დააკავეს კიდევ ორი ეჭვმიტანილი, 17 და 15 წლის. სამივე დაკავებული სამივე ავსტრიაშია დაბადებული, თუმცა თურქული, ჩრდილოეთ მაკედონიური და ხორვატიული წარმომავლობის არიან.
ავსტრიის ფედერალურმა კანცლერმა კარლ ნეჰამერმა განაცხადა, რომ ტრაგედია თავიდან აიცილეს ავსტრიის პოლიციის და უცხოეთის სპეცსამსახურების ინტენსიური თანამშრომლობის და საფრთხის ადრეულ ეტაპზე აღმოჩენის შედეგად. გვიან ღამით ნეჰამერმა სოციალურ ქსელ X-ში დაწერა, რომ ტეილორ სვიფტის თაყვანისმცემლებისთვის კონცერტების გაუქმება დიდი იმედგაცრუებაა, თუმცა აშკარად დაგეგმილი ტერაქტის გამო სიტუაცია ძალიან სერიოზული იყო.