ტერორისტული საფრთხის გამო ვენაში ტეილორ სვიფტის კონცერტები გაუქმდა - დაკავებულია ორი ადამიანი: რას აცხადებენ ავსტრიის შესაბამის სამსახურებში?
ვენაში, ტეილორ სვიფტის Eras ტურნეს ფარგლებში დაგეგმილი სამი კონცერტი უსაფრთხოების პრობლემის გამო გაუქმდა.
შოუები Ernst Happel-ის სტადიონზე, ხანმოკლე ინტერვალით უნდა გამართულიყო - ხუთშაბათს, პარასკევსა და შაბათს.
გუშინ, ოთხშაბათს, ისლამისტური თავდასხმების დაგეგმვის ბრალდებით ორი პირი დააკავეს. არსებული ინფორმაციით, თავდასხმები ავსტრიის დედაქალაქის მიდამოებში, დიდ ღონისძიებებზე უნდა განხორციელებულიყო.
ორგანიზატორების განცხადებით, "პოლიციის მხრიდან Ernst Happel Stadium-ზე შესაძლო ტერორისტული თავდასხმის თაობაზე ინფორმაციის დადასტურების გამო, იძულებულნი ვართ, უსაფრთხოებისთვის სამი დაგეგმილი კონცერტი გავაუქმოთ".
განცხადების თანახმად, "ყველა ბილეთი 10 სამუშაო დღის განმავლობაში, მყიდველებს ავტომატურად დაუბრუნდებათ".
ავსტრიის საჯარო უსაფრთხოების გენერალურმა დირექტორმა, ფრანც რუფმა აღნიშნა, რომ ავსტრიის 19 წლის მოქალაქე ოთხშაბათს. დილით ტერნიცში, ქვემო ავსტრიის პროვინციაში, მეორე კი, ვენაში დააკავეს. დაკავებულების შესახებ დამატებითი დეტალები ცნობილი არ არის.
"ამ ეტაპზე არსებული, საგამოძიებო ინფორმაციის თანახმად, ორივე ეჭვმიტანილი ინტერნეტის საშუალებით იყო რადიკალიზებული", - განაცხადა მან.
რუფის თქმით, 19 წლის ახალგაზრდამ 2023 წლის ივლისის დასაწყისში, ე.წ. ისლამური სახელმწიფოსადმი "ერთგულების ფიცი" დადო.
ტერნიცში, სადაც 19 წლის ეჭვმიტანილი ცხოვრობდა, დიდი სპეცოპერაცია განხორციელდა. მისი გაჩხრეკის დროს სახლთან მდებარე რამდენიმე შენობის ევაკუაცია განხორციელდა.
რუფმა აღნიშნა, რომ სახლში ქიმიური ნივთიერებები აღმოაჩინეს და ამჟამად მათ სწავლობენ.
ავსტრიის კანცლერმა, კარლ ნეჰამერმა X-ზე გამოქვეყნებულ პოსტში აღნიშნა, რომ კონცერტების გაუქმება "ყველა ფანისთვის მწარე დანაკარგი იქნება", მაგრამ სიტუაცია "საკმაოდ სერიოზული იყო".
"ჩვენი პოლიციისა და უსაფრთხოების სამსახურების უცხოურ კოლეგებთან მჭიდრო თანამშრომლობით, საფრთხე ადრეულ ეტაპზე აღმოვაჩინეთ და ტრაგედია თავიდან ავიცილეთ", - განაცხადა კანცლერმა.
ვენის პოლიციის ხელმძღვანელ ჯერარდ პურსტლის თქმით, თითო კონცერტს 65 000 ადამიანი უნდა დასწრებოდა, მოედანს გარეთ კი ყოველდღიურად, დაახლოებით, 22 000 ფანი შეიკრიბებოდა.
გამოძიება გრძელდება.