შურისძიება ვერცხლისწყლის გამოყენებით - დაღესტანში მოჭადრაკე ქალი მეტოქის მოწამვლის ბრალდებით დააკავეს
დაღესტნელი მოჭადრაკე ამინა აბაკაროვა ეჭვმიტანილია მისი მეტოქის, მოჭადრაკე უმაიგანატ ოსმანოვას მოწამვლის მცდელობაში: შეჯიბრებამდე აბაკაროვამ ვერცხლისწყალი დაასხა მაგიდას, რომელზეც მეტოქეს უნდა ეთამაშა. ამის შესახებ "ტელეგრამარხი" Shot - ი რუსეთის ჭადრაკის ფედერაციის პრეზიდენტ ანდრეი ფილატოვზე დაყრდნობით წერს.
"სამართალდამცავი ორგანოების დასკვნის მოლოდინში“, რუსეთის ჭადრაკის ფედერაციამ ჭადრაკში ჩრდილოეთ კავკასიის ფედერალური ოლქის ჩემპიონს, 40 წლის ამინა აბაკაროვას შეჯიბრებებში მონაწილეობა შეუჩერა.
შემთხვევა 2 აგვისტოს მოხდა. შეჯიბრის დღეს აბაკაროვა 20 წუთით ადრე მივიდა და მოწინააღმდეგის მაგიდასთან რაღაც დაღვარა - მოგვიანებით გაირკვა, რომ ეს იყო ვერცხლისწყალი. გავრცელებული ინფორმაციით, აბაკაროვამ ორგანიზატორებს წინასწარ ჰკითხა, იყო თუ არა სათვალთვალო კამერები დარბაზში, სადაც ტურნირი იმართებოდა და უთხრეს, რომ ისინი არ მუშაობდნენ (მოგვიანებით გაირკვა, რომ ეს ასე არ იყო).
თამაშის დროს ოსმანოვა ავად გახდა, მაგრამ მან მაინც დაასრულა ასპარეზობა, თან გამარჯვებით... მოგვიანებით მაგიდაზე დაღვრილი ვერცხლისწყალი შენიშნეს და პოლიცია გამოიძახეს. სათვალთვალო კამერების საფუძველზე, რომელიც საბოლოოდ აღმოჩნდა, რომ მუშაობდა, აბაკაროვას იდენტიფიცირება მოხდა.
მოჭადრაკე დააკავეს. აღმოჩნდა, რომ ეს შურისძიების მიზნით გააკეთა. ივლისის ბოლოს მახაჩყალაში გამართული ტურნირის ფინალის შემდეგ, სავარაუდოდ, მეტოქეზე გაბრაზდა. მაშინ ორივე მოჭადრაკემ ერთნაირი ქულა დააგროვა, მაგრამ ოსმანოვას გამარჯვება დამატებითი მაჩვენებლებით მიენიჭა.
"ტელეგრამარხის" წყაროების თანახმად, მოჭადრაკეები ერთმანეთს ბავშვობიდან იცნობდნენ და ყოველთვის ეჯიბრებოდნენ: აბაკაროვა თამაშობდა მახაჩყალის გუნდში, ხოლო ოსმანოვა კასპიის გუნდში. აბაკაროვას ახლობლები გაოგნებულები არიან მისი საქციელით, რადგან ისინი მას ბავშვების ღირსეულ მწვრთნელად მიიჩნევდნენ.
დაღესტნის სპორტის მინისტრმა საჟიდ საჟიდოვმა განაცხადა, რომ აბაკაროვას სისხლისსამართლებრივი დევნა ემუქრება: "მის მიერ ჩადენილ ქმედებას, შესაძლოა, ყველაზე ტრაგიკული შედეგი მოჰყოლოდა და ფატალურად დასრულებულიყო. საფრთხე ემუქრებოდა ყველას, ვინც ჭადრაკის სახლში იმყოფებოდა“.