“ქვეყანა შოკშია, მაგრამ საოცნებო ცვლილებები ხდება“ - ბანგლადეშის დროებით მთავრობას ნობელის პრემიის ლაურეატი უხელმძღვანელებს: როგორ შეარყიეს სტუდენტებმა ქვეყანა (ფოტო/ვიდეო)
მედიის ინფორმაციით, ბანგლადეშის 15 წევრისგან შემდგარი დროებითი მთავრობა ფიცს დღეს დადებს და მას მშვიდობის დარგში ნობელის პრემიის ლაურეატი ეკონიმისტი, მუჰამედ იუნუსი უხელმძღვანელებს.
ბანგლადეშის არმიის მეთაურის, ვაკერ-უზ-ზამანის განცხადებით, იგი მოელის, რომ იუნუსი ქვეყანას “მშვენიერი დემოკრატიული“ პროცესისკენ გაუძღვება.
- მას შემდეგ, რაც სტუდენტების მშვიდობიანი მოთხოვნა, საჯარო სამსახურში კვოტების გაუქმების შესახებ, ანტისამთავრობო საპროტესტო აქციებში გადაიზარდა, ქვეყანაში წარმოუდგენელი ცვლილებები მოხდა.
ორი დღის წინ ქვეყნიდან ინდოეთში გაიქცა ბანგლადეშის პრემიერ-მინისტრი, შეიხ ჰასინა. ქვეყნის არმიის მეთაურმა, ვაკერ-უზ-ზამანმა კი დროებითი მთავრობის შექმნა გამოაცხადა.
-
ვინ არის მუჰამედ იუნუსი
ნობელის პრემიის ლაურეატი მუჰამედ იუნუსი - ბანგლადეშის გადაყენებული პრემიერ-მინისტრის შეიხ ჰასინას დიდი ხნის პოლიტიკური მტერია. 84 წლის ნობელის პრემიის ლაურეატი მას შემდეგ დაინიშნა, რაც პრემიერი - ჰასინა ქვეყნიდან წავიდა.
სტუდენტებმა, რომლებიც ხელმძღვანელობდნენ მასობრივ საპროტესტო აქციებს და რომლებმაც დაამხეს ჰასინა, უარი თქვეს მთავრობაზე სამხედროების ხელმძღვანელობით და აიძულეს ისინი დროებითი ადმინისტრაციის ხელმძღვანელობა პროფესორ იუნუსისთვის ჩაებარებინათ.
- “როდესაც სტუდენტები, რომლებმაც ასეთი თავგანწირვა გვაჩვენეს, მთხოვენ ამ რთულ მომენტში მათ გვერდში დგომას, როგორ შემიძლია უარი ვთქვა?“ - განაცხადა პროფესორმა იუნუსმა ქვეყნის სათავეში ჩადგომის შესახებ კომენტირებისას.
ის დაკაში პარიზიდან დაბრუნდა, სადაც მცირე სამედიცინო პროცედურას გადიოდა.
პროფესორ იუნუსს ცოტა ხნის წინ, შრომის კანონების დარღვევისთვის ექვსთვიანი პატიმრობა ჰქონდა მისჯილი. თუმცა, თავად აცხადებს, რომ ბრალდება პოლიტიკურად იყო მოტივირებული.
მას დაბალი ფენის დახმარების გამო, 2006 წელს მიენიჭა ნობელის პრემია მშვიდობის დარგში.
პროფესორმა1983 წელს დააარსა Grameen Bank-ი, რომელიც ღარიბ ადამიანებს მცირე ბიზნესის წამოწყებისთის მიკრო, გრძელვადიან სესხებს სთავაზობს.
ის საერთაშორისო მასშტაბით ცნობილი გახდა, როგორც "ღარიბების ბანკირი", მაგრამ ყოფილმა პრემიერ -მინისტრმა მას ღარიბების "სისხლისმჭამელი" უწოდა და ბანკი გადაჭარბებული საპროცენტო განაკვეთების დაწესებაში დაადანაშაულა. მას ბრალი ედებოდა გადასახადების თავიდან არიდებაც. თუმცა მოგვიანებით ბრალი არ დაუდასტურდა.
-
“ქვეყანა შოკურ მდგომარეობაშია, მაგრამ საოცნებო ცვლილებები ხდება“ - BBC
“დაკაში სტუდენტები ქუჩებში არიან გამოსულები. მართავენ მსვლელობებს და აგრძელებენ მუშაობას.
ბანგლადეშის დედაქალაქის ხმამაღალ და გადატვირთულ ქუჩებზე არსად ჩანს პოლიცია, რომელიც სხვა დროს ძალიან თვალსაჩინო არის ხოლმე.
სიტუაცია უფრო მშვიდია ქალბატონი ჰასინას ინდოეთში გაქცევიდან ორი დღის შემდეგ. ბევრი ბანგლადეშელი, განსაკუთრებით ახალგაზრდები ფიქრობენ, რომ ქვეყანა გარდამტეხ მომენტს გადის“, - წერს გამოცემა.
“მე მინდა გამოხატვის თავისუფლება. მინდა კორუფციისგან თავისუფალი ქვეყანა. მინდა, ხალხს ჰქონდეს პროტესტის უფლება“, - განუცხადა BBC-ს ღია უნივერსიტეტის სტუდენტმა, 21 წლის ნოორჯაჰან მილიმ.
შეგახსენებთ, რომ ბანგლადეშში მიმდინარე არეულობების დროს 400-ზე მეტი ადამიანი დაიღუპა, მათ შორის უმეტესობა მშვიდობიანი მოქალაქეები იყვნენ.
ეს არის ყველაზე სისხლიანი ეპიზოდი ომის შემდეგ, რომელმაც ქვეყანას 1971 წელს დამოუკიდებლობა მოუტანა.
იხილეთ ასევე: