"2 დღეში უკრაინამ აიღო კონტროლი იმაზე ბევრად დიდ ტერიტორიაზე, ვიდრე რუსეთის ჯარებმა ბოლო თვე-ნახევარში..." - ბოლო ცნობები კურსკის ოლქიდან, სადაც უკრაინელთა წინსვლა გრძელდება
ამერიკული ანალიტიკური ცენტრის, ომის შემსწავლელი ინსტიტუტის (ISW) ინფორმაციით, უკრაინის ჯარები სახმელეთო ოპერაციას განაგრძობენ რუსეთის ტერიტორიაზე, კურსკის ოლქში. უკრაინას ამ ოპერაციის შესახებ ოფიციალურად, ჯერჯერობით, არაფერი უთქვამს.
ამერიკელი ექსპერტები 6 და 7 აგვისტოს გამოქვეყნებული გეოლოკაციური კადრების გაანალიზების საფუძველზე ამბობენ, რომ უკრაინის შეიარაღებული ძალების ჯავშანტექნიკა საზღვრიდან დაახლოებით 10 კილომეტრის სიღრმეზეა შესული. რუსეთის კურსკის ოლქი უკრაინის სუმის ოლქს ესაზღვრება.
- ISW-ის ცნობით, უკრაინელი სამხედროების სახმელეთო ოპერაციის ამ დროისთვის დადასტურებული მასშტაბის თანახმად, მათ "გაარღვიეს რუსეთის თავდაცვის სულ მცირე ორი ხაზი და ერთი საყრდენი პუნქტი".
ომის შემსწავლელი ინსტიტუტის ანგარიშში შეტანილია რუსული წყაროების, მათ შორის კრემლის მხარდამჭერი ე.წ. სამხედრო ბლოგერების მიერ გავრცელებული ცნობებიც, რომ 6 აგვისტოდან უკრაინის ძალებმა კურსკის ოლქში დაიკავეს 45კმ² ტერიტორია და 11 დასახლებული პუნქტი.
შეგახსენებთ, 6 აგვისტოს ღამით კურსკის რეგიონს უკრაინული დრონები დაესხნენ თავს - რეგიონის გუბერნატორის მოვალეობის შემსრულებელმა ალექსეი სმირნოვმა განაცხადა, რომ 26 თვითმფრინავის ტიპის დრონი ჩამოაგდეს. იმავე ღამით, სუჯას რეგიონულ ცენტრს, რომელიც რუსეთ-უკრაინის საზღვრიდან 10 კილომეტრში მდებარეობს, ცეცხლი გაუხსნეს. დილით გავრცელდა ცნობები სასაზღვრო ზონაში ბრძოლების შესახებ.
თავდასხმის დაწყებიდან ამ დრომდე, 8 აგვისტომდე, ბევრი რამ შეიცვალა. მედიაში ურთიერთგამომრიცხავი ინფორმაცია ვრცელდება, თუმცა, დანამდვილებით ცნობილი შემდეგია:
წუხანდელი ღამის შემდეგ, რუსეთის თავდაცვის სამინისტრომ 16 უკრაინული დრონის განადგურების შესახებ განაცხადა.
“საჰაერო თავდაცვის მორიგე სისტემებმა გაანადგურეს 14 უკრაინული უპილოტო საფრენი აპარატი ბელგოროდის ოლქის ტერიტორიაზე, 2 კი კურსკის ოლქის ტერიტორიაზე“, - იტყობინება ინტერფაქსი თავდაცვის სამინისტროზე დაყრდნობით.
უკანასკნელი მონაცემებით, ბელგოროდის რაიონში 24 საათის განმავლობაში უკრაინის შეიარაღებული ძალების საჰაერო თავდასხმის შედეგად 16 ადამიანი დაშავდა.
გუბერნატორმა ვიაჩესლავ გლადკოვმა განაცხადა, რომ გასული 24 საათის განმავლობაში ბელგოროდის რეგიონს 86-ჯერ შეუტია უკრაინამ და იყო მსხვერპლიც.
კურსკის ოლქში დაჭრილი რუსი პროპაგანდისტი და ВГТРК-ის სამხედრო ჟურნალისტი ევგენი პოდუბნი ცოცხალია, თუმცა მისი ჯანმრთელობის მდგომარეობა მძიმეა. ინფორმაციას აღნიშნულის შესახებ "რუსია-24" ავრცელებს.
“აქვს მძიმე დამწვრობა, თავის ტვინის ტრავმული დაზიანება, სახის ძვლების დაზიანება“, - განუცხადა ექიმმა კორესპონდენტს. მანამდე ВГТРК -მ გაავრცელა ინფორმაცია, რომ პოდუბნი ლიკვიდირებული იყო.
კურსკის რეგიონის გუბერნატორის მოვალეობის შემსრულებლის ალექსეი სმირნოვის განცხადებით, წუხელ, საჰაერო თავდაცვის სისტემამ კურსკის ოლქში ექვსი უკრაინული დრონი და ხუთი რაკეტა ჩამოაგდო.
სარაკეტო საფრთხე იმ რაიონში, სადაც ბრძოლა გრძელდება, ღამით რამდენჯერმე გამოცხადდა.
ამასთანავე, გამთენიისას საჰაერო განგაში იყო გამოცხადებული მთელი უკრაინის ტერიტორიაზე.
ომის კვლევის ამერიკული ინსტიტუტის (ISW)-ის განცხადებით, “კურსკის რეგიონში მიმდინარე შეტაკებების შესახებ, ურთიერთგამომრიცხავი განცხადებებით, კრემლი საკუთარი თავის დისკრედიტაციას ეწევა“.
ერთი დღით ადრე, რუსეთის პრეზიდენტმა ვლადიმერ პუტინმა უკრაინული ძალები კურსკის რეგიონში “მასშტაბურ პროვოკაციაში“ დაადანაშაულა.
5 საათის წინ, გამთენისსას, ცნობილი გახდა, რომ საჰაერო თავდაცვის ძალებმა კურსკის ოლქის თავზე, კიდევ შვიდი უკრაინული რაკეტა ჩამოაგდეს, რამდენმა მიაღწია სამიზნეს, ამ ეტაპისთვის უცნობია.
სუმის რეგიონი 24 საათის განმავლობაში 26-ჯერ დაბომბეს.
რუსეთის ჯანდაცვის სამინისტრომ გამოაქვეყნა მონაცემები მსხვერპლთა შესახებ, მათი თქმით, “კურსკის რეგიონში უკრაინელი ნაციონალისტების მიერ დაბომბვის შედეგად, დაშავდა 31 ადამიანი, მათ შორის ექვსი ბავშვი“.
შეგახსენებთ, რომ რუსეთის კურსკის ოლქში საგანგებო მდგომარეობის რეჟიმი გამოცხადდა.
“რეგიონის ტერიტორიაზე მტრული ძალების შესვლის შედეგების ლიკვიდაციისთვის 7 აგვისტოდან საგანგებო ვითარების გამოცხადების შესახებ მივიღე გადაწყვეტილება”, - წერს გუბერნატორი “ტელეგრამის” პირად არხზე.
მედიაში გავრცელდა ინფორმაცია, რომ უკრაინულმა ძალებმა რუსეთის კურსკის ოლქში რამდენიმე დასახლება დაიკავეს. "ტელეგრამ" არხებზე ვრცელდება ცნობებიც, რომ ოლქში ასეულობით უკრაინელი სამხედრო იმყოფება. რუსეთის პრეზიდენტის, ვლადიმერ პუტინის განცხადებით, კურსკის ოლქში განვითარებული მოვლენები უკრაინის მხრიდან “მასშტაბური პროვოკაციაა.” რუსეთის პრეზიდენტის თქმით, ოლქში “განურჩეველი სროლა” მიდის იარაღის სხვადასხვა სახეობიდან, მათ შორის სარაკეტო იარაღიდან. უკრაინულ მხარეს განვითარებულ მოვლენებზე ოფიციალური კომენტარი ამ დრომდე არ გაუკეთებია.
თუ ვიმსჯელებთ უკრაინის ოპერაციის მასშტაბებიდან და ინტენსივობით, ადრე თუ გვიან რუსეთი იძულებული გახდება იქ ჯარები გაიყვანოს სხვა ოპერატიული მიმართულებიდან და, ასევე, შესაძლოა, აგვისტო-სექტემბრისთვის მომზადებული სტრატეგიული რეზერვების ნარჩენები.
უკრაინელი სამხედრო ექსპერტის, კონსტანტინე მაშოვეცის თქმით, ამ თვალსაზრისითაც, უკრაინის შეიარაღებული ძალების ოპერაცია სასაზღვრო კურსკის რეგიონში უკვე გამართლებულია. ამ დროისთვის, ექსპერტის თქმით, საზღვრის დასაფარად, რუსეთის სარდლობამ ძალების ნაწილის გადაადგილება დაიწყო ვოლჩანსკის მიმართულებით.
ამავდროულად, ექსპერტმა შეადარა უკრაინის შეიარაღებული ძალების დანაყოფების წინსვლის ტემპი კურსკის რეგიონში და რუსეთის ჯარების - ხარკოვის რეგიონში:
"2 დღეში უკრაინის შეიარაღებულმა ძალებმა აიღეს კონტროლი იმაზე ბევრად დიდ ტერიტორიაზე, ვიდრე რუსეთის ჯარებმა გააკეთეს ბოლო თვენახევარში... რატომღაც მეჩვენება, რომ ეს პროცესი შუაშიც არ არის და უახლოეს მომავალში გვექნება ახალი ოპერატიული მიმართულება".
მისი თქმით, უკრაინის შეიარაღებულმა ძალებმა მართლაც გაწყვიტეს რუსების მნიშვნელოვანი საკომუნიკაციო ხაზი კურსკის რეგიონში (რილსკი - კორენევო - სუჯას გზა).
"უკრაინის შეიარაღებული ძალების მოწინავე ნაწილები აგრძელებენ წინსვლას ლიუბიმოვკა-კორენევოს საერთო მიმართულებით, ასევე ქალაქ სუჯას მიდამოში (გონჩაროვკას ჩრდილოეთით) და მელოვოეს მიმართულებით“, - აღნიშნა მაშოვეცმა.
მისი აზრით, უკრაინის სარდლობამ მოახერხა "ოპერატიული სიურპრიზის“ ეფექტის მიღწევა.
იხილეთ ასევე:
- თავდასხმა რუსეთის ტერიტორიაზე ტანკების, არტილერიისა და კამიკაძე-დრონების გამოყენებით - რა ხდება კურსკში, სადაც მეორე დღეა ბრძოლების შესახებ იუწყებიან?
- რუსეთის კურსკის ოლქში საგანგებო მდგომარეობა გამოცხადდა