ახლო აღმოსავლეთში მასშტაბური ომის მოლოდინის ფონზე, "ჰეზბოლას" ლიდერი ისრაელს ემუქრება - "ჩვენი პასუხი იქნება გადამწყვეტი და ეფექტიანი"
ახლო აღმოსავლეთში მასშტაბური ომის დაწყების მოლოდინის ფონზე, "ჰეზბოლას" ლიდერი, ჰასან ნასრალა ისრაელის მიმართ მკაცრი პასუხით იმუქრება. მისი განცხადებით, ისრაელის ბოლო ქმედებები არ ჩაივლის "გადამწყვეტი და ეფექტიანი" რეაგირების გარეშე.
ნასრალას თქმით, "ჰეზბოლა" შესაბამის მომენტს დაელოდება პასუხისთვის, მაგრამ მან დეტალები არ გაამხილა პასუხის დროზე ან ფორმაზე.
- მან აღნიშნა, რომ ყველა საერთაშორისო ძალისხმევა, დაერწმუნებინათ "ჰეზბოლა" რომ შური არ ეძია, უშედეგო აღმოჩნდა.
“შედეგების მიუხედავად, წინააღმდეგობა საშუალებას არ მისცემს ისრაელის ამ თავდასხმებს უშედეგოდ ჩაიაროს… ჩვენი პასუხი იქნება ძლიერი, ეფექტიანი და ქმედითი”, - განაცხადა ნასრალამ.
ცნობისთვის, 30 ივლისს ისრაელმა ლიბანის დედაქალაქი - ბეირუთი - დაბომბა, რასაც ჰეზბოლას სამხედრო მეთაური ფუად შუქრი შეეწირა.
ამავე დღეს ირანის დედაქალაქ თეირანში მოკლეს "ჰამასის" პოლიტიკური ლიდერი ისმაილ ჰანიე. "ჰამასი" და ირანი ჰანიეს მკვლელობაში ისრაელს ადანაშაულებენ. აქამდე ისრაელი აღნიშნულ ბრალდებას არც ადასტურებდა და არც უარყოფდა, თუმცა ახლახან "ვაშინგტონ პოსტმა" გაავრცელა ინფორმაცია, რომ ისრაელმა შეერთებულ შტატებს დაუდასტურა, რომ ჰანიეს მკვლელობის უკან ისრაელი დგას.
ჰანიეს მკვლელობის შემდეგ ირანი ისრაელს შურისძიებით ემუქრება. ოფიციალურმა პირებმა არაერთი შეტყობინება გაუგზავნეს ისრაელს და მოსალოდნელი თავდასხმის შესახებ აცნობეს.