ოკუპირებულ ახალგორში უკანასკნელი ქართული სკოლა დაიხურა - რას წერს მედია ადგილობრივებზე დაყრდნობით?
ოკუპირებულ ახალგორში ქართულმა საშუალო სკოლამ უკანასკნელი კლასი გაუშვა, სადაც სწავლება ქართულ ენაზე მიმდინარეობდა. მომავალი წლიდან კურსდამთავრებულები მიიღებენ რუსული სკოლის სერიფიკატებს. ამის შესახებ ინფორმაციას “ეხო კავკაზა“ ავრცელებს.
- ქართული სკოლების დახურვის გადაწყვეტილება 2017 წელს ცხინვალის რეგიონის ყოფილმა დე ფაქტო ლიდერმა, ანატოლი ბიბილოვმა, “პატრიოტული მიზეზების გამო“ მიიღო.
“ეს გადაწყვეტილება, რა თქმა უნდა, დისკრიმინაციულია რეგიონის ქართველი მოსახლეობის მიმართ. ამ გზით, ახალგორის რაიონის მოსახლეობას, თითქოსდა, მოუწოდეს არჩევანის გაკეთებისკენ - დატოვონ რეგიონი ან დაივიწყონ გზა საქართველოსკენ.
ეს ასევე მოიცავს წეროვანიდან სამუშაოდ მოსული სპეციალისტების (ექიმების, მასწავლებლების და ა.შ.) ტერიტორიიდან შემდგომ გამოძევებას და შემდეგ რაზდაჰანის საგუშაგოს დახურვას“, - წერს გამოცემა.
- აღსანიშნავია, რომ ქართული სკოლების დახურვა ეტაპობრივად მოხდა: ჯერ გაუქმდა დაწყებითი კლასები, შემდეგ ყოველწლიურად თითო კლასი. 2024 წელს სკოლა ბოლო კურსდამთავრებულებმა დაამთავრეს.
2024 წელს დე ფაქტო განათლების მინისტრის ასლან ლოლაევის ძალისხმევით, კიდევ ორი სკოლა დაიხურა.
საუბარია ცხრაწლიან სკოლებზე, სადაც, მაგალითად, სოფელ კორინთოში, ორ მოსწავლეზე 24 მასწავლებელი და ტექნიკური პერსონალი იყო, ხოლო სოფელ ბოლიში - ორ მოსწავლეზე 19 თანამშრომელი.
“ამჟამად რაიონის აღმოსავლეთ ნაწილში (რომელიც ცხინვალის იურისდიქციაში შევიდა 2008 წელს) დარჩენილია ხუთი სკოლა.
სოფელ იკოტში სწავლობს 10–11 მოსწავლე და მუშაობს სკოლის 19 თანამშრომელი, (ყოფილ) ქართულ სკოლაში არის 47 მასწავლებელი და ტექნიკური პერსონალი დაახლოებით 30 მოსწავლისთვის. შედარებისთვის, 2008 წლამდე იგივე სკოლის პერსონალი ათასამდე მოსწავლეს შეადგენდა.
ადგილობრივი მაცხოვრებლების თქმით, მასწავლებლებს შორის ჯერ კიდევ არიან “ძველი გვარდიის წარმომადგენლები“ - ანუ ადამიანები პედაგოგიური განათლებითა და სამუშაო გამოცდილებით, მაგრამ სკოლები ძირითადად სავსეა კვალიფიკაციის არმქონე პირებით. და მაინც, მთავარი ისაა, რომ ქართული სკოლები მაინც “ქართულია“, თუმცა რუსულად მიიჩნევა. თუმცა, ძნელია მათ საგანმანათლებლო დაწესებულებები ვუწოდოთ“, - წერს “ეხო კავკაზა“.