მნიშვნელოვანი ინფორმაცია
31
მარტიდღის ზოგადი ასტროლოგიური პროგნოზი
მნიშვნელოვანი ინფორმაცია
მკითხველის რჩევით
კვირის კითხვადი სტატიები
თვის კითხვადი სტატიები
ასევე დაგაინტერესებთ
აშშ-ის მთავრობამ TikTok-ის წინააღმდეგ ახალი სარჩელი შეიტანა - სოციალურ მედია კომპანიას ბრალად ედება ბავშვთა მონაცემების უკანონო შეგროვება და მშობლების მოთხოვნების უგულებელყოფა
13:44 / 05-08-2024
აშშ-ის მთავრობამ TikTok-ის წინააღმდეგ ახალი სარჩელი შეიტანა. სოციალურ მედიაკომპანიას ბრალად ედება ბავშვთა მონაცემების უკანონო შეგროვება და მშობლების მცდელობებზე უმოქმედობა, როდესაც ისინი თავიანთი შვილების ანგარიშების წაშლას ცდილობენ.
იუსტიციის დეპარტამენტმა განაცხადა, რომ კომპანიის პრაქტიკა ბავშვთა პირადი ცხოვრების "მასშტაბურ" ხელყოფას წარმოადგენს. მათი თქმით, ეს იმ კანონების იგნორირებით ხდება, რომლებიც ონლაინ კომპანიებისგან 13 წლამდე ასაკის პირთა ინფორმაციის შეგროვებაზე მშობლების თანხმობას მოითხოვს.
ოფიციალურმა პირებმა განაცხადეს, რომ TikTok და მისი მშობელი კომპანია ByteDance "განმეორებითი დარღვევებით" ხასიათდებიან და 2019 წლის მსგავს საქმეზე მიუთითეს.
TikTok-მა ბრალდებები უარყო და განაცხადა, რომ ბავშვთა დაცვისკენ მიმართული თავისი ძალისხმევით "ამაყობს".
კომპანიამ განაცხადა, რომ, პროაქტიულად შლის არასრულწლოვანი მომხმარებლების ანგარიშებს და ნებაყოფლობით დანერგა უსაფრთხოების მექანიზმები, როგორიცაა ეკრანთან გატარებული დროის შეზღუდვები და არასრულწლოვნებისთვის კონფიდენციალურობის დამატებითი დაცვის მექანიზმი.
"ამ ბრალდებებს არ ვეთანხმებით. მათგან ბევრი წარსულ მოვლენებს და პრაქტიკას შეეხება, რომლებიც, ფაქტობრივად, არაზუსტია ან უკვე მოგვარებულია", - განაცხადა კომპანიის წარმომადგენელმა, - "ჩვენ ვამაყობთ ჩვენი ძალისხმევით ბავშვთა დაცვის მიმართულებით და განვაგრძობთ პლატფორმის განახლებასა და გაუმჯობესებას".
საჩივარი TikTok-სა და ჩინურ მშობელ კომპანია ByteDance-ზე არსებულ ზეწოლას ზრდის. ისინი უკვე ებრძვიან აშშ-ს კანონს, რომელმაც შესაძლოა, ქვეყანაში კომპანიის აკრძალვა განაპირობოს.
სარჩელში აშშ ადანაშაულებს TikTok-ს "არასრულყოფილი" მეთოდების გამოყენებაში ბავშვების მიერ შექმნილი ანგარიშების გასაფილტრად, ასევე, მშობლებისთვის დაბრკოლებების შექმნაში, როდესაც ისინი მათ წაშლას ცდილობდნენ.
სარჩელის თანახმად, 2019-2020 წლებში მშობლების მიერ ანგარიშების გაუქმების 1 700 მოთხოვნის განხილვამ აჩვენა, რომ მათგან 30% 2021 წლის ნოემბერში კვლავ აქტიური იყო.
ნათქვამია, რომ მოდერატორებს, რომლებსაც არასრულწლოვანთა ანგარიშების გადახედვა ევალებოდათ, უფლება ჰქონდათ, მხოლოდ მაშინ ემოქმედათ, თუ ბავშვის ასაკის ცხად აღიარებას ნახავდნენ, ამასთანავე, მათ მომხმარებლების ვიდეოებზე შეზღუდული წვდომა ჰქონდათ. როგორც ინფორმაციაშია აღნიშნული, მათ მხოლოდ რამდენიმე წამი ჰქონდათ გადაწყვეტილების მისაღებად.
ოფიციალურმა პირებმა სასამართლოს სთხოვეს, TikTok-ისთვის ამ ქმედებების შეწყვეტა დაევალებინა და თითოეული დარღვევისთვის ჯარიმები განესაზღვრა.
"ეს ქმედება აუცილებელია იმისათვის, რომ თავიდან ავიცილოთ მოპასუხეების (რომლებიც განმეორებითი დამრღვევები არიან და მასშტაბურად მოქმედებენ) მიერ მცირეწლოვანი ბავშვების პირადი ინფორმაციის შეგროვება და გამოყენება მშობლების თანხმობის ან მათი კონტროლის გარეშე," - განაცხადა აშშ-ის იუსტიციის დეპარტამენტის სამოქალაქო განყოფილების ხელმძღვანელმა, გენერალური პროკურორის პირველმა მოადგილემ ბრაიან ბოინტონმა.
TikTok მსოფლიოში ერთ-ერთი ყველაზე პოპულარული სოციალური მედია პლატფორმაა, რომელსაც, მათივე ცნობით, გლობალურად 1 მილიარდზე მეტი, ხოლო აშშ-ში - 170 მილიონზე მეტი მომხმარებელი ჰყავს.
Pew Research-ის გამოკითხვებმა აჩვენა, რომ 13-17 წლის ამერიკელი მოზარდების 60%-ზე მეტი აღნიშნულ პლატფორმას იყენებს, მათგან ნახევარზე მეტი კი - TikTok-ზე ყოველდღიურად შედის.
სარჩელში ნათქვამია, რომ აშშ-ის მთავრობა ცდილობს, TikTok-ის მიერ, სავარაუდოდ, "ბავშვთა პირადი ცხოვრების უკანონო, მასშტაბურ ხელყოფას მოუღოს ბოლო".
კომპანიას მსგავსი საკითხების გამო გაერთიანებულ სამეფოსა და ევროპის რიგ ქვეყნებშიც დაეკისრა ჯარიმები.
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
კადრები: რა ხდებოდა 2 ძლიერი მიწისძვრის დროს მიანმარში? - დაღუპულთა რაოდენობა 1 000-ს გასცდა
კვირის კითხვადი სტატიები
მნიშვნელოვანი ინფორმაცია
მკითხველის რჩევით
