"ჰეზბოლამ" ისრაელის მიმართულებით ათობით რაკეტა გაუშვა: აშშ, დიდი ბრიტანეთი და სხვა ქვეყნები საკუთარ მოქალაქეებს ლიბანის დატოვებისკენ მოუწოდებენ: რა ხდება ახლო აღმოსავლეთში
ახლო აღმოსავლეთში დაძაბულობა იზრდება. ამ ფონზე კი აშშ-ის საელჩო მოუწოდებს თავის მოქალაქეებს ლიბანის დატოვებისკენ. იმავეს ურჩევს დიდი ბრიტანეთიც ლიბანში მყოფ საკუთარ მოქალაქეებს. გაერთიანებული სამეფოს საგარეო საქმეთა მინისტრის, დებიდ ლამის თქმით, "რეგიონში სიტუაცია შეიძლება სწრაფად გაუარესდეს".
- ცნობისთვის, ირანმა პირობა დადო, რომ ისრაელის წინააღმდეგ შურს მკაცრად იძიებს "ჰამასის“ ლიდერის, ისმაილ ჰანიეს თეირანში მკვლელობის გამო.
ფიქრობენ, რომ ლიბანში დაფუძნებულმა და ირანის მიერ მხარდაჭერილმა "ჰეზბოლამ“ შესაძლოა, დიდი როლი ითამაშოს შურისძიების პროცესში. რაც თავის მხრივ, ისრაელის მხრიდან სერიოზულ პასუხს გამოიწვევს.
- ამ ფონზე, 4 აგვისტოს, გვიან ღამით "ჰეზბოლამ“ ათობით რაკეტა გაუშვა ისრაელის ჩრდილოეთით მდებარე ქალაქის, ბეით ჰილელის მიმართულებით. სოციალურ ქსელში გამოქვეყნებულ კადრებში ნაჩვენებია, როგორ მუშაობს ირაელის თავდაცვის სისტემა, "რკინის გუმბათი" და რაკეტებს აგდებს. მსხვერპლის შესახებ ინფორმაცია არ გავრცელებულა.
იორდანიის საგარეო საქმეთა სამინისტრო მოუწოდებს ასევე თავის მოქალაქეებს, რომ თავი შეიკავონ ლიბანში მოგზაურობისგან, იგივე შინაარსის განცხადება გამოაქვეყნა კანადის საგარეო უწყებამაც
ინფორმაციისთვის, "ჰამასის" პოლიტიკური ლიდერი, ისმაილ ჰანიე თეირანში მოკლეს. ის ირანის დედაქალაქში ქვეყნის ახალი პრეზიდენტის ინაუგურაციაზე დასასწრებად იმყოფებოდა. "ჰამასი" და ირანი მკვლელობის მომზადებაში ისრაელს ადანაშაულებენ, ისრაელში კი აღნიშნულ ბრალდებას არც ადასტურებენ და არც უარყოფენ.
თავდაპირველი ვერსიით, იმ რეზიდენციაზე, სადაც ჰანიე თეირანში იმყოფებოდა, საჰაერო თავდასხმა განხორციელდა, თუმცა მოგვიანებით, "ნიუ იორკ თაიმსმა" დაწერა, რომ რეალურად, რეზიდენციაში ჯერ კიდევ ორი თვის წინ შეიტანეს ბომბი, რომელიც შემდეგ, ისმაილ ჰანიეს იქ ყოფნისას ააფეთქეს.