აგვისტოს ომს გმირულად შეწირული, 20 წლის ვახტანგ გზირიშვილის დედა, მარინა გზირიშვილი გარდაიცვალა

აგვისტოს ომს გმირულად შეწირული, 20 წლის ვახტანგ გზირიშვილის დედა, მარინა გზირიშვილი გარდაიცვალა.

რამდენიმე დღის წინ გამოქვეყნებულ პოსტში ქალბატონი მარინა წერდა, რომ ოპერაციისთვის ემზადებოდა:

"ცხოვრების სავალ გზებზე უფალი ყველას თავის სატარებელ ჯვარს გვარგუნებს, ზოგს მძიმეს და ზოგსაც მსუბუქს. ჰოდა ერთ ერთი მათგანი მეც ვარ, ვისაც მძიმე ჯვრის ტარება მარგუნა უფალმა. თითქმის დღემდე ვატარე ეს მეტად მტკივნეული მძიმე ჯვარი გულით. განსაკუთრებით კი ბოლო 16 წელი. მეტი ვეღარ შეძლო ჩემმა მტკივნეულმა გულმა, რადგანაც ხვალ 30.07.2024 - ში წმ. მარინეს ხსენების დღეს მიტარდება გულის ოპერაცია. 2008 წლის რუსეთ-საქართველოს აგვისტოს ომის 16 - წლის თავზე. ვიცი უფალი და დედა ღმრთისმშობელი იქნებიან ჩემი შემწე და ასევე ოპერაციის დროს თავთან ჩემი მფარველი ანგელოზები მეყოლებიან, წმ. მარინე და ჩემი ვაჟკაცი შვილი ვახტანგი. "მშვიდობით იყავით ნუ დაღონდებით".

20 წლის ვახტანგ გზირიშვილი 8 აგვისტოს, რუსული ავიაციის დაბომბვის შედეგად, ცხინვალის შესასვლელთან, სოფელ ტბეთთან მაშინ დაიღუპა, როდესაც დაჭრილი სამხედროები სამშვიდობოზე გამოჰყავდა. დაჯილდოებულია ვახტანგ გორგასლის I ხარისხის ორდენით. ვახტანგი ერთადერთი არ არის ოჯახიდან, ვინც სამშობლოს ერთიანობას და უსაფრთხოებას შეეწირა. აფხაზეთის ომის გმირია მისი მამა, ბადრი გზირიშვილი, რომელიც სოფელ ტამიშთან შეტაკებისას დაიღუპა. ქალბატონი მარინა არაერთხელ იყო ჩვენი რესპონდენტი და მეუღლის და შვილის გმირობისა და თავდადებისა შესახებ გვიამბობდა.

• ambebi.ge ღრმა მწუხარებას გამოთქვამს ქალბატონი მარინას გარდაცვალების გამო და სამძიმარს უცხადებს გარდაცვლილის ოჯახს.

იხილეთ ქალბატონი მარინას ინტერვიუ არქივიდან