კურორტი "მოჩვენება" - შოვი: სტიქიიდან 1 წლის შემდეგ

2023 წელი

2 აგვისტო

მშვიდი, ნათელი დღე იყო, მაგრამ საღამოს, როგორც მთაში იცის ხოლმე, უცებ მოიღრუბლა და გაწვიმდა... ძლიერი წვიმა იყო... ხშირი და მონოტონური. დამსვენებლებით იყო სავსე გლოლაც და შოვიც... როგორც უცებ გაწვიმდა, ასევე მოულოდნელად გადაიღო. ღამე მშვიდი იყო....

3 აგვისტო

მზიანი დილა გათენდა, როგორც ნაწვიმარზე იცის ხოლმე, ბრჭყვიალებდა ირგვლივ ყველაფერი. უთენია უკვე ბავშვების ჟრიამულით აივსო არემარე. ვინ ნაწვიმარზე ტყეში გამრავლებული სოკოს საკრეფად მიეშურებოდა, ვინ ბავშვებს "სანსეტ შოვის" მიმდებარედ ასეირნებდა, ვინ მინერალური წყლის დასალევად მიდიოდა, ვიღაც კიდევ ბუბასწყლის ხეობაში ლაშქრობას გეგმავდა...

ირგვლივ ზაფხულის ლამაზი დღე ჩახჩახებდა და არაფერი, სულ არაფერი მიანიშნებდა, რომ ცოტა ხანში უცნაური, ავისმომასწავებელი ხმა დაფარავდა შოვსა და მიმდებარე არემარეს, ხმას თან ტალახის წამლეკავი მდინარეები მოჰყვებოდა...

"არ ვიცი, ეს საშინელი ხმა რას შევადარო, თავიდან მეგონა, რომ ციდან ისმოდა, ვიფიქრე, თვითმფრინავმა გადაიფრინა ძალიან დაბლა - მეთქი, ამიტომ ცისკენ დავიწყე ყურება, თუმცა ცა მოწმენდილი იყო, არაფერი ჩანდა, მერე მთისკენ გავიხედე და დავინახე უზარმაზარი ნაძვები როგორ მოცელილივით ეცემოდნენ... მაშინ გვიფიქრე, - მეწყერი ჩამწვა-მეთქი, ღვარცოფი თუ იყო, თავიდან ვერ მივხვდი...“ - ჰყვებოდა სტიქიას სასწაულებრივად გადარჩენილი გიო ადამია მომხდარიდან მალევე. ის 6 წლის შვილთან - თომასთან ერთად გლოლაში 2 აგვისტოს ჩავიდა. 3-ში კი მამა-შვილი შოვის დასათვალიერებლად წავიდნენ. შეიძლება ითქვას, რომ ყველაფერი მათ თვალწინ მოხდა... ეს ფოტოები გიომ სტიქიამდე რამდენიმე წუთით ადრე გადაიღო...

“ეს ბოლო ორი კადრი სტიქიამდე 10 წუთით ადრეა გადაღებული. ამის მერე მანქანაში ჩავჯექი და ფოტოებს ვგზავნიდი და... ასე დაიწყო... მადლობა კიდევ ერთხელ იმ მოხალისე გმირებს - 6 ადამიანს, ვინც მეწყერიდან გამოგვიყვანა...“ - გვეუბნება გიო თავს გადახდენილი უბედურებიდან 1 წლის შემდეგ. მან ტალახის ტალღას სასწაულად დააღწია თავი, თან ისე, რომ შვილის გადარჩენაც შეძლო...

"ყველაფერი ტალახში იყო. საშინელად ციოდა. ბავშვი კანკალებდა. ხე იდგა რაღაც, იმ ხესთან მივღოღდი, თომა შემოვსვი ზედ და დავიწყე რეკვა 112-ში, ახლობლებთან“… ეს ფოტო სწორედ ამ მომენტს ასახავს.

გიოს და სტიქიაგადატანილ ადამიანებს დღეს ამ ამბების გახსენება აღარ სურთ... ვერც გაამტყუნებ...

შოვის ტერიტორიაზე სტიქიური პროცესები 2023 წლის 3 აგვისტოს, დაახლოებით 15:00 საათისთვის გააქტიურდა. მთიდან წამოსულმა ღვარცოფულმა მასამ შოვის ტერიტორია თითქმის სრულად დაფარა. განადგურდა დასასვენებელი ინფრასტრუქტურა. ღვარცოფმა წაიღო კოტეჯები, დააზიანა ადგილზე არსებული სასტუმრო “სანსეტ შოვი“. ნაგებობამ შეძლო მასის შეკავება, რამაც ადგილზე მყოფებს ტერიტორიის დატოვების საშუალება მისცა.

სტიქიამ წარმოუდგენელი და მოუშუშებელი დანაკარგი დაუტოვა ქვეყანას. ტრაგედიამ 33 ადამიანის, მათ შორის მცირეწლოვანთა სიცოცხლე შეიწირა. სამძებრო- სამაშველო სამუშაოები 84 დღეზე მეტხანს გაგრძელდა.

• 15:00 საათზე მყინვარებზე “თბილისა“ და “ბუბა“ სტიქიური მოვლენები გააქტიურდა. მოგვიანებით, გარემოს ეროვნულმა სააგენტომ სატელიტური მონაცემების საფუძველზე განაცხადა, რომ ბუბასწყლის ხეობაში 500 000 მ³ კლდეზვავური მასა ჩამოიშალა. მოწყდა დაახლოებით 62 ჰა-ზე გაშლილი მყინვარული მასა.
• 16:00 საათზე კურორტ შოვში, მჟავე წყლებთან მეწყერი ჩამოწვა.
• პირველივე წუთში გავრცელდა ინფორმაცია “სანსეტ შოვში“ დამსვენებელთა შესახებ. ერთ -ერთმა იქ მყოფმა პირდაპირი ეთერი ჩართო, სადაც ჩანდა, რომ მასა ნაგებობამ შეაკავა. მოგვიანებით იქ ჩარჩენილთა ევაკუირება განხორციელდა.
• 18:55 საათზე საზოგადოებრივ მართვის ცენტრ 112-ში უკვე შესული იყო არაერთი შეტყობინება შოვში მიწის მასის ჩამოშლასთან დაკავშირებით. კოტეჯებში მცხოვრები დამსვენებლები და პერსონალი იძებნებოდა.
• 21:30 საათზე სტიქიის ზონაში ორი ადამიანის ცხედარი იპოვეს.
• სამაშველო- სამძებრო სამუშაოები სამ თვეზე მეტხანს გაგრძელდა. ყოველ დღე ვრცელდებოდა ცნობები ახალი გარდაცვლილის შესახებ.

რა ხდება დღეს შოვში? - კურორტი, რომელიც 2023 წლის 3 აგვისტოს 15:00 საათამდე სიცოცხლით იყო სავსე, ბავშვების ჟრიამული ავსებდა არემარეს და ჰაერში სიცოცხლის სიხარული ტრიალებდა, დღეს უკაცრიელ ადგილად არის ქცეული, იქ, სადაც მრავალწლოვანი ნაძვები და ფიჭვები იდგა და სიმწვანეში იყო ყველაფერი ჩაფლული, ახლა ქვა-ღორღის სამფლობელოა... რაჭის "მარგალიტი" გამქრალია...

სტიქიური უბედურების ზონა1 წლის შემდეგ

ფოტორეპორტაჟი