47 წამში მოგებული შეხვედრა და გურამ თუშიშვილი ოლიმპიადის მეოთხედფინალშია
ტოკიოს ოლიმპიადის ვიცე-ჩემპიონი გურამ თუშიშვილი (100+კგ) პარიზის ოლიმპიური თამაშების მეოთხედფინალშია. მერვედფინალში მან სენეგალელი 47 წამში იპონით დაამარცხა.
- ოლიმპიადის მომდევნო ეტაპზე გურამ თუშიშვილის მეტოქე ლეგენდარული ტედი რინერი იქნება.
ამ დროისთვის, საქართველოს სამი მედალი აქვს. ძიუდოისტი ლაშა ბექაური ორგზის ოლიმპიური ჩემპიონი გახდა. მან ფინალში იაპონელი სანშირო მურაო დაამარცხა და საქართველოს ნაკრებს პირველი ოქროს მედალი მოუტანა. საქართველოს ნაკრებს პარიზის ოლიმპიადაზე ვერცხლის მედალი მსოფლიოს სამგზის ჩემპიონმა, ტატო გრიგალაშვილმა მოუტანა. ამასთან, ვერცხლის მედალს დაეუფლა ქართველი ძიუდოისტი (100კგ) ილია სულამანიძე.
ცნობისთვის, ზაფხულის 33-ე ოლიმპიურ თამაშებში საქართველოდან სპორტის 10 სახეობაში (ბატუტზე ხტომა, ბერძნულ-რომაული სტილით ჭიდაობა, თავისუფალი სტილით ჭიდაობა, კრივი, მძლეოსნობა, ტყვიის სროლა, ფარიკაობა, ცურვა, ძალოსნობა, ძიუდო) 28 სპორტსმენი ასპარეზობს.