თავდადებული ბრძოლა გახეთქილი წარბით: ლაშა გურული ნახევარფინალშია - მან ბრინჯაო უკვე გაინაღდა და ოქროსთვის ბრძოლას გააგრძელებს
პარიზის 2024 წლის ოლიმპიურ თამაშებზე, ქართველმა მოკრივე ლაშა გურულმა (63.5კგ) დღეს მეოთხედფინალური ეტაპის შეხვედრა ყაზახ ბაზარბაი მუჰამედსაბირისთან გამართა და გაიმარჯვა. დაპირისპირება ურთულესი გამოდგა - პირველი რაუნდი ლაშამ დათმო, თუმცა შემდგომ რაუნდში, ტრავმის მიუხედავად, უპირატესობა მოიპოვა და მსაჯებმა მას ერთხმად მიანიჭეს გამარჯვება. მესამე რაუნდში კი მართალია მსაჯების ხმები გაიყო, მაგრამ ხუთიდან სამმა მათგანმა ქართველი სპორტსმენის უპირატესობა აღიარა და საბოლოო ჯამში ჩვენებურმა გაიმარჯვა.
გურულმა ოლიმპიადაზე ასპარეზობა 1/8-ფინალიდან დაიწყო, სადაც აზერბაიჯანელი მალიკ ჰასანოვი დამაჯერებლად დაამარცხა.
შეგახსენებთ, რომ 28 ივლისს ოლიმპიადის კრივის ტურნირზე დებიუტანტმა გიორგი ყუშიტაშვილმა (92კგ) პირველი ორთაბრძოლა ჩაატარა. ქართველი სპორტსმენი აზიის ჩემპიონთან, ტაჯიკ დავლატ ბოლტაევთან დაძაბულ ბრძოლაში დამარცხდა და ოლიმპიადას დაემშვიდობა.