დიდი გაცვლა რუსეთსა და დასავლეთს შორის: გათავისუფლებულია 26 პირი, მათ შორის, რუსეთის მოთხოვნით, ზელიმხან ხანგოშვილის მკვლელი
თურქეთის ეროვნული სადაზვერვო ორგანიზაციის (MIT) ცნობით, ანკარაში რუსეთსა და დასავლეთს შორის 26 დაკავებული პირის გაცვლა მოხდა.
მათი ინფორმაციით, ეს რუსეთსა და დასავლეთის ქვეყნებს შორის დაკავებულების “ბოლო დროის ყველაზე მასშტაბური” გაცვლაა, რომლის ფარგლებში 26 დაკავებული იქნა გათავისუფლებული, რომლებიც შვიდი სხვადასხვა ქვეყნის საპატიმროებში იმყოფებოდნენ - აშშ-ში, გერმანიაში, პოლონეთში, სლოვენიაში, ნოერვეგიაში, რუსეთსა და ბელარუსში.
“გაცვლის ოპერაციის ფარგლებში 10 დაკავებული, მათ შორის ორი ბავშვი, რუსეთს გადაეცა, 13 დაკავებული - გერმანიას, სამი დაკავებული - აშშ-ს”, - ნათქვამია განცხადებაში. თურქეთის ეროვნულმა სადაზვერვო სააგენტომ (MIT) განაცხადა, რომ კოორდინაციას უწევს პატიმრების გაცვლას.
ამერიკული ტელეკომპანია Fox News-ის ინფორმაციით, რუსეთმა Wall Street Journal-ის ჟურნალისტი ევან გერშკოვიჩი აშშ-სთან პატიმართა გაცვლის შეთანხმების ფარგლებში გაათავისუფლა. ჟურნალისტის გათავისუფლება რუსეთსა და აშშ-ს შორის პატიმართა გაცვლის შესახებ დადებული ხელშეკრულების ფარგლებში მოხდა.
რუსეთის სამთავრობო თვითმფრინავი ანკარაში ხუთშაბათს ნაშუადღევს დაეშვა - ინფორმაცია Reuters-მა გაავრცელა, უცნობია, ვინ იმყოფებოდა თვითმფრინავის ბორტზე.
საინფორმაციო სააგენტო Bloomberg-მა დღეს შუადღისას (ხუთშაბათს) გაავრცელა ინფორმაცია, რომ რუსეთის ხელისუფლებამ ამერიკის ორი მოქალაქე გაათავისუფლა. ესენი არიან: "Wall Street Journal"-ის რეპორტიორი ევან გერშკოვიჩი და ყოფილი საზღვაო ქვეითი პოლ უელანი - ორივე მათგანს ჯაშუშობა ედებოდა ბრალად.
პოლ უელანი 2018 წლის დეკემბერში დააკავეს, როცა მოსკოვში შვებულებაში იმყოფებოდა. რუსეთი, თავის მხრივ, ამტკიცებს, რომ იგი ჯაშუშობით იყო დაკავებული. სასამართლო პროცესზე ბრალდების მხარემ განაცხადა, რომ უელანი აშშ-ის თავდაცვის დეპარტამენტის სადაზვერვო სააგენტოს წევრი იყო. მას 16 წლით თავისუფლების აღკვეთა მიუსაჯეს. "ინფორმირებულმა წყაროებმა" რუს ჟურნალისტებს განუცხადეს, რომ შეთანხმების ფარგლებში მოსკოვი გაათავისუფლებს თავის 20-30 პოლიტპატიმარს, მათ შორის ჟურნალისტებს და ოპოზიციონერებს.
რუსული ცნობების თანახმად, უელანისა და გერშკოვიჩის გარდა, რუსეთმა გაათავისუფლა კიდევ რამდენიმე პატიმარი. მათ შორის:
ვლადიმერ კარა-მურზა - 2022 წელს "უცხო ქვეყნის აგენტად“ გამოაცხადეს და უკრაინაში რუსი სამხედროების ქმედებების შესახებ ცრუ ინფორმაციის გავრცელებაში დაადანაშაულეს. სასამართლომ მას 25 წლით თავისუფლების აღკვეთა მიუსაჯა.
ილია იაშინი - სასამართლომ რუსეთის არმიის შესახებ ე.წ. ყალბი ცნობების გავრცელებაში დამნაშავედ ცნო და 8,5 წლით თავისუფლების აღკვეთა მიუსაჯა.
ოლეგ ორლოვი - ორლოვს რუსეთის შეიარაღებული ჯარების დისკრედიტაციაში დასდეს ბრალი მას შემდეგ, რაც თქვა რომ რუსეთი ტოტალიტარულ რეჟიმად იქცა და ჯორჯ ორუელის 1984-ს დაემსგავსა.
ალსუ კურმაშევა - "რადიო თავისუფლების" თათარ-ბაშკირული სამსახურის ჟურნალისტo რომელსაც ორმაგი - რუსეთის და აშშ-ის - მოქალაქეობა აქვს, მას 19 ივლისს რუსეთის სასამართლომ 6,5 წლით მიუსაჯა პატიმრობა.
- The New York Times-ის წყარომ დაადასტურა, რომ პატიმრებს შორის არის უსაფრთხოების ფედერალური სამსახურის წევრი ვადიმ კრასიკოვი, რომელიც გერმანიაში 2019 წელს დააკავეს - მას ბრალად ედება ზელიმხან ხანგოშვილის მკვლელობა ბერლინში. Frankfurter Allgemeine Zeitung-ის ინფორმაციით, გერმანიის ფედერალური პროკურატურის დეპარტამენტი იმედგაცრუებულია ვადიმ კრასიკოვის რუსეთში ექსტრადაციის გადაწყვეტილებით. გარდა ამისა სლოვენია გაათავისუფლებს ორ რუს ჯაშუშს: არტემ და ანა დოლჩევებს.