ნანი ბრეგვაძე, ნუცა ბუზალაძე და სხვები აზერბაიჯანში, ბუბა კიკაბიძის ვარსკვლავის გახსნაზე -"მოულოდნელად ნანიმ ოქროს საყურე დაკარგა"
აზერბაიჯანში, ბაქოსთან, კურორტ "სიბრიზის" დიდების ხეივანში ვახტანგ (ბუბა) კიკაბიძის სახელობის ვარსკვლავი გაიხსნა... საზეიმო გახსნაზე თბილისიდან საგანგებოდ არტისტის მეგობრები - ნანი ბრეგვაძე, სოსო აბზიანიძე და სხვები იყვნენ მიწვეული...
სოსო აბზიანიძე აზერბაიჯანიდან დაბრუნების შემდეგ გვესაუბრა...
- აზერბაიჯანში ვახტანგ კიკაბიძის სახელობის ვარსკვლავი გაიხსნა... მიწვეულები ვიყავით - ნანი ბრეგვაძე, ეკა მამალაძე, ნუცა ბუზალაძე, დავით ხუჯაძე, მე და სხვები... აზერბაიჯანში დიდი საზოგადოება დაესწრო, მათ შორის ამერიკელი კომპოზიტორი დევიდ ფოსტერი, ნიკოლ შენზინგერი, ქეთრინ მაკფი...
- აზერბაიჯანში ბუბა კიკაბიძე განსაკუთრებულად უყვარდათ...
- დიახ, ბუბას პრეზიდენტობაზე კენჭი რომ ეყარა, გაიმარჯვებდა, იმდენად დიდი სიყვარული ჰქონდა ხალხში... აზერბაიჯანში ვარსკვლავების გახსნის პოლიტიკა გასულ წელს ჩამოყალიბდა. გარდაცვლილებს ვარსკვლავს ძალიან იშვიათად, თითქმის არ უხსნიან, მაგრამ ამჯერად გამონაკლისი დაუშვეს. ყველას გვახსოვს, ჩვენი ლეგენდა ნანი ბრეგვაძის და აზერბაიჯანელი მომღერლის - ემინის დუეტი "ყვავილების ქვეყანა", რომელსაც დიდი გამოხმაურება ჰქონდა...
ეს სიმღერა ბუბა კიკაბიძეს ეკუთვნოდა და ემინმა სთხოვა, ვიმღერებო. ბუბამ თანხმობა მისცა, მაგრამ როდესაც ემინმა დაურეკა და მოასმენინა, მყისვე შეაწყვეტინა და უთხრა, ეგ სიმღერა რუსულად არა, ქართული უნდაო... ემინმა ერთ კვირაში შეისწავლა ქართული, დაურეკა და ბუბამ თანხმობა მისცა, ქართულ ენაზე ემღერა. შემდეგ ბუბას ჯანმრთელობის მდგომარეობა გაუარესდა, მალე გარდაიცვალა და გამოსავალი ვიპოვეთ, ნანი ბრეგვაძესთან ემღერა დუეტი, რასაც მალევე ნანი ბრეგვაძის ვარსკვლავის გახსნა მოყვა. ვარსკვლავი ჯერ ბუბა კიკაბიძის უნდა გახსნილიყო, მაგრამ ასე მოხდა... ეს პირველი შემთხვევაა, როცა გარდაცვლილს ვარსკვლავი გაუხსნეს. ხალხმაც ეს ფაქტი ძალიან დიდი სიყვარულით მიიღო.
- როგორ ჩაიარა ვახტანგ კიკაბიძის ვარსკვლავის გახსნის ცერემონიამ?
- ხალხმა ეს ფაქტი ძალიან დიდი სიყვარულით მიიღო, ეს ყოველმხრივ იგრძნობოდა.... ძალიან მოულოდნელი რამეც მოხდა. ქალბატონ ნანიმ საკმაოდ ძვირადღირებული ოქროს საყურე დაკარგა და როცა გავიგეთ, უკვე ორი საათის წამოსულები ვიყავით. მაინც გადავწყვიტეთ მივსულიყავით, სადაც ვარსკვლავის გახსნაზე უამრავი ხალხი იყო, ძლიერი ქარი და დაკარგული საყურის პოვნის იმედიც ნაკლებად გვქონდა... როგორც კი მივედით, ერთი მოქალაქე მოვიდა და გვითხრა, ქალბატონ ნანის საყურე დაეკარგა და მე ვიპოვეო.. ასე გადმოგვცა ეს ძვირადღირებული საყურე, რაც ძალიან სასიამოვნო იყო.