ლუკაშენკო მზად არის შეიწყალოს გერმანიის მოქალაქე, რომელსაც ბელარუსში სიკვდილი მიუსაჯეს - კრიგერის სკანდალური საქმის დეტალები
პრეზიდენტმა, ალექსანდრე ლუკაშენკომ გადაწყვიტა გერმანიის მოქალაქე რიკო კრიგერი შეიწყალოს - მას ბელარუსში ტერორიზმის საქმეზე სიკვდილი მიუსაჯეს.
ლუკაშენკოს გადაწყვეტილებას ქვეყნის ლიდერის პრესსამსახურზე დაყრდნობით სახელმწიფო სააგენტო BElTA ავრცელებს. ამასთან, შეწყალების ბრძანება, რომელსაც ლუკაშენკომ ხელი უნდა მოაწეროს, ჯერ არ გავრცელებულა.
- რამდენიმე დღით ადრე ლუკაშენკოს პრესსამსახურმა გაავრცელა ინფორმაცია, რომ კრიგერმა შეწყალების თხოვნით პრეზიდენტს მიმართა. რის შემდეგაც, აღნიშნულ საკითხთან დაკავშირებით კონსულტაციები მიმდინარეობდა.
მოგვიანებით, შეხვედრის შემდეგ, კრიგერის ადვოკატმა ვლადიმერ გორბაჩმა განაცხადა, რომ მას ლუკაშენკოს მხრიდან “ჰუმანიზმის აქტის“ იმედი აქვს.
ის ფაქტი, რომ ბელარუსის სასამართლომ კრიგერს სასიკვდილო განაჩენი გამოუტანა, 19 ივლისს გახდა ცნობილი. გერმანიის მოქალაქეს ბრალი წაუყენეს სისხლის სამართლის ექვსი მუხლით, მათ შორის ტერორისტული აქტის ჩადენის, “ექსტრემისტული ფორმირების“ შექმნისა და ფარული საქმიანობის მუხლით.
-
რა არის ცნობილი კრიგერის საქმის შესახებ?
კრიგერის წინააღმდეგ საქმის დეტალები მას შემდეგ გახდა ცნობილი, რაც Mediazona-Belarus-ის გამოცემამ მიიღო წვდომა განაჩენზე და ერთ-ერთმა მთავარმა ბელარუსელმა პროპაგანდისტმა ლუდმილა გლადკაიამ, რომელიც სასამართლო პროცესს ესწრებოდა, გამოაქვეყნა თავისი შთაბეჭდილებები Telegram-ის არხზე.
- წყაროების თანახმად, 2023 წლის “არაუგვიანეს 20 სექტემბრისა“, რიკო კრიგერი, გერმანიაში ყოფნისას, საკუთარი ინიციატივით დაუკავშირდა უკრაინის უშიშროების სამსახურის და კალინოვსკის პოლკის წარმომადგენლებს (ეს არის ბელორუსების სამხედრო ფორმირება, რომელიც უკრაინის მხარეზე იბრძვის). მათთან საუბარში კრიგერი, სავარაუდოდ, დათანხმდა ბელორუსის ტერიტორიაზე დივერსიაში მონაწილეობას.
განაჩენიდან ირკვევა, კრიგერი მინსკში 2 ოქტომბერს ჩავიდა, როგორც ტურისტი, ხოლო 3 ოქტომბერს მოგილევის რეგიონში ოსიპოვიჩის რკინიგზის სადგურის მიდამოში “გადაიღო ფოტოები კოორდინატების გამოყენებით“. 4 ოქტომბერს კი იგივე კვლევა ჩაატარა კოლოდიშის სადგურზე, ბელარუსის დედაქალაქიდან ჩრდილო-აღმოსავლეთით 20 კილომეტრში.
შემდეგ, გლადკაიამ დაწერა, რომ გერმანელმა, სავარაუდოდ, მიიღო კოორდინატები, სადაც იყო ხელნაკეთი ასაფეთქებელი მოწყობილობა და 5 ოქტომბრის საღამოს დაამონტაჟა ოზერიშჩეს სადგურის რკინიგზის ლიანდაგზე.
აფეთქება, რომელშიც კრიგერი დაადანაშაულეს, 5 ოქტომბერს გვიან მოხდა. შედეგად არავინ დაშავებულა, სახელმწიფომ კი ზარალი Mediazona-Belarus-ის მიერ მოპოვებული მონაცემებით 1639 ბელარუსულ რუბლად შეაფასა, რაც 516 აშშ დოლარს შეესაბამება.
6 ოქტომბერს, როგორც განაჩენიდან ირკვევა, რიკო კრიგერი მინსკიდან ბაქოში უნდა გაფრენილიყო, მაგრამ დააკავეს.
იხილეთ ასევე: