"ძალიან ნაწყენი ვარ... ერთი ნაბიჯი დაგვაკლდა საოცნებო მიზნამდე" - ტატო გრიგალაშვილის პირველი კომენტარი ოლიმპიური ვერცხლის აღების შემდეგ
პარიზის ოლიმპიადის ვერცხლის მედალოსანი, ქართველი ძიუდოისტი ტატო გრიგალაშვილი ფინალის შემდეგ პირველ კომენტარს აკეთებს.
მისი თქმით, საწყენია, როდესაც მიზნამდე მიდიხარ და მთავარი მოგების გარეშე რჩები.
"ძალიან ნაწყენი ვარ, რადგან მეც და ჩემი გუნდიც ვგეგმავდით, ოქროსთვის უნდა გვებრძოლა, ასეც ვქენით თუმცა ერთი ნაბიჯი დაგვაკლდა საოცნებო მიზნამდე. რთულია, როცა კონკრეტულ მომენტში უკვე იქ ხარ, სადაც შენი მიზანია და რჩები ისე. წარმატება ბევრისთვის აქ მოხვედრაა საოცნებო. მე ფინალი ვიჭიდავე, მაგრამ ფერი აკლია ამ ყველაფერს" - თქვა ტატომ. მის კომენტარს საზოგადოებრივი მაუწყებელი ავრცელებს.
ცნობისთვის, ტატო გრიგალაშვილი ფინალში იაპონელ ტაკანორი ნაგასესთან დამარცხდა, რომელიც ტოკიოს 2020 წლის ოლიმპიადის გამარჯვებულია. ცნობისთვის, ნაგასე ასპარეზობს -81კგ წონით კატეგორიაში. 2016 წელს მოიპოვა ბრინჯაოს მედალი ზაფხულის ოლიმპიურ თამაშებზე. 2020 წლის ზაფხულის ოლიმპიადაზე მოახერხა ოქროს მედლის მოპოვება. 2015 წელს მოიგო მსოფლიო ჩემპიონატი.
ტატო ოლიმპიადას მსოფლიოს ზედიზედ სამჯერ მოპოვებული ჩემპიონობით შეხვდა, პარიზში კი მე-2 ნომრად იყო განთესილი. ის წინა ოლიმპიადაზეც ფავორიტად მიიჩნეოდა, თუმცა ერთი შეცდომა ძვირად დაუჯდა...
წაიკითხეთ ასევე:
ნახეთ ტატო გრიგალაშვილის ფინალური შეხვედრა