"ფოტოზე ორ სპორტსმენს ხედავთ, სინამდვილეში სამნი ვართ" - 7 თვის ორსული მოფარიკავე ოლიმპიადაზე: რა არის ცნობილი ეგვიპტელზე, რომლის "აღიარებამ" დიდი გამოხმაურება დაიმსახურა
პარიზის ოლიმპიადაზე ეგვიპტელმა მოფარიკავემ ნადა ჰაფესმა, რომელიც შვიდი თვის ორსულია აშშ-ს ნაკრების მოფარიკავის, ელიზაბეტ ტარტაკოვსკის დამარცხება მოახერხა. ორსულობის მიუხედავად, ჰაფესმა ტარტაკოვსკი ანგარიშით 15-13 დაამარცხა.
სწორედ შეხვედრის შემდეგ გამოაქვეყნა "ინსტაგრამზე" პოსტი სპორტსმენმა და აღნიშნა, რომ 7 თვის ორსულია.
"ფოტოზე ორ სპორტსმენს ხედავთ, სინამდვილეში კი სამნი ვართ: მე, ჩემი კონკურენტი და ჩემი პატარა. გამოწვევები მქონდა, როგორც ფიზიკური, ასევე ემოციური. ორსულობა თავისთავად რთულია. ბრძოლა ცხოვრებისა და სპორტის ბალანსის შესანარჩუნებლად დაძაბული იყო, თუმცა ღირდა.
ამ პოსტს ვწერ, რადგან ძალიან ამაყი ვარ მერვედფინალში ადგილის დამკვიდრების გამო! ამ ბედნიერებას ჩემს მეუღლესა და ოჯახს ვუზიარებ" - დაწერა მან.
- პარიზის ოლიმპიურ თამაშებში უფრო მეტი ბავშვიანი ქალი მონაწილეობს, ვიდრე ოდესმე . ოლიმპიურ სოფელს პირველად აქვს ბაგა-ბაღი. ოლიმპიურმა ნიჩბოსანმა ჰელენ გლოვერმა განაცხადა, რომ თამაშები ცვლის დამოკიდებულებას დედების მიმართ, რომლებიც უმაღლეს დონეზე ასპარეზობენ.
"ბევრ მამაკაც სპორტსმენს ჰყავს შვილი. ამაზე არავინ საუბრობს, რადგან ეს არაფერს ცვლის" - აღნიშნა მან.
ნადა ჰაფეზი ეგვიპტელი მოფარიკავეა. 2014 წელს იგი გახდა ეგვიპტის ეროვნული სენიორ ფარიკაობის საბერ ქალთა ნაკრების წევრი. ჰაფეზმა აფრიკის ზონალურ ჩემპიონატზე ერთი ვერცხლი (2018) და ორი ბრინჯაო (2019, 2014) მოიგო. გარდა ამისა, იგი არის ეგვიპტის ეროვნული ჩემპიონი ტანვარჯიშში. დამთავრებული აქვს კაიროს უნივერსიტეტი, სადაც 2022 წელს მედიცინის ხარისხი მიიღო.
2024 წლის ოლიმპიურ თამაშებზე მან ამერიკელი ელიზაბეტ ტარტაკოვსკი დაამარცხა, თუმცა, მოგვიანებით, სამხრეთ კორეელ ჯეონ ჰა-იანგთან დამარცხდა.