ფინანსური პრობლემების გამო დაწყებული ფარიკაობა და 5 ოლიმპიური მედალი, წარუმატებელი პირადი ცხოვრებისა და კარიერული სკანდალის ფონზე -  უკრაინელი მოფარიკავის "სთორი"

უკრაინელმა მოფარიკავემ ოლგა ჰარლანმა პარიზის ოლიმპიადაზე საკუთარ ქვეყანას პირველი მედალი მოუტანა და ბრინჯაოს პრიზიორი გახდა.

"რა მედალიც არ უნდა ყოფილიყო, ჩემთვის ის ოქროსია. იმიტომ რომ, ყველაფერი რის გავლაც გვიწევს, რის გავლაც უწევს თითოეულ უკრაინელს, ამის გადმოცემა უბრალოდ შეუძლებელია. ამ გამარჯვებას ვუძღვნი ჩვენს დამცველ კაცებსა და ქალებს, ასევე იმ სპორტსმენებს, რომლებიც, სამწუხაროდ, აქ ვერ ჩამოვიდნენ, იმიტომ რომ ისინი რუსეთმა მოკლა" - განაცხადა ოლგამ გამარჯვების შემდეგ.

უკრაინელ სპორტსმენმა გამარჯვებამდე საინტერესო გზა განვლო. ის გარდა სპორტული წარმატებებისა არაერთხელ გახდა ყვითელი მედიის ინტერესი. ქვევით ოლგას ცხოვრებაზე მოგიყვებით.

როგორ დაიწყო ჰარლანმა ფარიკაობა

გოგონა უკრაინის ქალაქ ნიკოლაევში დაიბადა, მაგრამ მოგვიანებით საცხოვრებლად კიევში გადავიდა. მამამისი ნაოსნობით იყო დაკავებული, თავად კი სამეჯლისო ცეკვებზე დადიოდა. ფარიკაობა შეიძლება არც ყოფილიყო მის ცხოვრებაში, რომ არა ოჯახში ფინანსური პრობლემები.

”მახსოვს, რომ ფეხსაცმელი მომეწონა და ძვირი ღირდა. ჩემს ოჯახს საკმაოდ რთული პერიოდი ჰქონდა და ამიტომ თანხა, რომელიც საჭირო იყო ინდივიდუალური გაკვეთილებისა და სემინარებისთვის, ვერ ვიხდიდით. ეს გახდა მიზეზი, რომ ცეკვას თავი დავანებე“, - აღიარა მოგვიანებით ინტერვიუში.

ცხრა წლის ასაკში ოლგა ფარიკაობაზე მიიყვანეს. ჰარლანის პირველი მწვრთნელი მისი ბიძა იყო. ხუთი წლის შემდეგ, სპორტსმენი პირველად გამოვიდა ზრდასრულთა ევროპის ჩემპიონატზე, სადაც მეოთხედფინალამდე მიაღწია. სამი წლის შემდეგ, 18 წლის ასაკში, პეკინის ოლიმპიადაზე გუნდურ გამოსვლაში ოქრო მოიგო. კარიერის განმავლობაში ოლგამ ოთხჯერ მოიპოვა ოლიმპიური მედალი და ხუთჯერ მსოფლიო ჩემპიონი გახდა.

წარუმატებელი პირადი ცხოვრება და ჭორები

ჰარლანი არასოდეს მალავდა პირად ცხოვრებაში არსებულ სიახლეებს. 2014 წლის აგვისტოში მოფარიკავე დიმიტრი ბოიკოზე დაქორწინდა, მაგრამ ისინი ოთხი წლის შემდეგ დაშორდნენ. ქალის თქმით, მათთვის რთული იყო დისტანციურად ურთიერთობის შენარჩუნება - ოლგას ქმარმა გადაწყვიტა სამუშაოდ აშშ-ში წასულიყო, მას კი არ სურდა უკრაინის დატოვება.

”როდესაც 7 თვე არ გვენახა ერთმანეთი, მივხვდი, რომ, ეს ადამიანი უკვე უცხო იყო ჩემთვის. მაშინ ერთი კვირით ჩამოვიდა და ისევ წავიდა. ჩემი დაბადების დღის შემდეგ ვუთხარი, რომ აღარ მინდოდა მასთან საუბარი.“ - ამბობს ოლგა.

განქორწინების შემდეგ, მოფარიკავემ განაცხადა, რომ მისი ახალი რჩეული ევროპის ჩემპიონი, ოლიმპიური და მსოფლიო ჩემპიონატების მედალოსანი იტალიელი ლუიჯი სამელე გახლდათ.

"მე მზად ვარ ჩემი საიდუმლო გაგიმხილოთ. მე ახალ ურთიერთობაში ვარ. თავიდან ვმალავდით, ვფიქრობდით, რომ ხალხი ამას არასწორად გაიგებდა. რამდენიმე თვის შემდეგ კი ჩემს მშობლებს მოვუყევი“, - ჰყვებოდა შოუ "ცეკვავენ ვარსკვლავებში“, რომელშიც 2021 წელს მონაწილეობდა.

"კონკურსის პერიოდი ძალიან რთული იყო ჩემს ცხოვრებაში. ლუიჯი ხედავდა როგორ ვეფერებოდი ჩემს ლამაზ პარტნიორს“, - აღიარა ჰარლანმა. საბოლოოდ წყვილმა მოახერხა სირთულეების გადალახვა.

სად ცხოვრობს ახლა ჰარლანი

უკრაინაში ომის დაწყების შემდეგ, მოფარიკავე მეგობარ ბიჭთან ერთად იტალიაში ცხოვრობს და ვარჯიშობს.

2023 წლის ივნისში ევროპის ჩემპიონობა უკრაინის შეიარაღებულ ძალებს მიუძღვნა. "ეს ჯილდო პირველ რიგში მათთვისაა. ეს გამარჯვება უპირველეს ყოვლისა ჩვენი ქვეყნისთვის და ასევე პირადად ჩემთვის ძალიან მნიშვნელოვანია, რადგან მინდოდა გამარჯვება მომეტანა უკრაინისთვის და ჩვენი მებრძოლებისთვის.“

სკანდალები

2023 წლის ევროპის ჩემპიონატზე ოლგა ჰარლანმა 1/32 ფინალში რუსი ანა სმირნოვა ანგარიშით 15:7 დაამარცხა. დასრულების შემდეგ, სმირნოვამ მეტოქისთვის ხელის ჩამორთმევა სცადა, მაგრამ უკრაინელმა დაშნით გზა გადაუღობა და მას მიახლოების საშუალება არ მისცა. უარყოფის ნიშნად თავი გააქნია და ამ ჟესტითაც მიანიშნა, რომ მისალმებას არ აპირებდა.

საბოლოოდ, ფარიკაობის საერთაშორისო ფედერაციამ 2008 წლის ოლიმპიური ჩემპიონი ჰარლანი ჩამოაშორა მსოფლიო ჩემპიონატს და ორთვიანი დისკვალიფიკაცია მისცა.

მოგვიანებით, ოლგა დისკვალიფიკაცია ნაწილობრივ მოუხსნეს და მილანში მიმდინარე მსოფლიოს ჩემპიონატზე გუნდურ ასპარეზობაში მონაწილეობის უფლება მისცეს.

მსგავსი ინციდენტი მოხდა 2024 წლის ივნისშიც, როდესაც ევროპის ჩემპიონატზე ასპარეზობის შემდეგ უკრაინელმა მოფარიკავემ, ამჯერად ელენა კრივიცკაიამ საქართველოს სახელით მოასპარეზე მაია გუჩმაზოვას ხელი არ ჩამოართვა.

შეხვედრა კრივიცკაიას გამარჯვებით, ანგარიშით 15:9 დასრულდა. გუჩმაზოვა უკმაყოფილო იყო კონკურენტის საქციელით, რომელმაც ხელის ჩამორთმევაზე უარი თქვა.

გუჩმაზოვა წარმოშობით ვლადიკავკაზელია და 2017 წლიდან საქართველოს სახელით ასპარეზობს. გოგონას ბებია ქართველი ჰყავს, მშობლები კი თავიდან ძმას ხეობაში ცხოვრობდნენ.