პარიზი 2024-ის ყველაზე ასაკოვანი ოლიმპიელი, რომლის გამოსვლაც სენსაციად იქცა - ვინ არის 61 წლის მაგიდის ჩოგბურთელი, რომელიც 30 წლით უმცროს სპორტსმენებს ტოლს არ უდებს

ზოგადად, დამკვიდრებულია წარმოდგენა, რომ სპორტსმენებს თავიანთი სპორტული კარიერის პიკი 30 წლამდე აქვთ და ხშირად 30-35 წლის შემდეგ ისინი კარიერას ასრულებენ.

თუმცა ეს არ შეეხება შანხაიში დაბადებულ 61 წლის მაგიდის ჩოგბურთელ ნი ქსია ლიანს. პარიზის ოლიმპიადაზე ის ლუქსემბურგის სახელით გამოვიდა.

2024 წლის პარიზის ოლიმპიადაზე ლიანი მაგიდის ჩოგბურთის ყველაზე ასაკოვანი მოთამაშეა. მისი საერთაშორისო დებიუტი 1970-იან წლებში შედგა. პენსიაზე გასვლა და დაბრუნება ორჯერ მოასწრო. ახლა კი მაგიდის ჩოგბურთის ვარსკვლავი მსოფლიოს მაშტაბით გახდა.

ნი ქსია ლიანი სენსაციად იქცა მას შემდეგ, რაც 28 ივლისს, ქალთა ინდივიდუალურ შეჯიბრში, პირველი რაუნდის მატჩში 31 წლის თურქ სიბელ ალტინკაიას ანგარიშით 4-2 მოუგო. ამით, ის გახდა ყველაზე ასაკოვანი მაგიდის ჩოგბურთელი, რომელმაც ოლიმპიადაზე მოიგო. ამჟამად ის მსოფლიოში 53-ე ადგილზეა.

შანხაიში დაბადებულმა სპორტსმენმა, რომელიც ოლიმპიურ თამაშებში მეექვსედ მონაწილეობს, კარიერა ახალგაზრდა ასაკში დაიწყო. ის ჩინეთის წარმომადგენელი გუნდის ნაწილი იყო.

20 წლის ასაკში, 1983 წლის მსოფლიო ჩემპიონატზე მაგიდის ჩოგბურთში ოქრო მოიგო. მაშინ მაგიდის ჩოგბურთი ჯერ კიდევ არ იყო ოფიციალურად ოლიმპიური სახეობა, ის მხოლოდ 1988 წლის სეულის ოლიმპიადაზე აღიარეს.

1989 წელს, ჩინეთის ნაკრებიდან წასვლის შემდეგ, ლიანგი გერმანიაში გადავიდა. ორი წლის შემდეგ კი ლუქსემბურგში და მას შემდეგ წარმოადგენს ამ ევროპულ ქვეყანას.

შვედი მაგიდის ჩოგბურთელი ტომი დანიელსონი მისი მეუღლე და მწვრთნელია. წყვილს ვაჟი ჰყავს, რომელიც ფიზიოთერაპევტია.

• “მე ვარ ყველაზე უფროსი სპორტსმენი და ვარ მაგალითი ბავშვებისთვის, ახალგაზრდებისთვის, რომლებიც ცდილობენ გააკეთონ თავიანთი მაქსიმუმი. სიმართლე გითხრათ, ჩემი ასაკი არასოდეს მახსოვს, მაგრამ კარგი იქნებოდა ისევ 16 წლის ვიყო!" - განაცხადა მან მედიასთან გამარჯვების შემდეგ.

31 ივლისს ლიანგი დაუპირისპირდება 23 წლის მსოფლიოს პირველ ნომერს ჩინეთის გუნდიდან სან უინგშას. ბევრი მოუთმენლად ელის წყვილის დაპირისპირებას, რომელთა შორის ასაკობრივი სხვაობა 38 წელია.

"მსოფლიოს პირველ ნომერთან თამაში ჩემთვის საუკეთესო შანსია. უბრალოდ, მსურს მშვენიერი მატჩი მქონდეს, მაგრამ, რა თქმა უნდა, ყველაფერს ვითვალისწინებ“, - თქვა ლიანმა.

• ნი ქსია ლიანი - შთაგონება ყველა თაობისთვის

61 წლის სპორტსმენი მაგიდის ჩოგბურთს 50 წელზე მეტია თამაშობს.

“ძალიან გამიმართლა, რომ კვლავ შემიძლია ასე თავისუფლად ვითამაშო კორტზე, მადლობელი ვარ. ასაკიდან გამომდინარე ვერ ვვარჯიშობ ისე, როგორც ადრე, როცა პატარა ვიყავი. ჩემთვის მთავარია, არ დავშავდე. ძალიან მნიშვნელოვანია ისიც, თუ როგორ დავასვენებ სხეულს სწორად. ფიზიკური ძალების შესანარჩუნებლად დავდივარ სპორტ დარბაზში და ასევე ვსტუმრობ ფიზიოთერაპევტს“, - ამბობს ლიანგი ერთ-ერთ გამოცემასთან.

მისი თქმით, სურს მისი თანატოლებისთვის და მომავალი თაობისთვის მაგალითის, მოტივაციის მიმცემი იყოს... მისი თქმით, დანებება არასოდეს არის გამოსავალი.

წყარო

იხილეთ ასევე:

• ქართველები, რომლებიც პარიზის ოლიმპიადაზე სხვა ქვეყნების სახელით ასპარეზობენ: "თავს ისე ვგრძნობ, თითქოს ორი დროშის ქვეშ ვიბრძვი"
• რა თქვა კომენტატორმა ოლიმპიადაზე მოცურავეების შესახებ, რის გამოც გაათავისუფლეს? - "ეს სექსისტური განცხადება იყო"
• სამგზის ოლიმპიური ჩემპიონის ახალი გამოწვევა - ვინ არის Paris2024-ის საორგანიზაციო კომიტეტის ქარიზმატული პრეზიდენტი, რომელიც გახსნის სკანდალური შოუს მთავარი შემოქმედია?