ჩრდილოეთ კორეაში წყალდიდობის გამო საგანგებო მდგომარეობა გამოცხადდა - როგორ ეცნობა დიქტატორი სტიქიის შედეგად მიღებულ ზარალს (ფოტოები)
ჩრდილოეთ კორეის ლიდერმა კიმ ჩენ ინმა ჩინეთის საზღვართან მდებარე დატბორილი ტერიტორიები დაათვალიერა. საინფორმაციო სააგენტო Reuters-ის ცნობით, კოკისპირულმა წვიმამ, რომელიც ჩრდილოეთ კორეაში სინუიჯუსა და ჩინეთთან მოსაზღვრე სხვა რაიონებში მოვიდა, 5000-მდე ადამიანი დააზარალა.
საევაკუაციო სამუშაოებში სამხედროებიც არიან ჩართულები, რომლებმაც 10 თვითმფრინავის გამოყენებით, დაახლოებით 20 რეისის საშუალებით, 4200 ადამიანის ევაკუაცია განახორციელეს.
ჩრდილოეთ კორეის ლიდერმა კიმ ჩენ ინმა სამხედროები საევაკუაციო პროცესში გაწეული ძალისხმევისთვის შეაქო, თუმცა გააკრიტიკა ჩინოვნიკები არასაკმარისი მომზადების გამო, რათა თავიდან ყოფილიყო აცილებული ძლიერი წვიმის შედეგად მიყენებული ზიანი.
კიმ ჩენ ინმა დატბორილ ზონებში საგანგებო მდგომარეობა გამოაცხადა. ჩრდილოეთ კორეის სახელმწიფო მედიამ კი გაავრცელა ფოტოები, სადაც ჩანს, როგორ ეცნობა დიქტატორი წყალდიდობის შედეგებს. როგორც ერთ-ერთ ფოტოზე ხედავთ, კიმ ჩენ ინი შავი Lexus-ით გადაადგილდება.
