დაბინძურებული სენა და ჩაშლილი წვრთნები - როდის მოხერხდება ტრიათლონში ოლიმპიური მედლების გათამაშება?
ოლიმპიადის ორგანიზატორებმა სენის მდინარეში ტრიათლონის წვრთნის მეორე დღე ჩაშალეს. წვრთნები ორშაბათს იყო დაგეგმილი, თუმცა პარიზში უქმეებზე წვიმდა, რამაც მდინარე დააბინძურა. თუმცა, ორგანიზატორების თქმით, ისინი "დარწმუნებულები არიან", რომ მედლებისთვის ბრძოლა ამ კვირაში გაიმართება.
- ტრიათლონი - სპორტის კომპლექსური და ერთ-ერთი ყველაზე რთული სახეობა. რომელიც მოიცავს ველორბოლას, ცურვასა და მარათონულ რბენას. კაცთა და ქალთა შორის ევროპის ჩემპიონატი იმართება 1985 წლიდან; მსოფლიოს ჩემპიონატი - 1989 - დან, ხოლო ოლიმპიური თამაშების პროგრამაშია 2000 წლიდან.
ერთობლივ განცხადებაში პარიზი 2024-ის ორგანიზატორებმა და მსოფლიო ტრიათლონის ორგანიზაციამ განაცხადეს, რომ მათ მიიღეს გადაწყვეტილება, ორშაბათის ცურვის საწვრთნელი სესია გაეუქმებინათ, რადგან "წყლის ხარისხის დონე არ იძლევა საკმარის გარანტიებს" მის ჩასატარებლად.
ტრიათლონი პირველი ოლიმპიური ღონისძიებაა, რომელიც მარათონულ ცურვამდე, თამაშების მეორე კვირაში სენაში უნდა გაიმართოს.
დაბინძურების დონის გამო ასევე კვირას დაგეგმილი ცურვის საწვრთნელი სესია გაუქმდა.
მამაკაცთა ინდივიდუალური ტრიათლონის შეჯიბრების გამართვა სამშაბათს, დილის 8:00 საათზეა დაგეგმილი, ხოლო ქალთა ინდივიდუალური შეჯიბრება ოთხშაბათს ჩატარდება.
სენის წყლის ხარისხი პარიზში და მის შემოგარენში მოსული წვიმის რაოდენობაზეა დამოკიდებული.
მძიმე წვიმა, როგორიც პარასკევს თამაშების გახსნის ცერემონიის დროს იყო, ქალაქის საკანალიზაციო სისტემას ტვირთავს, რაც წყალში გაუწმენდავი ჩამდინარე წყლების ჩადინებას განაპირობებს.