"გამომიცდია მარცხი და ყოველთვის ვგრძნობ, რომ ღმერთი უკეთესისთვის მამზადებს" - რას წერს ოლიმპიელი გიორგი სარდალაშვილი?
პარიზის ოლიმპიადაზე ბრინჯაოს მედლისთვის მებრძოლი ქართველი ძიუდოისტი გიორგი სარდალაშვილი ესპანელ ფრანსისკო გარიგოსთან დამარცხდა. სპორტსმენი სოციალურ ქსელში ემოციურ მიმართვას ავრცელებს და წერს, რომ მომდევნო ოლიმპიური თამაშებისთვის მოსამზადებლად წინ ოთხი წელია და მეტის სურვილი აქვს. "გამომიცდია მარცხი და ყოველთვის ვგრძნობ, რომ ღმერთი უკეთესისთვის მამზადებს", - წერს სარდალაშვილი.
"რთულია, სიტყვებს მოუყარო თავი, მაგრამ თქვენ იმხელა სითბო მაგრძნობინეთ, ჩემო ქართველებო, რომ აუცილებლად უნდა დავწერო. ძალიან მიყვარხართ, მადლობა ყველას! სამწუხაროდ, ჩემი ბავშვობის ნანატრი ოქროს მედალი პარიზის ოლიმპიურ თამაშებზე ვერ მოვიპოვე. იყო ბევრი დაბრკოლება, მაგრამ არ დავიწყებ ამ ყველაფრის წერას, ეს ხომ ცხოვრებაა და მე არ გავურბივარ სირთულეს.
აქამდე არ მესმოდა, როცა ამბობდნენ, გამოცდილებით აჯობაო და ახლა უკვე ვიცი, რას ნიშნავს ეს ყველაფერი. მარცხის შემდეგ მე და მწვრთნელები ათმაგად მოტივირებულები ვართ. ჩემი სურვილიც ათმაგად მეტია და წინ ოთხი წელი მაქვს მოსამზადებლად. 2020 წელს, როცა ნაკრებში მოვხვდი, იქიდან დღემდე ალბათ სახლში, ჯამში, 20-ჯერ ვიქნები ნამყოფი. სულ შეკრებებზე ვიყავით. მე, ლექსო მასწავლებელი და დავით ქევხიშვილი.
ამით კი იმის თქმა მინდა, რომ ამ სპორტს ყოველდღიურად ვაძლევ 100%-ს. ამიტომ ეს ისე არ ჩაივლის, ჩემი სურვილების 100% არ დავიკმაყოფილო. ყველაფერი კარგად იქნება! გამომიცდია მარცხი და ყოველთვის ვგრძნობ, რომ ღმერთი უკეთესისთვის მამზადებს! დიდი მადლობა ყველას, ვინც ჩემს მომზადებაში წვლილი შეიტანა, სიტყვები ზედმეტია, უბრალოდ, ბრავო".
წაიკითხეთ ასევე: