"მოსახლეობის საყურადღებოდ, ხშირად მწერთ, რომ მიწისძვრები გახშირდა... ნუ იყიდით სახლებს ფურთხით აშენებულ კორპუსებში" - რას წერს თეა გოდოლაძე?

სეისმოლოგი თეა გოდოლაძე მიმართვას ავრცელებს, სადაც ბოლო დროს მომხდარ მიწისძვრებზე წერს. ამბობს, რომ ხშირად ეკითხებიან, რატომ გახშირდა ქვეყანაში მიწისძვრები. სეისმოლოგის ინფორმაციით, მიწისძვრები არ გახშირებულა და ყოველ წელს სტატისტიკური მაჩვენებელი დღეში 30-35 მიწისძვრაა.

ის მოსახლეობას მოუწოდებს, თავი შეიკავონ არასწორად აშენებულ კორპუსებში ბინის ყიდვისგან.

"მოსახლეობის და საზოგადოების საყურადღებოდ. ხშირად მწერთ, რომ მიწისძვრები გახშირდა, როდესაც მაგნიტუდა 3-ს ზემოთაა, ჩვენს ვებგვერდზე ვაქვეყნებთ მონაცემს. ეს ასე არ არის, მეგობრებო. არ გახშირებულა მიწისძვრები, ყოველ წელს ასე ხდება და ყოველ წელს იგივე ემოციით გვწერთ. საშუალოდ, სტატისტიკური მაჩვენებელი დღეში 30-35 მიწისძვრაა, ჩვენი სეისმური ქსელის მიერ რეგისტრირებული.

გააჩნია სეისმური სადგურების დაფარვის გეომეტრიასა და სიხშირეს. თუ მომყოლი მიწისძვრებია, მაშინ სტატისტიკა მკვეთრად იცვლება. გააჩნია მთავარი ბიძგის სიძლიერეს, ან მიწისძვრათა გუნდის სიძლიერეს.

ტექტონიკურად ერთ-ერთი ურთულესი ტერიტორია გვერგო, სამაგიეროდ, უსაშველოდ ლამაზი. მიწისძვრები ხდებოდა, არის და კიდევ ბევრი მილიონი წელი მოხდება, მათ შორის ძლიერიც. ამიტომ, ნუ იყიდით სახლებს ფურთხით აშენებულ კორპუსებში და ნუ დატვირთავთ ქალაქებს კორპუსების გაუვალი ჯუნგლებით. მიწისძვრის დროს, ვეღარავინ გიშველით. მიბაძეთ განვითარებულ ქვეყნებს.

უსაშველოდ ლამაზია ერთსართულიანი ამერიკა, კანადა.. გაუფრთხილდით საკუთარ თავს, მომავალ თაობებს და ქვეყანას, თორემ ძლიერი მიწისძვრის შემდეგ დარჩება უქართველო საქართველო, ასე თუ გააგრძელეთ და ამოაკორპუსეთ ქვეყანა" - წერს გოდოლაძე.

ცნობისთვის, ბოლო კვირის განმავლობაში რამდენიმე მიწისძვრა მოხდა. ერთ-ერთი დღეს დაფიქსირდა დაბა ჩხოროწყუსთან, სოფელ თაიასთან. მიწისძვრის სიმძლავრემ 4.3 მაგნიტუდა შეადგინა.

წაიკითხეთ: საქართველოში 4.3 მაგნიტუდის სიმძლავრის მიწისძვრა მოხდა - სად იყო ეპიცენტრი?