პერუში აღმოჩენილ "უცხოპლანეტელ მუმიებს" ადამიანისგან განსხვავებული თითის ანაბეჭდები აღმოაჩნდათ - რა დაადგინეს “სამთითა მარიას” შესწავლისას?
ჰუმანოიდურ, სამთითიან "უცხოპლანეტელ მუმიებს", რომლებიც გასულ წელს პერუში აღმოაჩინეს, "სწორი" თითის ანაბეჭდები აქვთ, რომლებიც ადამიანისას არ ემთხვევა. ამის შესახებ განაცხადა ადვოკატმა, რომელმაც ერთ-ერთი საკამათო ნიმუში შეისწავლა.
ჯოშუა მაკდაუელმა, კოლორადოს ყოფილმა პროკურორმა და ამჟამინდელმა ადვოკატმა, ერთ-ერთი პატარა უცნაური სხეული - სახელად "მარია" - შეისწავლა, აშშ-ს სამ დამოუკიდებელ სასამართლო-სამედიცინო ექსპერტთან ერთად.
მან და ექსპერტებმა გაოცებით აღმოაჩინეს, რომ ET-ს მსგავსი ცხედრების თითის ანაბეჭდებს სრულიად სწორი ხაზები აქვს.
- "ეს არ იყო ადამიანის თითის ანაბეჭდის ნიმუშები. ხელის ან ფეხის თითების ანაბეჭდებზე წრიულობა ვერ ვნახეთ”, - განაცხადა ჯოშუა მაკდაუელმა The Daily Mail-თან საუბრისას, - "ყოფილი პროკურორი და სისხლის სამართლის დამცველი ადვოკატი ვარ. ბევრი თითის ანაბეჭდი მინახავს. და ვამბობ, რომ ეს არ იყო კლასიკური თითის ანაბეჭდები".
მექსიკელმა ჟურნალისტმა ხოსე ხაიმე მაუსანმა ე.წ. "უცხოპლანეტელი მუმიების" შესახებ ცნობილი გახადა. მან აღმოჩენები მექსიკის კონგრესს წარუდგინა.
მაკდაუელი და აშშ-ს სამედიცინო ექსპერტები გასულ წლის აპრილში მაუსანთან ერთად პერუში, სხეულების შესასწავლად გაემგზავრნენ. მიუხედავად იმისა, რომ ადამიანის თითის ანაბეჭდების არარსებობა დამაბნეველია, მან განაცხადა, რომ მუმიების წარმოშობის შესახებ რაიმე განცხადების გაკეთება "უკიდურესად ნაადრევი" იქნებოდა.
უჩვეულოდ სწორი თითის ანაბეჭდების ერთ-ერთი შესაძლო ახსნა "შეიძლება, რაღაცნაირად დაკავშირებული იყოს მისი კანის შენახვის წესთან," თქვა მან და დაამატა, რომ ეს "ძალიან უცნაურია."
მარიას სხეული დიატომიური მიწითაა დაფარული - თეთრი ფხვნილის მსგავსით, რომელიც წყალსატევებში ნაპოვნი გაქვავებული წყალმცენარეების ნალექისგანაა დამზადებული.
"თუმცა, გაშიშვლებულ თითებზე, ეპიდერმული ხაზები, რომლებიც დავინახე, ძირითადად, სწორ ხაზებში იყო," - თქვა მან.
მიუხედავად იმისა, რომ ჰუმანოიდური სხეულების ბუნების შესახებ ოფიციალური დასკვნა არ გაკეთებულა, მაკდაუელმა განაცხადა, რომ ის კვლავ საათობით მუშაობს ამ საქმეზე.
4 ფუტის სიმაღლის "უცხოპლანეტელებმა", რომლებსაც პერუს იმ რეგიონის მიხედვით, სადაც ისინი იპოვეს, "ნაზკას მუმიები" უწოდეს, ყურადღება თავიანთი წაგრძელებული თავებითა და სამთითიანი ხელებით მიიქციეს.
მაუსანი დაჟინებით აცხადებს, რომ ნიმუშები არამიწიერია, მეცნიერებისა და მთავრობის ოფიციალური პირების წინააღმდეგობის მიუხედავად, რომლებიც ამბობენ, რომ ისინი არაფერია, გარდა ადამიანის ხუმრობისა.
იანვარში პერუს ხელისუფლებამ განაცხადა, რომ ისინი "თოჯინები" იყვნენ, შეკოწიწებული ქაღალდით, წებოთი, ლითონითა და ადამიანისა და ცხოველის ძვლებით.
"ისინი არ არიან არამიწიერები; ისინი არ არიან უცხოპლანეტელები," - განაცხადა სასამართლო ექსპერტიზის არქეოლოგმა, ფლავიო ესტრადამ ჟურნალისტებთან.
ერთ-ერთმა კრიტიკოსმა, ლათინური ამერიკის ისტორიკოსმა კრისტოფერ ჰინიმ, გაზეთთან საუბრისას აღნიშნა, რომ პრეკოლუმბიური საზოგადოებები პერუში თავის ფორმას იცვლიდნენ, მუმიების თავების ფორმის მსგავსად. "უცხოპლანეტელები" შეიძლება, ათასობით წლის წინანდელი ადამიანის ნეშტის ნარჩენები იყოს.
თუმცა, Daily Mail-ის ცნობით, მარია ზოგიერთ სხვა უფრო მცირე ზომის ნიმუშს არ ჰგავს. თითის ანაბეჭდების ანალიზი მიუთითებს, რომ ზოგიერთი მუმია ან არ არის თოჯინა, ან რაღაც სხვა უცნაური მასალითაა აგებული.
მექსიკელი მკვლევარების 10-კაციანმა ჯგუფმა აღმოაჩინა, რომ მუმიების დნმ-ის 30% არა ადამიანური, არამედ "უცნობი სახეობისაა".
მარტში, ორმა კინემატოგრაფისტმა, რომლებიც სხვადასხვა მუმიფიცირებული ნეშტის შესახებ დოკუმენტურ ფილმზე მუშაობდნენ, განაცხადეს, რომ რენტგენულმა გამოკვლევამ აჩვენა, რომ მუმიები ყალბი არ არის, თუმცა შეიძლება, სხვა პლანეტიდან არ იყვნენ. როგორც მათ განაცხადეს, სჯერათ, რომ ისინი შეიძლება, ახალი სახეობის მტკიცებულებას წარმოადგენდნენ, რომელზეც "გენეტიკურმა მანიპულაციამ" მოახდინა გავლენა.
თუმცა, მაკდაუელმა ამ წლის დასაწყისში განაცხადა, რომ ნებისმიერი დასკვნის გაკეთებამდე, მას სურს "მაღალი დონის ლაბორატორიებში რეალური, ძალიან განსაზღვრული დნმ კვლევების ჩატარება".
"ჩვენმა წინასწარმა კვლევამ რეალურად მიგვიყვანა იმ ფაქტამდე, რომ მეტი კვლევაა საჭირო", - აღნიშნა მან.