დიკაპრიოსთან რომანიდან ადამიანებით ვაჭრობამდე: ექსმოდელი და ინფლუენსერი კეტ ტორესი ქალების სექსუალურ ექსპლუატაციაშია ბრალდებული
2022 წლის სექტემბერში, აშშ-ში ორი ახალგაზრდა ბრაზილიელი ქალი გაუჩინარდა. მათმა ოჯახებმა და FBI-მ გოგონების ძებნა დაიწყეს. ძიებისას მხოლოდ ის იცოდნენ, რომ ისინი 31 წლის ბრაზილიელ მოდელსა და ინფლუანსერ კეტ ტორესთან ცხოვრობდნენ.
ტორესს მიესაჯა რვა წლით თავისუფლების აღკვეთა ადამიანებით ვაჭრობისა და ტრაფიკინგის ბრალდებით, დანაშაული ჩადენილია ერთი ახალგაზრდა ქალის მიმართ. BBC-ის ინფორმაციით, კეტ ტორესს ბრალდებები მეორე ქალთან დაკავშირებითაც აქვს წაყენებული.
როგორ მოხდა, რომ ყოფილი მოდელი და ინფლუენსერი, რომელიც პრიალა ჟურნალების ყდებს ამშვენებდა და წვეულებებზე ახლდა ისეთ ცნობილ ადამიანებს, როგორიცაა ლეონარდო დიკაპრიო, ქალების სექსუალურ ექსპლუატაციაშია დადანაშაულებული?!
"ჩემთვის ის იმედი იყო“, - წერს ანა თავის "ინსტაგრამის" გვერდზე 2017 წელს, როდესაც პირველად შეხვდა კეტ ტორესს. ანა დაკარგულებს შორის არ ყოფილა, მაგრამ ის ერთ-ერთია, რომელიც ტორესის გავლენის მსხვერპლი აღმოჩნდა. მან ასევე მნიშვნელოვანი როლი ითამაშა დაკარგული ქალის ძიებაში.
მას რთული ცხოვრება ჰქონდა, მძიმე ბავშვობის შემდეგ ბრაზილიიდან საცხოვრებლად შტატებში გადავიდა. იმ დროისთვის კეტ ტორესმა გამოაქვეყნა თავისი ავტობიოგრაფია, რომელშიც ამტკიცებდა, რომ ჰქონდა განსაკუთრებული სულიერი ძალა, რომელიც მას მომავლის წინასწარმეტყველების საშუალებას აძლევდა. ანას თქმით, მას შემდეგ, რაც ტორესი ჟურნალების გარეკანზე ნახა, ასევე ნახა ფოტოები, რომელზეც ჩანდა, რომ თან ახლდა ლეონარდო დიკაპრიოს, ეს ყველაფერი დამაჯერებლად მიიჩნია...
მას წარმოდგენა არ ჰქონდა, რომ ტორესის ისტორია, რომელმაც ასე შთააგონა, სინამდვილეში ნაწილობრივ სიცრუეზე იყო დაფუძნებული.
ტორესი საკუთარ საიტზე მომხმარებლებს ჰპირდებოდა "სიყვარულს, ფულსა და თვითშეფასების ამაღლებას“. თავის ვიდეოებში რჩევებს აძლევდა ურთიერთობების, ჯანმრთელობის, ბიზნესის წარმატებისა და სულიერების შესახებ. მასთან ვიდეო კონსულტაცია 150 დოლარი ღირდა, რისი საშუალებითაც კლიენტებს პრობლემების მოგვარებას ჰპირდებოდა.
როგორც გაირკვა, მის რჩევებს ბნელი მხარეც ჰქონდა. ანამ, ამანდამ და ტორესის სხვა ყოფილმა მიმდევრებმა განაცხადეს, რომ რაღაც მომენტში მიხვდნენ, რომ ისინი ფსიქოლოგიურ იზოლაციაში ცხოვრობდნენ ოჯახისა და მეგობრებისგან, მზად იყვნენ გაეკეთებინათ, რასაც ტორესი ეტყოდათ.
2019 წელს ტორესმა ანა საცხოვრებლად ნიუ-იორკში მიიწვია, რათა მისი ასისტენტი გამხდარიყო. გოგონა დათანხმდა, მიუხედავად იმისა, რომ ბოსტონის უნივერსიტეტში სწავლობდა. ქალი ტორესის შინაური ცხოველების მოსავლელად გადავიდა. ის ასევე ურეცხავდა, სახლს ალაგებდა...
"შოკში ვიყავი, სახლი სულ არეული იყო, თავადაც ძალიან ჭუჭყიანი დადიოდა, ცუდი სუნი ასდიოდა“, - ამბობს ის. ანას თქმით, ტორესი მის გარეშე ელემენტარულ საქმესაც ვერ აკეთებდა, როგორიცაა შხაპის მიღება, ვერ იტანდა მარტო ყოფნას. მოსამსახურე მუდმივად ფხიზლად უნდა ყოფილიყო, რომ სწრაფად შეესრულებინა მისი ნებისმიერი მოთხოვნა. მხოლოდ რამდენიმე საათი ჰქონდა ძილის უფლება, დივანზე, რომელსაც კატის შარდის სუნი ასდიოდა.
ანა ამბობს, რომ სამუშაოსთვის ანაზღაურება არასდროს მიუღია. "ვგრძნობდი, რომ იქ სამუდამოდ დავრჩი და გამოსავალი უბრალოდ, არ მქონდა. მე ვიყავი ალბათ მისი ერთ-ერთი პირველი მსხვერპლი“, - დასძინა მან. უნივერსიტეტის ბინა ბოსტონში დატოვა, ამიტომ დასაბრუნებელი აღარ ჰქონდა, არც ფული, რომ ბინა ექირავებინა.
კოშმარი სამ თვეს გაგრძელდა და საბოლოოდ, ანა მეგობართან გაიქცა. 2022 წლის სექტემბერში, როდესაც გაიგო, რომ ორი ბრაზილელი ქალი დაიკარგა, მიხვდა, რომ მოქმედების დრო დადგა.
ამ დროისთვის კეტ ტორესი დაქორწინებული იყო 21 წლის ზაკზე, რომელიც კალიფორნიაში გაიცნო. წყვილმა 5-ოთახიანი სახლი იქირავა ტეხასის დედაქალაქ ოსტინის გარეუბანში.
ტორესს უკვე ორი ახალი მსხვერპლი ჰყავდა, დეზირე ფრეიტასი, რომელიც გერმანიიდან გადავიდა მასთან და ლეტიცია მაია, რომელიც ბრაზილიიდან მოხვდა ტორესისა და მისი მეუღლის სახლში. სწორედ მათი გაუჩინარების შემდეგ დაინტესერდა FBI-ს ტორესით. ინფლუენსერს ასევე დაქირავებული ჰყავდა კიდევ ერთი ბრაზილიელი ქალი, სოლი.
BBC-მ შეძლო სულ მცირე, ოთხი სხვა ქალი ეპოვა, რომლებიც ტორესმა კინაღამ დაითანხმა, რომ მის ბინაში გადასულიყვნენ, თუმცა, მათ, საბოლოოდ, უარი თქვეს.
ჩვენებაში დეზირე ამბობს, რომ ტორესმა მას გერმანიიდან ნიუ-იორკში გასამგზავრებელი ბილეთი უყიდა, იმ საბაბით, რომ ის თვითმკვლელობის ზღვარზე იყო და დახმარება სჭირდებოდა.
ინფლუენსერმა ასევე დაარწმუნა 14 წლის ლეტიცია, რომ ჩასულიყო შტატებში და მასთან ეცხოვრა. სოლის თქმით კი, ტორესთან საცხოვრებლად გადავიდა, რადგან უსახლკარო იყო. ქალმა დაარწმუნა, რომ მხოლოდ ტარო ბარათების წასაკითხად ქირაობდა.
მალე ახალგაზრდა ქალებმა აღმოაჩინეს, რომ რეალობა რადიკალურად განსხვავდებოდა დაპირებული ზღაპრისგან. დეზირეს თქმით, ტორესის სახლში გადასვლიდან რამდენიმე კვირაში ინფლუენსერმა აიძულა, რომ ადგილობრივ სტრიპტიზ კლუბში ემუშავა. სხვა შემთხვევაში ფულის დაბრუნებას სთხოვდა, ასევე დაემუქრა, რომ დაწყევლიდა. ქალს შეეშინდა და კვირაში შვიდი დღე სტრიპტიზიორად მუშაობას დათანხმდა.
ტორესის სახლში მცხოვრებ ქალებს ეკრძალებოდათ ერთმანეთთან საუბარი. ოთახიდან გასვლისთვის, თუნდაც ტუალეტში შესვლისას ნებართვა უნდა ეთხოვათ. გარდა ამისა, მათ მთელი შემოსავალი მფლობელებისთვის უნდა გადაეცათ.
საბოლოოდ სოლმა გაქცევა მოახერხა, მაგრამ ამასობაში კეტ ტორესის "ინსტაგრამის" პოსტებში ჩნდება იარაღი, რასაც მისი ქმარი სახლში ინახავდა. ეს იყო კიდევ ერთი საშუალება ტყვეების დასამორჩილებლად. ამ დროს ტორესმა დაიწყო დეზირეს დარწმუნება, რომ პროსტიტუციაში ჩართულიყო. იარაღის მუქარის შემდეგ საბოლოოდ დათანხმდა.
ტორესის მიერ დამონებული ქალები ამბობდნენ, რომ თუ ისინი არ დააკმაყოფილებდნენ მათთვის "გადასახადად" დადგენილ ზღვარს, რაც დღეში 1000 დოლარიდან 3000 დოლარამდე გაზარდა, სახლში ძილის უფლებას არ აძლევდა.
2022 წლის სექტემბერში, დეზირესა და ლეტიციას მეგობრებმა და ნათესავებმა დაიწყეს კამპანია სოციალურ ქსელებში, ცდილობდნენ გაეგოთ რაიმე მათი ადგილსამყოფელის შესახებ. ამ დროისთვის მათი გარეგნობა ძალიან შეიცვალა, მათი ამოცნობა სულაც არ იყო ადვილი.
ანამ, რომელიც 2019 წელს კეტ ტორესთან ერთად ცხოვრობდა, განაცხადა, რომ როდესაც გოგონების ძებნის შესახებ ახალი ამბებიდან გაიგო, მაშინვე მიხვდა, რომ გოგონები ტორესთან იყვნენ. მან სცადა სამართალდამცავებთან დაკავშირება, მაგრამ თავიდან არავინ უჯერებდა.
მედიის ყურადღებამ ტორესი შეაშინა და ქალები სასწრაფოდ გადაიყვანა ტეხასიდან მეინში. "ინსტაგრამზე" გავრცელდა ვიდეოები, რომელშიც დეზირე და ლეტიცია უარყოფდნენ, რომ ისინი ტყვეობაში იმყოფებოდნენ და ითხოვდნენ, რომ შეწყვიტათ მათი ძებნა.
2022 წლის ნოემბერში პოლიციამ აიძულა ტორესი თავის ტყვეებთან ერთად პირადად მისულიყო ფრანკლინის ოლქის შერიფის ოფისში მაინის შტატში, რათა მოეხსნათ ეჭვები მათი მდგომარეობის შესახებ.
გამომძიებელმა დევიდ დავოლმა, რომელიც პირადად აკითხავდა ტორესს, დეზირეს და ლეტიციას, BBC-ს განუცხადა, რომ მან და მისმა კოლეგებმა შენიშნეს რამდენიმე გამაფრთხილებელი ნიშანი: ქალებს არ ჰქონდათ ნდობა სამართალდამცავების მიმართ, აშკარად იზოლირებულები იყვნენ საზოგადოებისგან და არ სურდათ პასუხის გაცემა კითხვებზე ტორესის ნებართვის გარეშე.
2022 წლის დეკემბრისთვის ორივე ქალი უსაფრთხოდ დაბრუნდა ბრაზილიაში.
პოლიციელის თქმით, ადამიანებით ვაჭრობის მასშტაბები იზრდება და ამას ხელს უწყობს სოციალური ქსელები, რომელიც აადვილებს მსხვერპლთა პოვნას და ნაყოფიერ ნიადაგს ქმნის მათ მოსაზიდად.
მიმდინარე წლის აპრილში BBC-ის გუნდმა სასამართლოს ნებართვა მოიპოვა ციხეში მყოფ ტორესთან გასაუბრებაზე. ქალი ოთახში ღიმილით შევიდა. მისი თქმით, უდანაშაულო იყო და კატეგორიულად უარყო, რომ ამ ქალებიდან რომელიმე ოდესმე მასთან ცხოვრობდა, ან ვინმეს სექს-მუშაობას აიძულებდა.
"როდესაც მათ ჩვენებას მოვუსმინე, გაოგნებული დავრჩი მათი ტყუილის მასშტაბით. იმდენი ტყუილია, რომ რაღაც მომენტში, უბრალოდ, სასაცილო გახდა ჩემთვის! განუცხადა მან BBC-ს. ხალხი ამბობს, რომ მე "ყალბი გურუ" ვარ. მაგრამ ამავე დროს ისინი აცხადებენ, რომ მე საშიში ვარ საზოგადოებისთვის, რადგან ჩემი სიტყვებით შემიძლია შევცვალო ხალხის აზრი“.
როდესაც ტორესს ჟურნალისტმა მტკიცებულებები წარუდგინა, მისი ტონი შეიცვალა და გამოცემა სიცრუეში დაადანაშაულა.
"შენ გადაწყვიტე გჯეროდეს, რისიც გინდა. შემიძლია გითხრათ, რომ მე ვარ იესო და შენ შეგიძლია იხილო იესო ან შეგიძლია დაინახო ეშმაკი. ეს შენი არჩევანია", - უთხრა მან ჟურნალისტს.
ივლისის დასაწყისში, ბრაზილიის სასამართლომ ტორესს რვა წლით თავისუფლების აღკვეთა მიუსაჯა დეზირეს საქმეზე.
საერთო ჯამში, 20-ზე მეტმა ქალმა განაცხადა, რომ ისინი მოატყუა ან გამოიყენა ტორესმა. ზოგიერთი მათგანი ჯერ კიდევ გადის ფსიქოლოგიურ თერაპიას, რათა გამოჯანმრთელდეს იმისგან, რაც გადაიტანეს.