უმძიმესი კატასტროფა ნეპალში - კატმანდუს აეროპორტში თვითმფრინავი ჩამოვარდა, დაღუპულია 18 ადამიანი (ფოტოები)
ნეპალში, კატმანდუს აეროპორტში Saurya Air-ის თვითმფრინავი ჩამოვარდა, რომელშიც 19 ადამიანი იმყოფებოდა. როგორც Kathmandu Post წერს, 18 მათგანი გარდაიცვალა. მათი ცხედრები ავარიის ადგილზე იპოვეს.
“პილოტი გადაარჩინეს და მას სამედიცინო დახმარებას უწევენ. თვრამეტი ცხედარი იპოვეს, მათ შორის ერთი უცხოელია“, - განაცხადა კატმანდუს პოლიციის წარმომადგენელმა, დან ბაჰადურ კარკიმ.
თვითმფრინავი საცდელ ფრენას ასრულებდა. მასში Saurya Airline-ის 17 ტექნიკური თანამშრომელი და ეკიპაჟის ორი წევრი იმყოფებოდა. კატასტროფა ასაფრენ ბილიკთან ახლოს, ადგილობრივი დროით 11:00 საათზე მოხდა. ის ფოხარაში უნდა გაფრენილიყო.
ინტერნეტში გამოქვეყნებულ ვიდეო კადრებში ჩანს, რომ თვითმფრინავი ცეცხლში და კვამლშია გახვეული. შემთხვევის შემდეგ ადგილზე მობილიზებული იყო სახანძრო და სასწრაფო დახმარების მანქანები.
