ევერესტის "სიკვდილის ზონაში" წლების წინ გაყინული მთამსვლელების ცხედრები იპოვეს

ევერესტის მყინვართა დნობასთან ერთად, დღის სინათლეზე გამოდის მრავალი წლის წინ ჩამარხული სხვადასხვა ნაშთები. ყველაზე საგანგაშო კი ის არის, რომ ექსპედიციათა ოპერატორები პოულობენ წლების წინ მთაზე ასვლის მსურველთა ცხედრებს.

• 1990-იანი წლებიდან ევერესტის მონახულების ბუმი დაიწყო. ასობით ადამიანისთვის ეს მცდელობა საბედისწერო აღმოჩნდა და გზაში დაიღუპა. უმეტესი მათგანის გვამი დღემდე თოვლსა და ყინულებშია ჩამარხული. თუმცა, კლიმატის ცვლილებასთან ერთად დნება მყინვარები, რის შედეგადაც, გამოჩნდა მრავალი ცხედარი.

ბევრ ადამიანს არ შეუძლია მთებში დაღუპული ნათესავების ცხედრების პოვნა. ფინანსური სახსრების არსებობის შემთხვევაშიც კი, კერძო კომპანიების უმეტესობა უარს ამბობს "სიკვდილის ზონაში" ძებნის პროცესის დაწყებაზე, რადგან ეს ძალიან საშიშია.

ნეპალის მთამსვლელთა ასოციაციის ყოფილი პრეზიდენტის, ანგ შერინგ შერპას განცხადებით, მათ ბარში ჩამოაქვთ ბოლო წლებში დაღუპულ ადამიანთა ნეშტები, მაგრამ დიდი ხნის წინ დაღუპულ ალპინისტთა ცხედრები მხოლოდ ახლა იწყებს დღის სინათლეზე გამოსვლას.

სამხედროებს ამ წელს ხუთი მილიონი რუპი (37,400 აშშ დოლარი; 29,000 ფუნტი) გამოეყოთ თითოეული ცხედრის გამოსატანად. სხეულის 8000 მეტრიდან ჩამოსატანად თორმეტი ადამიანია საჭირო, თითოეულს სჭირდება ჟანგბადის ოთხი ცილინდრი. ერთი ცილინდრი 400 დოლარზე მეტი ღირს, რაც იმას ნიშნავს, რომ მხოლოდ ჟანგბადისთვის საჭიროა 20 000 დოლარი. დიდ პრობლემას წარმოადგენს ქარიც - სიკვდილის ზონაში ქარის სიჩქარე ხშირად აღემატება 100 კმ/სთ-ს.

ოთხივე მთამსვლელის ცხედარი იმავე მდგომარეობაში იპოვეს, როგორც დაიღუპნენ. მთამსვლელებს კიდურები ჰქონდათ გაყინული, რაც მათ გადაადგილებას შეუძლებელს ხდიდა.

ნეპალის კანონმდებლობა აცხადებს, რომ ყველა სხეული უნდა დარჩეს საუკეთესო მდგომარეობაში - ნებისმიერმა დაზიანებამ შეიძლება გამოიწვიოს დაჯარიმება. 24 საათი დასჭირდა ჩეხი მთამსვლელის ცხედრის მიტანას უახლოეს ბანაკამდე.

• იდენტიფიკაცია

ოთხი ცხედარი ამ დრომდე კატმანდუს საავადმყოფოშია შენახული. ჩეხი ალპინისტის მილან სედლაჩეკისა და ამერიკელი მთამსვლელის რონალდ იარვუდის იდენტიფიცირება მათი პირადობის დამადასტურებელი მოწმობებით გახდა შესაძლებელი - ისინი 2017 წელს დაიღუპნენ.

დანარჩენი ორი ცხედრის იდენტიფიცირების პროცესი ამ დრომდე გრძელდება. სამაშველო გუნდის აზრით, ყველა ცხედარი უცხოელებს ეკუთვნის, მაგრამ მთავრობა ამას არ ადასტურებს.

იმ შემთხვევაში, თუ გარდაცვლილების ვინაობის დადგენა ვერ მოხერხდა, მათ დაკრძალვაზე მთავრობა იზრუნებს.

წყარო: BBC