“თქვენ აჩვენეთ მსოფლიოს, რომ ანგარიშგასაწევი საფეხბურთო ძალა ხართ!“ - რას წერს უეფა-ს პრეზიდენტი ირაკლი კობახიძეს ევრო 2024-ის დასრულების შემდეგ

უეფა-ს პრეზიდენტი, ალექსანდრ ჩეფერინი საქართველოს პრემიერ-მინისტრს ირაკლი კობახიძეს ოფიციალურ წერილში საქართველოს ეროვნული საფეხბურთო ნაკრების წარმატებას ულოცავს და აღნიშნავს, რომ მართლაც წარმატებული დებიუტი შედგა.

“გმადლობთ თქვენი კეთილი სიტყვებისთვის და კომპლიმენტებისთვის უეფა-ს “ევრო 2024“-ის ფინალურ ტურნირზე. უეფა-ს ევრო 2024 დასრულდა ერთთვიანი უმაღლესი ხარისხის ფეხბურთის შემდეგ. ჩვენ ვიყავით “ფეხბურთით გაერთიანებულები - ევროპის გულში“ და მოხარული ვარ იმის გაგებით, რომ მან თქვენთვისაც ასეთი დასამახსოვრებელი გამოცდილება შექმნა. ჩემთვის დიდი პატივი იყო თქვენი სტუმრობა და თქვენთვის ტურნირის მღელვარების გაზიარება. “ევრო“-მ, უდავოდ დაამტკიცა ეროვნული საფეხბურთო ნაკრების, როგორც ეროვნული სიამაყისა და ერთიანობის წყაროს მნიშვნელობა და მშვენიერი იყო იმის დანახვა, თუ რა პატივი იყო ფეხბურთელებისთვის ეროვნული ნაკრების მაისურის ტარება. მათ მოიპოვეს მსოფლიო სპორტის ერთ-ერთ ყველაზე ამაღლებულ საერთაშორისო არენაზე გამოსვლის უფლება“, - აღნიშნულია წერილში.

უეფა-ს პრეზიდენტი ხაზს უსვამს, რომ “ევრო 2024“ -ის ტურნირი ერთიანობის ნათელი მაგალითი იყო.

“ეს ტურნირი, რა თქმა უნდა, იყო ერთიანობის ნათელი მაგალითი, რომელიც ასახავს იმას, თუ როგორ შეიძლება იყოს ფეხბურთი სიკეთის ძლიერი ძალა იმ სამყაროში, რომელსაც ძალიან სჭირდება იმედი და პოზიტიური ცვლილებები. ეს შეუძლებელი იქნებოდა ჩვენი გამორჩეული მონაწილეების გარეშე, რომლებმაც გამოავლინეს თავიანთი შესანიშნავი ნიჭი, ერთგული გულშემატკივრების გარეშე, რომელთა ენთუზიაზმმა გაანათა დარბაზები, და თავდადებული პოლიციისა და მოხალისეების გარეშე, რომლებიც დაუღალავად მუშაობდნენ, რათა გერმანიაში ყველას კარგად ეგრძნო თავი. ბოლოს, უნდა მოგილოცოთ თქვენ და თქვენს ეროვნულ გუნდს ყველაზე წარმატებული დებიუტი! თქვენ აჩვენეთ მსოფლიოს, რომ ანგარიშგასაწევი საფეხბურთო ძალა ხართ“, - წერს ალექსანდრ ჩეფერინი.