"ივანიშვილის სიტყვა მნიშვნელოვანია, მან ჩათვალა საჭიროდ, რომ გარკვეული კარტები გაეხსნა..." - როგორ აფასებენ ექსპერტები "ქართული ოცნების" წინასაარჩევნო კამპანიის დასაწყისს?
მმართველმა პარტია “ქართულმა ოცნებამ” წინასაარჩევნო კამპანია დაიწყო. "ოცნების“ ახალი ცენტრალური ოფისის გახსნაზე პრემიერ-მინისტრმა ირაკლი კობახიძემ განაცხადა, რომ მმართველი პარტია “სულ მცირე 12 წელიწადი” არცერთი არჩევნების წაგებას არ აპირებს. ყრილობაზე სიტყვით გამოვიდა პარტიის საპატიო თავმჯდომარე ბიძინა ივანიშვილიც.
როგორც მან განაცხადა, "26 ოქტომბრის საპარლამენტო არჩევნებში საქართველო აუცილებლად გაიმარჯვებს იმ ძალებზე, რომლებიც გასული ოთხი წლის განმავლობაში საქართველოში არეულობის შემოტანას და ქვეყნის ომში ჩათრევას გამალებით ცდილობდნენ. კიდევ ერთხელ გაიმარჯვებს "ქართული ოცნება“ აგენტურაზე, გაიმარჯვებს მშვიდობის პარტია ომის პარტიაზე“.
მისივე თქმით, "ბრძოლა ბოროტების წინააღმდეგ 2012 წლიდან დღემდე უწყვეტ რეჟიმში გრძელდება. ეს ბრძოლა 2016, 2020 და 2021 წლებშიც საქართველოს და მისი სუვერენიტეტის გამარჯვებით დასრულდა. წინასწარ დაგეგმილი მცდელობის მიუხედავად, "ნაციონალურ მოძრაობას“ და მის მფარველებს, საბოლოოდ, სამივე შემთხვევაში არჩევნების შედეგების აღიარება მოუწიათ. საქართველო ანალოგიური მოცემულობით ხვდება 26 ოქტომბრის არჩევნებსაც... 26 ოქტომბრის საპარლამენტო არჩევნები არის რეფერენდუმი. ეს არის რეფერენდუმი ომსა და მშვიდობას შორის, მონობასა და ღირსებას შორის, ბნელ წარსულში დაბრუნებასა და წინსვლას შორის, სრულ უპერსპექტივობასა და საქართველოს ევროპულ პერსპექტივას შორის. დარწმუნებული ვარ, 26 ოქტომბერს ქართველი ხალხის უდიდესი უმრავლესობა დაუჭერს მხარს მშვიდობას, ღირსებასა და კეთილდღეობას, რაც ქართველი ხალხის ფიზიკური და სულიერი გადარჩენის და მისი ევროპული მომავლის საწინდარია. მხოლოდ მშვიდობით, ღირსებით და კეთილდღეობით ევროპისკენ - ეს არის ერთადერთი უალტერნატივო არჩევანი, რომელსაც ქართველ ამომრჩეველს "ქართული ოცნება“ სთავაზობს“, - განაცხადა ბიძინა ივანიშვილმა.
პოლიტოლოგები ვახტანგ ძაბირაძე და მირიან მირიანაშვილი AMBEBI.GE-სთან "ქართული ოცნების“ მესიჯებს აფასებენ.
ვახტანგ ძაბირაძე:
- მოულოდნელი და ახალი ვერაფერი ვნახეთ, "ქართული ოცნების“ ყველა გამომსვლელი, მათ შორის ივანიშვილიც, ფაქტობრივად, ლაპარაკობდა იმავეს, რაც არაერთხელ მოგვისმენია - ჩვენი პარტნიორების პირდაპირ თუ ირიბი დადანაშაულება იმაში, რომ ისინი ქვეყნის საშინაო პოლიტიკაში არა მარტო ერევიან, არამედ რევოლუციებს ამზადებენ. მინდა გითხრათ, რომ ვერც ერთი გარე ძალა რევოლუციას ვერ მოამზადებს, ქვეყანაში თუ არ არსებობს ასეთი სიტუაცია. ასე რომ იყოს, კარგა ხანია, რევოლუციების ფეიერვერკები გვექნებოდა მთელს მსოფლიოში. ეს რეალურად ასე არ არის, ამას მშვენივრად გრძნობენ "ოცნების“ ლიდერები, დარწმუნებული ვარ, მათ რეალური გამოკითხვებიც აქვთ ჩატარებული და იციან, რა რეიტინგი აქვთ... მიუხედავად ამისა, ისინი ცდილობენ, რომ ეს რიტორიკა არ შეცვალონ. ყველა გამომსვლელი ერთი ფრაზით, თუ სლოგანით ასრულებდა თავის გამოსვლას - "ღირსეულად ევროპისკენ“, რაც ნიშნავს ისევ მცდელობას, საზოგადოების გარკვეული, პროევროპული ნაწილი რაღაცნაირად დაიმაგრონ თავის ელექტორალურ ორბიტაზე. არა მგონია, ამ სლოგანმა უშველოს, მით უმეტეს იმ ფონზე, რა ფონიც შეიქმნა ჩვენი პარტნიორების მხრიდან - პირდაპირ, ყოველგვარი დიპლომატიის გარეშე ღიად გაცხადებული პოზიციების შემდეგ. ერთადერთი, რამაც შეიძლება მეტ-ნაკლებად "ქართულ ოცნების“ გადაწყვეტილებები შეაჩეროს ან შეანელოს, ეს იქნება საკონსტიტუციო სასამართლოს გადაწყვეტილება. მხოლოდ ის თუ შეაჩერებს გამჭვირვალობის კანონის მოქმედებას და რეალურად არ დაიწყება მისი ამოქმედება. ცხადია, ეს კანონი ხელისუფლებას იმისთვის სჭირდება, რომ არასამთავრობო ორგანიზაციები მოხსნას სადამკვირვებლო პროცესიდან.
ლაპარაკი იმაზე, რომ "ნაციონალურ მოძრაობას“ არჩევნების შემდეგ გავანადგურებთო, ამით იმ სლოგანთან ერთად ("ღირსებით ევროპისკენ“) არის მცდელობა, რომ "ოცნებიდან“ წასული "შუაშისტური" ამომრჩეველი როგორმე ისევ უკან დაიბრუნონ. ამასთანავე, იქნება დიდი შეტევა იმაზე, რომ როგორმე არ დაუშვან "ლელოს“ და გახარიას გაერთიანება, იქნება დიდი ზეწოლა და ამისთვის ხელისუფლება ღიად თუ ფარულად ყველა მეთოდს გამოიყენებს - მოსყიდვა, გადაბირება, ძველი საქმეები, კომპრომატები და ა.შ. რაც შეეხება იმას, რომ "ოცნება“ და "ხალხის ძალა“ ერთად გამოვა, გასაგებია - როგორც ჩანს, თავიდანვე იყო ჩანაფიქრი ასეთი, რომ "ხალხის ძალა“ პრორუსულ ხმებზე იმუშავებდა, ხოლო "ოცნება“ შეინარჩუნებდა პროდასავლურ ორიენტაციას, მაგრამ პროცესი ისე წავიდა, რომ ორივე ძალას შორის ტოლობის ნიშანია და იქ აღარაფერი გასაყოფი არ არის. ამას ისიც დაემატა, რომ "ალტ-ინფომ“ და "პატრიოტთა ალიანსმა“ ერთი ჯგუფი შექმნეს, რომელიც ასევე ძირითადად პრორუსულ ხმებზე მუშაობს, რაც "ქართულ ოცნებას“ არანაირად არ აძლევს ხელს, ის კარგავს ამ ხმებს და არა - ოპოზიცია, რომელიც ღიად პროდასავლურია.
"ოცნებას“ ეშინია ოპოზიციის მიერ წამოწეული ე.წ. რეფერენდუმის თემის - რომ ეს არჩევნები კი არა, რეფერენდუმია ევროპასა და რუსეთს შორის. ამან ძალიან შეაწუხა და ისინი აწი მუდმივად დაიწყებენ საუბარს რეფერენდუმზე, ოღონდ, ომსა და მშვიდობას, ღირსებასა და უღირსობას შორის და აშ. რათა სიტყვა რეფერენდუმი არჩევნებამდე გაცვითოს და ამომრჩევლისთვის აღარ გახდეს რაღაც ორიენტირი. ახლა ოპოზიცია უნდა ეცადოს, რომ მოსახლეობას ყალბი და რეალური რეფერენდუმის ერთმანეთისგან გარჩევაში დაეხმაროს. ეს პრობლემა აუცილებლად გაუჩნდება ოპოზიციას, ვინაიდან ადრე თუ "ქართულ ოცნებას“ სუსტი პიარი ჰქონდა და ერთთავად ამას საყვედურობდნენ, ახლა ისინი კარგად ჩამოყალიბდნენ და ისეთი პროპაგანდა აქვთ, გებელსს რომ შეშურდება.
მირიან მირიანაშვილი:
- გუშინ მთავარი იყო ბიძინა ივანიშვილის სიტყვა. კობახიძის სიტყვას მნიშვნელობას დიდად არ მივანიჭებდი, ვინაიდან ის არ არის დამოუკიდებელი ფიგურა ივანიშვილის კარზე. ივანიშვილის სიტყვა კი ძალზე მნიშვნელოვანია იმიტომ, რომ ფაქტობრივად, მან ჩათვალა საჭიროდ, რომ გარკვეული კარტები გაეხსნა. მის ძირითად პოსტულატებს თუ პოლიტტექნოლოგიურად და გეოპოლიტიკურად ვთარგმნით, შეფასების ნაწილში შეიძლება ასეთი მოცემულობა წარმოვიდგინოთ: ბიძინა ივანიშვილმა ჩათვალა, რომ დადგა მომენტი, როდესაც მან გარკვეული ვადები მონიშნოს, როდის დამთავრდება დასავლეთთან დაპირისპირების პერიოდი, მან ივარაუდა მაქსიმუმ 6 თვიდან 1 წელი. როგორც ჩანს, მან უკვე მომხდარ ფაქტად ჩათვალა ტრამპის არჩევა და, სავარაუდოდ, მსოფლიოს და რეგიონულ მომავალს ისე ხედავს, რომ მოხდება ამერიკის და რუსეთის პოლიტიკური დაზავება, ამ მომენტში გადაწყდება საქართველოს ბედიც, შესაბამისად, დასავლური ელიტა საქართველოს ხელისუფლებას აღარ "მიაწვება“ და არ დაუწყებს ტემპის კარნახს ევროინტეგრაციასთან მიმართებაში. ეს არის მისი ხედვა და, ფაქტობრივად, მნიშვნელოვანი მესიჯი.
მან აღნიშნა ისიც, რომ ადრე თუ გვიან, 1 წლის ფარგლებში ის დააყენებს "ნაციონალური მოძრაობის“ პასუხისგებაში მიცემის საკითხს 2008 წლის ომის დასავლეთიდან დაკვეთის რეალიზებისთვის. ამით მიანიშნა, რომ, ფაქტობრივად, გააშიშვლებს აგვისტოს ომის სამხედრო პოლიტიკის ანატომიას და დასავლეთთან დაპირისპირებას დაასრულებს, დასავლეთიდან მოწოლის წინაპირობები აღარ იქნება. 2008 წლის ომი რომ უნდა გამოძიებულიყო და არ გამოვიძიეთ, ეს ცალკე საკითხია... იდეა ალბათ ისაა, რომ ამ ყველაფერს პოლიტიკურ შეფასებას მისცემს, ანუ მომზადდება დეკლარაცია, რომლის მიხედვითაც ამ ომის ინიციატივა ღიად დაბრალდება დასავლეთს. მართალი გითხრათ, ეს როგორ უნდა მოხერხდეს, მე არ ვიცი იმიტომ, რომ თუ ტრამპი აირჩიეს (ეს ჯერ ძალზე სათუო თემაა), ბუშის ყოფილი ადმინისტრაციის რამდენიმე ქორი შეიძლება კიდევ დარჩეს, ანუ მათ უნდა დაბრალდეს ომის პროვოცირება, ვინც ამერიკის ადმინისტრაციაში საკვანძო თანამდებობაზეა და ეჭვი მეპარება, ეს განხორციელებადი იყოს.
რაც შეეხება ვადებს და ტრამპის არჩევანთან დაკავშირებით ჯერ ბევრი რამაა გადასაწყვეტი იმიტომ, რომ ბიძინა ივანიშვილმა მასზე წარუმატებელი თავდასხმის შემდეგ ჩათვალა საჭიროდ ამ განცხადების გაკეთება, მიიჩნია რა, რომ ამის შემდეგ ტრამპის რეიტინგი მკვეთრად გაიზრდება და მისი გამარჯვება გადაწყვეტილად შეიძლება ჩაითვალოს. ბოლო 2-3 დღის მაგალითზე შემიძლია გითხრათ, რომ ტრამპის რეიტინგი საერთოდ არ გაზრდილა. ტრამპი რომც აირჩიონ, ერთი რამ უნდა ვიცოდეთ: საერთაშორისო ასპარეზზე დღეს აღარ არის 2016 წლის მდგომარეობა, ტრამპს არა მარტო აშშ-ში, არამედ მსოფლიოშიც ძალზე გავლენიანი მტრები ჰყავს, მხედველობაში მაქვს ირანის ხელისუფლება, ჩინეთის პოლიტადმინისტრაცია და ამ გარემოებებიდან გამომდინარე, ვერ ვხედავ მისი რუსეთთან დაახლოების შესაძლებლობებს. ტრამპი არაფერს მისცემს რუსეთს, თუ ის ჩინეთის სატელიტობის რეჟიმიდან არ გამოვიდა. რუსეთ-ამერიკის დაზავება და დამეგობრება შესაძლებელია მხოლოდ იმ შემთხვევაში, თუ პუტინი ჩაეხსნება ჩინეთს, ეს კი, პრაქტიკულად, განუხორციელებელია. ამიტომ ახალი პოლიტიკური რეალობის დადგომას ევრაზიაში დიდი პრობლემა უდგას წინ. არ ვიცი, შესაძლოა ბიძინა ივანიშვილი კიდევ სხვა არგუმანტაციებს ფლობს და ამან მისცა მას კარტების გახსნის საშუალება. ამ განცხადებით, მან ფსონები ღიად დადო ტრამპის ადმინისტრაციაზე, რაც ასევე სარისკოა, თუმცა მოგეხსენებათ, პოლიტიკა რისკების გარეშე არ არსებობს. დღეს მთელი მსოფლიო ირჩევს თავის ფავორიტს ტრამპსა და ბაიდენს შორის, ეს ბიძინას და საქართველოსაც ევალდებულებოდა, ეს მსოფლიო ოლიმპისთვის ბრძოლაა და შენ უნდა ჩამოყალიბდე, ვის მხარეს ხარ. ვიტყოდი, რომ ეს ცოტა ადრეა, მაგრამ შესაძლოა, გარკვეულწილად ივანიშვილს მოსთხოვეს პოზიციის დაფიქსირება. როგორც ვიცი, ტრამპის გარემოცვა მთელს მსოფლიოში რეკავს და თანამოაზრეებს რაზმავს. შესაძლოა, ამ კონტექსტში იქნა ივანიშვილის განცხადება გაკეთებული. ნებისმიერ შემთხვევაში, ეს მნიშვნელოვანი განცხადებაა და დრო გვიჩვენებს, რამდენად მართალია ბატონი ბიძინა და რამდენად სწორი იყო მისი პოლიტიკური ფსონი, ვინაიდან ამაზე ბევრი რამ იქნება დამოკიდებული. არჩევნებში დონალდ ტრამპმა თუ არ გაიმარჯვა, სავარაუდოდ, ჩვენ უფრო დიდი რისკების ზონაში შევალთ.
იხილეთ ასევე: